Romans 8 (KNFD)
1 Maaŋ muuŋgiap, nza Zisas Krais phorgi gumgi gu mbigi, Fhe Bakɨme nza suaŋv khaŋ nza suaŋgirga fhu, “Nde mbatɨgirga.” 2 Krais Zisas muuŋgi ŋaarar panan, Fhe Bakɨmen Ŋina Ŋaar nza nzuav tuavar kama fhɨrgim, nza anan ki. Ana vhɨra nza tɨn nzan ndavi vurir tɨvi mbatɨgi ndiav, vhɨra mba vhɨzi tɨva ndigim, nza bɨkbɨɨgi. Mba ndava vura tɨvi wom na gari fhu. Ana vhɨra nan tɨn mba tɨvi mbatɨgi zɨn vui tɨvi ndiav, vhɨra mba vhɨzi tɨva ndigim, mba tɨv wom na gari fhu. 3 Mba Moses suaŋgi tɨvi, nta nza muuŋgi tɨvi mbatɨgi vhɨzgirga tuktɨgi fhuvara. Ne khaŋ muuŋgi, nzan ndava vur, ana Moses suaŋgi tɨvi zɨn vui ŋkasŋka ki fhuvara. Mba Moses suaŋgi tɨvi muungeŋ tuktɨgi fhuv bigeŋ, Fhe Bakɨme nduara mba bigeŋ muuŋgi. Fhe Bakɨme nduara won Kama sarigim, ana kha nuianan zergi. Ana kha nuianan zergap, guma guara gegap, nza kha nuianan kav tɨvi mbatɨgi ga mbui gumgi, ana nzara fara muuŋgi. Ana nza muuŋgi tɨvi mbatɨgi vhɨzɨ zav zergi. Fhe Bakɨme ana fhava tɨn nza muuŋgi tɨvi mbatɨgi ga nzuav, ntan ŋkasŋka, ana nta vhɨzgi. 4 Fhe Bakɨme Moses ga suaŋgi tɨvi, nza nta zɨn vov, mbui bigir vhuuiŋ, nta guigira nzan kɨrga. Ne khaŋ muuŋgi, nza ntigem ndava vura tɨva zɨn vui fhuvara. Nza ntigem Fhe Bakɨmen Ŋina Ŋaara tɨva zɨn vui. 5 Mba ndava vura tɨva zɨn vui gumgi, mbe ndɨkndɨgi zazera ndava vura vuzvuga zɨn vui. Mba Fhe Bakɨmen Ŋina Ŋaara vuzvuga zɨn vui gumgi, mbe ndɨkndɨgi zazera Fhe Bakɨmen Ŋina Ŋaara vuzvuga zɨn vui. 6 Guma ndɨkndɨgi ndava vura tɨvira zɨn vui, mba guma ana rimgirga. Guma ndɨkndɨgi maaŋ muuŋgip Fhe Bakɨmen Ŋina Ŋaara vuzvugi zɨn vui, mba guma, ana zazera mbara muuŋgip kɨv, ana ndava mɨɨtɨga ndirga. 7 Guma ndava vura vuzvugi zɨn vui, mba guma ana panan Fhe Bakɨme ga kegi. Ne khaŋ muuŋgi, ana Fhe Bakɨme tɨvi piin ki fhuvara. Ana Fhe Bakɨme nzuai tɨvi zɨn ŋgɨgɨrga tuktɨgi fhu. 8 Mba ndava vura tɨvira zɨn vui gumgi, mbe Fhe Bakɨmen muuŋgirim, ana ndikndigirga tuktɨgi fhuvara. 9 Nde maaŋ muuŋgi fhuvara. Nden ndava vurar tɨvi, nta wom nde gari fhuvara. Nde maaŋ muuŋgip, guigira Fhe Bakɨmen Ŋina Ŋaar nden kɨrga, ana ntigem nde garim, nde ntigem Fhe Bakɨmen Ŋina Ŋaara tɨvi zɨn vui. Guma, ana Fhe Bakɨmen Ŋina Ŋaar anan ki fhu, ana Krais guma fhuvara. 