Hebrews 1 (TBIAOTANT)

1 Fomɨra God dughiar avɨriba ko tuavir avɨribar uan akam isa an akam inigha izir gumazibagh anɨngizɨ, me en inazir afeziabav keme. 2 Ezɨ datɨrɨghɨn dughiar kam, kar dughiar abuananaba, God e mɨkɨmasa uan akam isa uan Otarim ganɨngi. God biziba bar da iniasava Otarir kam amɨsefe. Otarir kamɨn agharimɨn, God fomɨra overiam ko nguazimɨn ingari. 3 Ezɨ Otarir kamra Godɨn angazangarim en akagha ghaze, God a bar dera. Egha uaghan a Godɨn mɨrara gari. An akam bar gavgafi, egha akar kamra a bar bizibagh amima, da gavgavighavɨra iti. Egha an arazir kuraba gɨn amadir ingangarim agɨvagha, gumazamizibagh amima me zuegha iti. Egha a gɨn Godɨn Nguibamɨn ghuavanabogha Pɨn Tir Atrivir Ekiamɨn agharir guvimɨn boroghɨn apera. 4 Afeziam ziam uan Otarim ganɨngi. Ezɨ ziar kam a bar dera, egha enselbar ziabagh afira. Kamaghɨn amizɨ, an Otarim gamizɨma a enselbar ekiamɨn oto, ezɨ me an apengan iti. 5 Egha God dughiatam uan enselɨn tam kamaghɨn a mɨkemezir puvatɨ, “Nɨ nan Otarim, ezɨ datɨrɨghɨn kɨ nɨn Afeziamɨn oto.” O a kamaghɨn enselɨn tam mɨkemezir puvatɨ, “Kɨ uabɨ ia inigh, egh ian Afeziamɨn mɨn ikɨtɨ, ia nan Otarimɨn mɨn ikiam.” Bar puvatɨ. 6 Egha dughiar God ua uan Otarir ivariam nguazir kamɨn anemangasa uaghan ghaze: “Godɨn enselba bar an apengan ikɨvaan ziam fam.” 7 God enselbagh nɨghnɨgha kamaghɨn mɨgei, “A uan enselbagh amima da amɨnimɨn mɨn otifi, egha uan ingangarir gumazibagh amima me avir mɨzariabar mɨn otifi.” 8 Egha Otarim gɨnɨghnɨgha kamaghɨn mɨgei: “Nɨn atrivir dabirabir God nɨ ganɨngizim,a zurara ikɨ mamaghɨra ikiam.Eghtɨ nɨ guizɨn arazimɨnuan gumazamizibagh ativagh men ganam. 9 Nɨ arazir aghuibara ifuegha, egha arazir kuraba bar dar aghua.Kamagh amizɨ, God nɨ amɨsevegha,nɨ ziar ekiam ikiasaa borem nɨn dapanim ginge.A kamaghɨn nɨ gamizɨnɨ bar akonge,ezɨ nɨ bar akongezir bizir kam,atrivir igharaziba bar me gafira.” 10 Egha God uan Otarim kamaghɨn a mɨgei: “Ekiam, nɨ fomɨra nguazir kamɨn ingari.Guizbangɨra, nɨ uabɨ uan dafaribar overiam ko bizir pɨn itibar ingari. 11 Bizir kaba bar gɨvagham,eghtɨ nɨ ikɨvɨra ikiam.Overiam ko nguazim, aning bar ikuvigham,mati inim ghurigha bar bɨaghire. 12 Nɨ aning righam,mati gumazim atuim rɨki.Nɨ aning damightɨ aning igharagh otogham,mati gumazim korotiar ghuriba suagharɨsi.Ezɨ nɨ, kamaghɨra iti, nɨ igharagha garir puvatɨ.Nɨn dughiam gɨvaghan kogham.” 13 Fomɨra God kamaghɨn uan Otarimra kamaghɨn a mɨkeme, “Nɨ nan agharir guvimɨn daperagh ikɨ mangɨtɨ, kɨ nɨn apaniba dɨkabɨragh me isɨ nɨn dafarim datɨghtɨ me nɨn dagarimningɨn apengan ikiam.” Egha God dughiatamɨn akar katam enselɨn tam mɨkemezir puvatɨ. Bar puvatɨ. 14 Guizbangɨra enselba me duaba, egha me Godɨn ingangarim gami. Ezɨ God gumazamizir a ua iniamibar akurvaghasa me amadi, me arui.

Hebrews 1 (TBIAOTANT)

In Other Versions