1 Samuel 12 (SUSU2)

1 سَمُوٍلِ نَشَ عَ مَسٍن عِسِرَيِلَكَيٍ بِرِن بّ، «وٌ عَ كٌلٌن ﭑ بَرَ ﭑ تُلِ مَتِ وٌ رَ، ﭑ نَشَ مَنفّ دْشْ وٌ شُن مَ. 2 مَنفّ نَن يِ كِ نَشَن تِمَ وٌ يَ رَ. ﭑ تَن بَرَ قٌرِ، ﭑ شُنسّشّ بَرَ قِيشّ، ﭑ مَ دِيٍ نَ وٌ يَ مَ. ﭑ بَرَ تِ وٌ يَ رَ كٍلِقٍ ﭑ قٌنِكٍ تّمُي مَ هَن تٌ. 3 عَوَ، ﭑ تِشِ وٌ يَ عِ نَ نَن مَ، عَلَكٌ وٌ شَ عَ قَلَ ﭑ بّ عَلَتَلَ نُن مَنفّ سُفَندِشِ يَ شْرِ، شَ عَ سَ لِ ﭑ بَرَ نِنفٍ شَ نَ مُ سٌقَلٍ ندٍ بَ وٌ يِ رَ. وٌ شَ عَ قَلَ شَ ﭑ بَرَ مِشِ ندٍ تْورْ، شَ ﭑ بَرَ مِشِ ندٍ شُن نَكَنَ، شَ ﭑ بَرَ كْبِرِ رَ سُشُ قُنمَيَ رَ. وٌ شَ نَ قَلَ، ﭑ شَ نَ سَرٍ رَفبِلٍن وٌ مَ.» 4 عٍ نَشَ عَ يَابِ، «عِ مُ مُشُ تْورْ، عِ مُ مُشُ شُن نَكَنَ، عِ مُ كْبِرِ رَ سُشُ مُشُ يِ.» 5 عَ مَن نَشَ عَ قَلَ عٍ بّ، «عَلَتَلَ نُن عَ شَ مَنفّ سُفَندِشِ نَ سٍيدٍ رَ تٌ لْشْي، وٌ مُ ﭑ نَكْرْ سِشِ سٍسٍ شَ قٍ رَ.» عٍ نَشَ عَ يَابِ، «عَ نَ نَ قٍ سٍيدٍ رَ!» 6 سَمُوٍلِ نَشَ عَ مَسٍن حَمَ بّ، «عَلَتَلَ نَن مُنسَ نُن هَرُنَ تِ وٌ شُن مَ، عَ تَن نَن وٌ بٍنبَيٍ رَ مِنِ مِسِرَ بْشِ رَ. 7 عَوَ يَكْسِ، وٌ تِ عَلَتَلَ يَ عِ، ﭑ شَ وٌ رَتُ قٍ قَنيِيٍ رَ، عَلَ نَشَن نَبَشِ وٌ تَن نُن وٌ بَبَيٍ بّ. 8 يَشُبَ قَ شَنبِ مِسِرَ، وٌ بَبَيٍ نَشَ عَلَتَلَ شِلِ عَ شَ قَ عٍ مَلِ. عَلَتَلَ نَشَ مُنسَ نُن هَرُنَ شّي وٌ بٍنبَيٍ رَ مِنِدٍ مِسِرَ كُي، عٍ قَ عٍ رَ سَبَتِ يِ بْشِ مَ. 9 كْنْ عٍ تٌ نّيمُ عٍ مَرِفِ عَلَتَلَ مَ، عَ نَشَ عٍ لُ شَسٌرِ شَ سْورِيٍ شَ مَنفّ سِسٍرَ بّلّشّ. قِلِسِتَكَيٍ نُن مٌوَبَكَيٍ قَن نَشَ عٍ فٍرٍ. 10 عِسِرَيِلَكَيٍ نَشَ عَ قَلَ عَلَتَلَ بّ، ‹مُشُ بَرَ يُنُبِ رَبَ عَلَتَلَ رَبٌلٌقٍ رَ، مُشُ قَ بَلِ كُيٍ نُن عَسِتٍرٌتِ بَتُ. يَندِ، عِ شَ مُشُ بَ مُشُ يَشُييٍ بّلّشّ. مُشُ عِ بَتُمَ نّ.› 11 نَ نَن عَ نِيَ، عَلَتَلَ نَشَ يٍرُبَالِ، بٍدَن، يٍقِتٍ، نُن سَمُوٍلِ شّي وٌ بَدٍ وٌ يَشُييٍ يِ رَ نَشٍيٍ نُ وٌ رَبِلِنشِ. نَ كُي وٌ نَشَ لُ بْحّسَ كُي.» 12 «وٌ تٌ عَ تٌ عَمٌنِكَيٍ شَ مَنفّ نَشَسَ نَ قَقٍ وٌ فٍرٍدٍ، وٌ نَشَ عَ قَلَ ﭑ بّ، ‹مُشُ وَ مَ مَنفّ شَ تِ مُشُ شُن مَ.