10 Tɨvi mbatɨgi nde shogim, nde fhavi vhɨzɨrga. Nde maaŋ muuŋgip Krais nden vhen kɨrga, nde Fhe Bakɨme nɨman, nde tɨvir vhuuiaŋ mbui gumgi kɨv, Fhe Bakɨme Ŋina Ŋaar zazera mbara muuŋgiap ki bɨɨŋbɨɨŋ nden ntuua ndɨɨi. 11 Nde mba ntige ki fhavi, nta vhɨzi fhavi ma. Fhe Bakɨme taagiap Zisas Krais khavgi. Nde maaŋ muuŋgip, Fhe Bakɨmen Ŋina Ŋaar nden vhen kɨrga, nde rimgirga, Fhe Bakɨme taagi nde khavgip ana won Ŋina Ŋaarar panan zazera mbara muuŋgiap ki bɨɨŋbɨɨn nden nɨɨnga, nden fhavi wom vhɨzgirga fhu. 12 Maaŋ muuŋgiap, nde na phorgap guigira Zisas khothɨgi gumgi gu mbigi, nza ntigem, harigi khesharigi rurur muuŋri. Gu mba ndava vurar tɨva nzuai fhuvara. Zakɨra fhuvara! 13 Nde ntigem Fhe Bakɨmen Ŋina Ŋaara zɨn ŋgɨri. Nde wom ndava vura tɨvi zɨn ŋgɨ thari. Nde maaŋ muuŋgip, Fhe Bakɨmen Ŋina Ŋaara ŋkasŋkar panan, mba ndava vurar tɨvi mbatɨgi, nde nta shogirim, nta rimgirga, nde zazera mbara muuŋgiap ki bɨɨŋbɨɨŋ ndigirga. 14 Nza kaŋgi, gumgi gu mbigi fhura Fhe Bakɨmen Ŋina Ŋaara garim, ana mben ruru tɨvi gu bigi gari, mba gumgi gu mbigi, mbe Fhe Bakɨmen ŋkaa gu ŋkaar mbigi ma. 15 Nde Fhe Bakɨmen Ŋina Ŋaar ndigim, ana fhura nde ganɨrim, rɨrɨp wom nde ganɨrim, nde fhura anan ŋaara gumgir khɨni kegɨrga fhu. Zakɨra fhuvara! Fhe Bakɨmen Ŋina Ŋaar nde muuŋgim, nde Fhe Bakɨme tari ma. Nza Fhe Bakɨmen Ŋina Ŋaara ŋkasŋkar panan, nza kha kakaman Fhe Bakɨme mbui, “Aba.” Kha zɨ “Aba,” anan nɨɨeŋ khare, “Dara.” 16 Fhe Bakɨmen Ŋina Ŋaar, ana nduara nzan vhen ki guma phorgap khueŋ bun nzuai, nza Fhe Bakɨmen tari ma. 17 Nza Fhe Bakɨmen tari ki. Maaŋ muuŋgiap, nza zumgum Fhe Bakɨme nzan nɨɨn za suaŋgi bigir vhuuiŋ, nza Krais phorgɨp nta ndirga. Nza ntigem maaŋ muuŋgip ana ndigi zaagi, nza nta ndirga, nza zumgum zɨ bakɨme ndiv, ana phorgɨp mpirmpirɨga vhuun muuŋgirga. 18 Mba mpirmpirɨga vhuuŋ gum zɨ bakɨme, ni zumgum za kɨrar hɨgɨrga. Gu ndɨkndɨgi, mba tɨvani, mani guigi guarira nza kha ntige kha tugen ndi zaagi kambararga. 19 Fhe Bakɨme kha muuŋgi bigi, nta zam Fhe Bakɨme sarigi tugar rargap ki. Ana mba tugar, nza anan tari, ana nza ndiv kɨra khɨngirga. Fhe Bakɨme mba muuŋgi bigi, nta ntigem mba hɨrga tugar rargap, pani fegap, tamtam gari. 20 Ntige khar ki bigi, nta ntige Fhe Bakɨme muun za nta suaŋgi ŋaara mbui fhuvara. Nta wari wo vuzvugar maaŋ muuŋgiap ki fhuvara. Fhe Bakɨme nduara nta muuŋgim, nta maaŋ muuŋgiap ki. Nta maaŋ muuŋgiap kav, mba Fhe Bakɨme ntan muunga bigɨna vhuuen rargap ki. 21 Fhe Bakɨme mba sarigi tugar, ana mba nta kegi nta vhɨzi tuga mbatɨk, ana ana vhɨzgirga. Mba bigi, nza anan tari, mbe nza phorgɨv guigira nzerav bɨkbɨɨgirga. 