1 Samuel 12 (TOMA)
1 Samiyɛle ɠɛni Izilayɛle nuiti ma: «Wo kaa, gè woiloga wo-woo ma, nii wo ɠɛa pɔ, gè naa pɛ kɛa wo ʋɛ, gè masagi zeiɗa wo unda. 2 Za ʋoluma, masagi nii ɠa a ɗa lo wo luɠɔ niina. Nɔ̀un gè lo ga wo luɠɔ, é lɔɔzei mà loungo yee ma, é zeeli za ma. Gè wɔlɔzaɠaga, nɔ̀undeɠaiti ti ɠolea, dòinti ɓalaa kana ti wo zaama. 3 Nà losu za wo ɠaazu, gè wo ɠaazaɠa, à gòoɠaaʋote, Ɠɔoɠɔ GALAGI ɠaazu, ta masagi nii é gulɔi ziaai ma. Wo zaama, ɓɛ ɠa gè ná-nikɛ, ɓaa ná-soovale kula zea? Ɓɛ ɠa gè mɔnɛa, ɓaa gè suziɠaa, wafuun? Ɓɛ ɠa é lobɛani vea zèa, nii a kɛ gè ɠaazu ʋɛɛ ma, ná-faaɠaazagiti ma? À bo dɛɛ mà, ni nà ɠɛ ani nɔpɛ kulani nu ya telebotala maazu, nà ti pɛ gaaɠale ma.» 4 Ti gooɠaaʋoteni ga: «È la gi mɔnɛni, è ʋa gi zuziɠa fuun, è la ɓalaa lobɛani nɔpɛ kulani nu ya.» 5 Samiyɛle ɠɛni ti ma ʋolu: «Ɠɔoɠɔ GALAGI, ta wa-masagi, ta ga zeelei, ga wo la sɔ kaani bà, nii wa pèelala su.»Ti ɠɛni ma: «Ungo, zekana é la.» 6 Samiyɛle ɠɛni nuɓusɛiti ma, mɔnɔ: «Ɠɔoɠɔ GALAGI ɠa é yiimazeɠeni ga Moize ta Aalɔnni ga ti wo-mɛmɛwolani kula Ezipete yooi zu. 7 Naa ɠa é ba, à ɠaalɛɛna ba Ɠɔoɠɔ GALAGI ɠakala, gè wo ɠitoo naama vaa wolaiti su, niiti é ti ɠɛa wo ɠizo faa zu, wa-o, wo-mɛmɛwolani-yo. 8 «Zakɔɓe ta ná-nuɓusɛiti, ti liai ma Ezipete yooi zu, kpɔlɔi yɛni zeizu ti ma, ti Ɠɔoɠɔ GALAGI lolini, ga é ɓɔ ti ʋa, naa ɠa é kɛɛni Ɠɔoɠɔ GALAGI Moize ta Aalɔnni teʋeni, ti ti ɠula Ezipete yooi ʋa, ti ʋa ga tiye, ti zei zooi nii zu, ʋɛ ade ná za. 9 Kɛlɛ wo-mɛmɛwolani ti ɠɛlɛni Ɠɔoɠɔ GALAGI ʋa, ta-ƓALAGI. Naa ɠa é kɛɛni, Ɠɔoɠɔ GALAGI yeeɓeni ti ʋa la, ti lɔ Ɠasɔɔl ɠɔɔɠuluɓai Sisela yeezu, ta Filisiti nuiti, ta Moaɓe masagi, niiti ti kɔɔi ʋɛɛni ti ʋa. 10 Ti wooɠulani mɔnɔ Ɠɔoɠɔ GALAGI ma, ti laa zɔ ga ga ta-ɠotoiti, ti ɠɛ ma: ‹Ɠɔoɠɔ GALAGI, gá ga sɔba nu, mazɔlɔɔ gi ɠɛlɛa è ʋa, gi ɗa kɔɔɠɔ ganigiti dɛbi, Ɓaaleni, ta Asetaateiti. Kɛlɛ gi unmɔɔ niizu, è gi ɠula gi zili nuiti zea, naa a ɠɛɛna, gá è lɛbi.