› كْنْ وٌ مَرِفِ عَلَتَلَ نَن قِندِشِ وٌ شَ مَنفّ رَ! 13 عَوَ يَكْسِ، عَلَتَلَ بَرَ مَنفّ ندٍ تِ وٌ شُن نَ، عَلْ وٌ نُ وَ مَ عَ شْن مَ كِ نَشّ. 14 شَ وٌ سَ فَاشُ عَلَتَلَ يَ رَ، شَ وٌ سَ عَ بَتُ، شَ وٌ سَ وٌ تُلِ مَتِ عَ رَ، شَ وٌ مُ سَ عَ مَتَندِ، شَ وٌ نُن وٌ شَ مَنفّ سَ بِرَ عَلَتَلَ قْشْ رَ، قٍ بِرِن سْونّيَمَ نّ وٌ بّ. 15 كْنْ شَ وٌ مُ وٌ تُلِ مَتِ عَلَتَلَ رَ، شَ وٌ سَ عَ مَتَندِ، عَلَتَلَ شَ شْنّ فٌرٌ مَ نّ وٌ مَ، عَلْ عَ فٌرٌ وٌ بٍنبَيٍ مَ كِ نَشّ. 16 يَكْسِ وٌ تِ، وٌ شَ عَ مَتٌ عَلَتَلَ قٍ شُنفبٍ نَشَن نَبَمَ وٌ يَ شْرِ. 17 مّنفِ شَبَ تّمُي نَن تٌ، كْنْ ﭑ عَلَتَلَ مَشَندِ مَ نّ، عَ شَ تُنّ نُن فَلَنيِ رَبِرَ بْشِ مَ، عَلَكٌ وٌ نْمَ عَ كٌلٌندٍ وٌ بَرَ قٍ حَاشِ رَبَ عَلَتَلَ يَ عِ مَنفّ مَشَندِقٍ عَ مَ.» 18 سَمُوٍلِ نَشَ عَلَتَلَ مَشَندِ. نَ لْشْي يَتِ، عَلَتَلَ نَشَ فَلَنيِ نُن تُنّ رَبِرَ بْشِ مَ. حَمَ نَشَ فَاشُ عَلَتَلَ نُن سَمُوٍلِ يَ رَ، 19 عٍ قَ عَ قَلَ سَمُوٍلِ بّ، «عِ شَ عِ مَرِفِ عَلَتَلَ مَشَندِ مُشُ بّ، عِ شَ كٌنيِ دِيٍ، عَلَكٌ مُشُ نَشَ قَشَ، بَرِ مَ مُشُ بَرَ ندٍ سَ مُشُ شَ يُنُبِيٍ قَرِ، عَ قَلَقٍ رَ، ‹مَنفّ ندٍ تِ مُشُ شُن مَ.›» 20 سَمُوٍلِ نَشَ عَ قَلَ حَمَ بّ، «هَلِ وٌ مُ هَنمّ. وٌ بَرَ نَ قٍ كٌبِ بِرِن نَبَ، كْنْ وٌ نَشَ مَكُيَ عَلَتَلَ رَ، وٌ شَ عَ شَ يَامَرِيٍ رَبَ وٌ بْحّ بِرِن نَ. 21 وٌ نَشَ وٌ مَكُيَ عَ رَ، وٌ نَشَ بِرَ قٍ قُقَقُ قْشْ رَ، نَشٍيٍ مُنَقَنيِ يٌ مُ نَ، نَشٍيٍ مُ وٌ مَلِمَ قٍقٍ مَ، بَرِ مَ عَلَ وُلٍ دَاشِيٍ نَن عٍ رَ. 22 عَلَتَلَ مُ عَ شَ حَمَ رَبٌلٌمَ عَ يّتّ شِلِ شُنفبٍ شَ قٍ رَ، بَرِ مَ عَ بَرَ نَتّ تٌنفٌ وٌ شَ قِندِ عَ شَ حَمَ رَ. 23 ﭑ مُ بَمَ عَلَتَلَ مَشَندِقٍ وٌ بّ، شَ نَ مُ عَ قِندِ مَ يُنُبِ نَن نَ ﭑ بّ عَلَتَلَ يَ عِ. ﭑ لُمَ وٌ شَرَن نَ قٍ قَنيِ نُن تِنشِنيِ نَن نَ. 24 ﭑ نَشَن تُن قَلَمَ وٌ بّ، وٌ شَ فَاشُ عَلَتَلَ يَ رَ، وٌ عَ شَ يَامَرِيٍ رَبَ وٌ بْحّ بِرِن نَ. وٌ شَ رَتُ عَ شَ قٍ شُنفبٍيٍ مَ عَ نَشٍيٍ رَبَشِ وٌ يَ عِ. 25 كْنْ شَ وٌ قٍ كٌبِ رَبَ، وٌ بْنْمَ نّ، وٌ تَن نُن وٌ شَ مَنفّ.»

1 Samuel 12 (SUSU2)

In Other Versions