Acts 15 (SBT1E)

1 Mi senkhat Judea ram renga Antioch an juonga, “Moses Balam anghan sertan nin tho nônchu sanminring ni thei no tu nui,” tiin iempungei an minchua. 2 Paul le Barnabas han ma roia han anni ngei hah an inkhalpui ngei oka, masikin, Paul le Barnaba le an lâia mi senkhat le ha bâiinkhamna chungroia han Jerusalema tîrtonngei le upangei hong intongpui rangin an minsûk zoia. 3 Koiindangin an hong mathâna, anni han Jentailngei Pathien tienga an inlet roi hah misîr tirin Phoenicia ram le Samaria ram an sir suoa ha an misîr renga han iempungei murdi an râiasân oka. 4 Jerusalem an tungin chu koiindangin tîrtonngei le upangeiin an lei modôma ma ngei kôm han Pathien'n anni ngei ma anga sin a tho ngei murdi hah an rila. 5 Hannirese Pharisee pâla mi iempungei senkhat an indinga, “Jentailngeiin sertan ngêta, Moses Balam an jôm rangin tipe ngei rang ani” an tia. 6 Tîrtonngei le upangei, ha roi hah jêk rangin an intûpa. 7 Asôt tak an inkhal suo nûkin Peter ândinga, “Sungsuokngei, Jentailngei Pathien chong an rieta, an iem theina ranga Thurchi Sa misîr pe ngei ranga nin lâi renga tien renga Pathien'n mi zen ani ti hah nin riet. 8 Mitin mindona rietpu Pathien'n ei kôm mi pêk anghan Jentailngei khom Ratha Inthieng pêk sân a khôk tiin ânlanga. 9 Eini le anni sensâi loiin, an iem sikin an sietnangei a ngâidam zoia. 10 Masikin, ei richibulngei le eini pêl zoi khâiloi puok hah atûna hin iempungei chunga mokhop pe rang bôkin irang mo Pathien nin minsin hi? 11 Ni mak!, Anni ngei angdênin eini khom Pumapa Jisua iema moroina han Sanminring ei ni,” a tia. 12 Barnabas le Paul'n anni ngei manga Pathien'n Jentailngei lâia sininkhêlngei le kamâmruoingei a sin roi an misîr kâr chu mipuingei nâm an dâireka. 13 An misîr suole chu Jacob khomin a misîr sa, “Sungsuokngei, ko chong rangâi ta u! 14 Pathien'n ama riming ruput ranga anni ngei lâia ni lâk suok rangin Jentailngei a juong pan phut roi Simon'n a misîr zoia. 15 Ha chong le dêipungei chong hi ântok thap ani. Pathien lekhabun, 16 “Masuole, Pumapa han kîr nôk ka taDavid omna rêngram achim hah minding nôk ki tih.a sietnangei sin nôk ka ta malemindet nôk ki tih. 17 Male mi murdi ngei le Jentailngei,Ki mi niranga ko koi ngei nâm Jentailngei ko kôm hong an ta. 18 Rammuol insieng renga hi chong min riet ngâipu Pumapa han a ti,” ati anghan. 19 “Masikin Jacob'n, mahi ki mindon chu ani. Jentailngei Pathien tienga hong inlet ngei chu minjêl no ila. 20 Manêkin, lekha muthuonin mirmilngei biekna neinun inthiengloi sâk mo, hur le ngal mo, sâ lei thisai le thisen sâk mo, mong rangin tipe ngei ila ki ti ani.” 21 Moses Balam chu tienlâi renga sabbathni rachamin Synagog taka an pore ngâi zoia, a chongngei khom khopui tina an misîr ngâi zoi,” a tia. 22 Hanchu, tîrtonngei, upangei le koiindang pumpuiin an lâia mi senkhat an thanga, Paul le Barnabas pâla Antiocha min se rangin an min chukka. An ulien uol inik iempungeiin an mirit, Judas, Barsabass an ti le Silas an thang ngeia. 23 Hi anghin miziekin, an min chôi ngeia:“Keini, tîrtonngei le upangei nin sungsuokngeiin kin iempu champui Jentail ânzir ngei Antioch, Syria le Cilicia rama omngei chibaingei nangni kin mûk. 24 Kin pâla mi senkhatin thurchi juong misîrin nangni an minjêla, mulungjîng nangni an shak ti kin rieta; nikhomrese, anni ngei ha kin kôm renga ite rilnangei man mak ngei. 25 Masikin kin intûpa, mulung inruol takin kin thanga nin kôm juongtîr rangin kin minsûk ani. Ei ruol moroitak ngei Barnaba le Paul 26 Jisua Khrista sinthona an ringna phal ngei lehin juong rese ngei kin ti. 27 Ha anghan, Judas le Silas kin juongtîr ani, hi ngei hin kin miziek hih mêl inmûn nangni misîr pe an tih. 28 Ratha Inthieng le inruolin hi balamngei sin om pêna hi chu puok rik dang sin loi rangin kin inruol; 29 mirmilngei biekna sâkruo sâk no roi, thisen sâk no roi, sâ sômthat sâk no roi, hur le ngal renga inkêm roi. Hi ngei hih tho tet loi rangin nin indîn theiin chu nin ta rangin sa ok atih, chibai” tiin. 30 An tîrlâmngei hah an sea, Antioch an tunga; mahan iempungei pâl murdi an koibûma, lekhamuthuon hah an pêk ngeia. 31 An pore suole chu ma mohôkna chong sika han râisânin an sip zoia. 32 Judas le Silas chu dêipungei khom an ti sa, asôtzan an chongpui ngeia, an mohôk ngeia, an min rât oka. 33 Sûn sôtzan an om suole chu a juongtîr ngei kôm kîr nôk rangin an se zoia, iempungeiin rathangamriemin an mathân ngeia. 35 Paul le Barnaba chu midang tamtak ngei le Pumapa chong minchu le misîrin Antioch'a han zora sôtzan an la oma. 36 Zora sôtzan suole chu Paul'n Barnabas kôm, “Tho se nôk ei ta, khopui tina Pumapa chong ei misîrna murdia ei sungsuokngei pan ei ta, i angin mo an om va en ngei rei,” a tia. 37 Barnabas'n John Mark an kôm tuongsa rang a nuoma. 38 Hannirese Paul'n chu nuom maka, abi chu Pamphylia ram tena a kîra, an sin a zoipui loi sikin ani. 39 An inkhal bita, an insen zoia, Barnabas John Mark a tuonga, rukuongin Cyprus tuihuol tieng an sea. 40 Paul'n chu Silas a thanga, iempungeiin Pumapa moroina kuta an bâng ngei suole chu a se zoi. 41 Koiindangngei mindet tirin Syria le Cilicia ram a sir zoi.

Acts 15 (SBT1E)

In Other Versions