› 11 Naa ʋoluma, Ɠɔoɠɔ GALAGI Zedeyɔn leʋeni, é Ɓedan leʋe, ta Zɛfeté, é gaaɓela ga ze, nà Samiyɛle, ga é wo ɠizo wo zili nuiti ma, niiti ti ɠɛni wo-maaɠoolii zu, naa ɠa é kɛa, wo zeini ziilɛigi zu zooi zu. 12 «Wo Amɔn nuiti ta-masagi Naɠase ɠaai ma, é ɗa ʋa kɔɔi ʋɛɛzu wo ʋa, wo ɠɛni mà: ‹Masa sei gi unda.› Wo naa ɠɛ, eɠɛ Ɠɔoɠɔ GALAGI lɛi, é ʋa ɠɛ ga wa-masagi. 13 Wa-masagi ɠaa mu, eɠɛʋelei wo yiimazeɠea la da, ta wo maaɠaazaɠaboga da mà. Ɠɔoɠɔ GALAGI ɠa é seiɗa wo unda. 14 É lɔɔzei za ma, ni wa Ɠɔoɠɔ GALAGI lɛbina, wo botii ɠɛ bɛ, wo ɠolo bɛ, ni wo la wuzeɠeni ná-tɔgiti daalɔɠɔma, ni wa-o, wa-masagi-yo, wa ʋilɛna Ɠɔoɠɔ GALAGI ʋolu, fai pɛ ka ɠɛ ga pagɔ. 15 Kɛlɛ ni wo la woiloni gooi ma, wa wuzeɠena ná-deveiti daalɔɠɔma, Ɠɔoɠɔ GALAGI ɠa yeewuzeɠe wo laalɔɠɔma ga gola, eɠɛʋelei é kɛɛni la ga wo-mɛmɛwolani. 16 «À yɛ losuʋɛti, wo laavɔɔ vaa wolai ɠa, nii Ɠɔoɠɔ GALAGI ʋaazu kɛɛzu wo ɠaazu. 17 Foɠoi lɛi ade ʋa ɠɛ su ɓaa? Nà Ɠɔoɠɔ GALAGI valizu, é yeeɓe geeɓadɛi ʋa, ta tonai, ti ʋa, wo kwɛɛ ga naati ga faa ɲɔu wola ɠa wo kɛa Ɠɔoɠɔ GALAGI ɠaazu, ga wo masa gaiziɛ ɓɔɠɔ ʋɛ.» 18 Samiyɛle Ɠɔoɠɔ GALAGI valini, naama voloi Ɠɔoɠɔ GALAGI tonai ʋuuni, é geeɓadɛiti too. Izilayɛle nuiti pɛ ti luani Ɠɔoɠɔ GALAGI ʋa, ta Samiyɛle. 19 Ti pɛ ti ɠɛni Samiyɛle ma: «Ɗa-ƓALAGI maanɛɛnɛ gi ʋɛ, nii é ga Ɠɔoɠɔ GALAGI, nii a kɛ gi mina za, mazɔlɔɔ gá-ɠotoi zɔiti pɛ poluma, gi ta laa ma, ga gi masa gaiziɛ ɓɔɠɔ ʋɛ.» 20 Samiyɛle ɠɛni ti ma: «À mina lua. Wa ɠa wo niima vaa ɲɔi ɠɛa, kɛlɛ à mina ʋoluave Ɠɔoɠɔ GALAGI ʋa, kɛlɛ à dɛbi ga wo-yii pɛ. 21 Wa ʋoluavena ba, naa ʋolu ɠa ga wo ʋilɛ kɔɔɠɔ ganigiti polu, niiti zobo ge la ti ʋɛ, ti ʋa ɓɔ nu ʋa, ɓaa ti ʋa nu ɠizo, mazɔlɔɔ ta ga fuun ganiiti. 22 Nɛɛʋɛ Ɠɔoɠɔ GALAGI ʋɛ, ga é wo ɠɛ ga ná-nuɓusɛiti, naa ɠa é ba, é la ɠɛlɛa wo ʋa, mazɔlɔɔ toɠa pɔ ga lɛbiyai ve daasei golai ʋɛ. 23 Niima é ga nɔ̀un tetegi, Ɠɔoɠɔ GALAGI kìzo naama ɠoto wolai ɠɛɛ vai ma, tɔun daalɔɠɔma, ga gè ʋa ɓe maanɛɛnɛi wosu wo ʋɛ. Nà yɛsu wo ɠalasu ga pelei pagai, ta sɔlegai. 24 Wa ma, à lua Ɠɔoɠɔ GALAGI ʋa, wo dɛbi gaamai zu, ga wo-yii pɛ. Mazɔlɔɔ à ɠizɛ faa wolaiti su, é ti ɠɛai wo ɠaazu. 25 Kɛlɛ ni wa faa ɲɔi ɠɛɛna, wo undaa ɠa ʋili, wa-o, wa-masagi-yo.»