22 Nza kaŋgi, mba Fhe Bakɨme muuŋgi bigi, nta zam mbik tara tɨr zav zaa ndi zaa fara muuŋgi zaa ndiav ki. Nta fhum guarara zaa ndiav, ŋgɨɨv, zav kav, ntige khar ki. 23 Mba bigira nzɨɨv nziav ki fhuvara. Nza vhɨra nzan ndavi vherir nziav ki. Nza Fhe Bakɨmen Ŋina Ŋaara ndigi, ana fharigi bigɨn, Fhe Bakɨme fhura anan nza nɨɨŋgi. Nza vhɨra zaa ndiav, ŋgɨɨv, Fhe Bakɨme mba sarigi tuga rargap ki. Fhe Bakɨme mba tugar, ana khueŋ sigi sarav, nza suanga, “Gu nde ndiga won kaman fagi, nde nan tari ma.” Fhe Bakɨme mba tugar, ana nza fhavir muuŋgirim, nta guigira harigi kheshararga. 24 Nza guigira Zisas khothɨgap, Fhe Bakɨme mba nzan muunga bigɨna vhuuen rarga ki, Fhe Bakɨme taagia nza ndigi. Nza maaŋ muuŋgip mba rarga ki bigɨn, nza ana gangi, nza bigɨn then rarga ki fhu. Maaŋ muuŋgip, guma bigɨna ndigɨrga, ana thaaŋ suaŋv rargɨ kɨrie? 25 Nza kaŋgi, nza mba rarga ki bigi, nza nta gangi fhup, nza maaŋ muuŋgiap, nza wari won ndavi havhargiap mba bigir, rarga ki. 26 Nza vhɨra, nza ndavi havhargi fhu. Nza mba rarga ki bigi nzan ndavi havharim, Fhe Bakɨmen Ŋina Ŋaar, ana vhɨra nzan ndavi havhargi. Nza kaŋgi fhu, nza ram muuŋgi suambarar Fhe Bakɨme phorgɨ suaŋrie? Fhe Bakɨme Ŋina Ŋaar, ana nduara nza nzuav wo ndava vhera visuav, nza suaŋgirga tuktɨgi fhuv buni, ana nzan kurkurar zav Fhe Bakɨme phorga nzuai. 27 Fhe Bakɨme, ana guigira gumgir ndavi vheri gari. Ana vhɨra won Ŋina Ŋaara ndɨkndɨgi kaŋgi. Ne khaŋ muuŋgi, ana Ŋinan Ŋaar, ana ana ndɨkndɨgira zɨn vov, anan gumgi gu mbigir kurkurar zav ana phorga nzuai. 28 Nza kaŋgi, Fhe Bakɨme za kha bigi ga mbui, nta wari tɨgap ŋgarav tɨvar vhuun ndavar ana ndɨɨi gumgi gu mbigi ga mbui. Mba gumgi gu mbigi, Fhe Bakɨme taagip mbe ndir zav suaŋgiap mben kamgi. Ana mben kamgim, mbe ana vuzvuga zɨn ŋgɨp, ana muun zav suaŋgi ŋaari, mbe ntan muunga. 29 Ne khaŋ muuŋgi, mba gumgi gu mbigi, Fhe Bakɨme fhum guarara mbe ndir zav suaŋgi. Ana vhɨra mbe farasegi, mbe ana Kamara farar muuŋgirga. Maaŋ muuŋgip, ana tari vhɨrve kɨrga, Krais, ana mben fega rum ma. 30 Ana mba fhum farasegi gumgi, ana vhɨra mben kamgi. Ana mba kamgi gumgi, ana Krais muuŋgi ŋaarar panan, ana tɨvir vhuuiaŋ mbui gumgi gu mbigir mben kaai. Ana mba tɨvir vhuuiaŋ mbui zɨn kaai gumgi gu mbigi, ana bɨɨŋbɨɨn vhuun mbe ndɨɨv, vhɨra won zɨ bakɨmen mben nɨɨnga. 31 Maaŋ muuŋgiap, nza ram Fhe Bakɨme muuŋgi bigi ga suaŋrie? Fhe Bakɨme nzan kurkurigim, the nza kambararie? Zakɨra fhuvara! 32 Fhe Bakɨme zaa ndiv rɨmɨngen won kama thɨvigi fhuvara. Ana ana sarigim, ana za nzan kurkura zav zergi. Ana won kamanra nza nɨɨŋgi, ana vhɨra maaŋ muuŋgip za mba harigi bigir nzan nɨɨŋgirga. 33 Fhe Bakɨme nzan wora mbuigi, ana maaŋ nzan muuŋrim, the nza suaŋv suaŋrie? Fhuvara. Fhe Bakɨme nduara, kha zɨn nza rɨgi, nza tɨvir vhuuiaŋ mbui gumgi gu mbigi ma. 34 The nza muuŋgi tɨvi mbatɨgi ga suaŋv, khaŋ nza suaŋgirie, “Nde rimgirga”? Fhuvara. Zisas Krais ana rimgiap, ana vhɨra taagia khavgi. Ana ntigem Fhe Bakɨmen guva haren kav, ana nzan kurkurar zav nza nzuav Fhe Bakɨme phorga nzuai. 35 Krais, ana guigira won ndavara nza nɨɨŋgi. Mba vuzvuk, ana guigi guarara za nzan ki, bigɨn the ana vuzvuga thugɨrga tuktɨgi fhuvara. Zakɨra fhuvara! Maaŋ muuŋgip, simtɨk nzan hɨrga o, nza maaŋ muuŋgip zaa ndirga o, harigi gumgi tɨvi mbatɨgir nzan muunga o, nza thi hɨrga o, nza shagi ga sosuagirga o, bigɨna mbatɨga thueŋ nzan hɨr saŋv muunga o, mbe nza shogiri nza vhɨzɨrga. Mba bigi, nta Krais vuzvuga thugɨrie? Zakɨra fhuvara! 36 Mba bigi guigira nzan hɨrga. Fhe Bakɨme buni vhuuiŋ ki gap ne suaŋgi,“Nza ndun gumgi gu mbigi ki. Maaŋ muuŋgiap, mbe zazera nza shogirim, nza vhɨzir za mbui.Mbe nza garim, nza sipsivi fara muuŋgim, mbe fura nza shogi.” 37 Krais, ana won ndavar nza nɨɨŋgi. Mba nzan hi bigi, nta fhura ki bigi ma. Krais, ana zazera nzan kurkurigim, nza guigira mba bigi kambai. 38 38-39 Fhe Bakɨme, ana guigira won ndavar nza nɨɨŋgim, gu khueŋ khothɨgi, bigɨna the Fhe Bakɨme vuzvuga thugɨrga tuktɨgi fhuvara. Nza rimgirga o, nza ŋamki o, Fhe Bakɨme enseri o, tori gu ŋiniŋgi havhari o, ntige khar ki bigi o, zumgu hɨrga bigi o, mbarkɨrga bigi nta ŋkasŋka ki o, kha vun ki bigi o, kha nɨɨn nuianan ki bigi o, mbar tamtam khar ki bigi, mba bigi, nta zam, nta Fhe Bakɨme wo ndavar nza nɨɨŋgi vuzvuga thugɨrga tuktɨgi fhuvara. Ana wo ndavar nza nɨɨŋgi vuzvuk, ana nza Bakɨme Krais Zisas muuŋgi ŋaarar panan, ana wo ndavar nza nɨɨŋgi vuzvugar nza khɨvigi.