Isaiah 40 (TBIAOTANT)
1 Ian God ghaze:“Ia gavgavim isɨ nan gumazamizibar anɨngtɨ,me navir amɨrizimɨn ikɨ. 2 Ia apangkuvim itir akar aghuir kam isɨ,Jerusalemɨn nguibamɨn gumazamiziba me mɨkɨm gavgavim me danɨng.Egh kamaghɨn nan gun me mɨkɨm suam, kɨ Ikiavɨra Itir God,kɨ uan dafarimɨn men arazir kuraba ikaragha bar dughiar ruarimɨn me ataghizɨ me kalabusɨn ike.Ezɨ datɨrɨghɨn kɨ men mɨzaziba ko ingangarir ekiam agɨvaghamen arazir kuraba gɨn amadazɨ, me fɨriaghɨre.” 3 Ezɨ gumazir tiarir mam kamaghɨn dɨa ghaze,“Ia gumazamiziba puvatɨzir danganimɨn,Ikiavɨra Itir God baghɨva tuaviba azenɨva dar kɨr. 4 Egh danganir zariba apemɨva,mɨghsɨaba ko akɨribagh kutɨ da magɨrɨ.Egh tuavir ikɨzɨrɨziba, ia dar ingarightɨ, da voroghɨra mɨneghirɨgh.Egh tuavir kuraba, ia deraghvɨra da akɨr. 5 Eghtɨ Ikiavɨra Itir Godɨn angazangarir gavgavim ko ziar ekiam azenim girɨghtɨ,nguazir kamɨn gumazamiziba bar moghɨram an ganam.”Kar Ikiavɨra Itir Godɨn, akatorimɨn otozir mɨgɨrɨgɨam. 6 Ezɨ tiarir mam kamaghɨn mɨgɨa ghaze,“Nɨ akam akun.”Ezɨ kɨ ghaze,“Kɨ akar manam akunam.”Ezɨ tiarir kam na ikaragha ghaze,“Nɨ kamaghɨn mɨkɨm suam,Gumazamiziba nguazir kamɨn ikɨvɨra ikian kogham,me oghevseviba mɨdɨi moghɨra mɨsigham.Me ruarimɨn itir akɨmariba suaghiri moghɨn,dughiar ruaribar itir puvatɨ. 7 Ikiavɨra Itir God amɨnir fefeim amadima, oghevseviba mɨdɨima, akɨmariba mɨdɨa suaghiri.Bar guizbangɨra, gumazamiziba oghevsevibar mɨn, bar moghɨra gevegham. 8 E fo, oghevseviba mɨdɨi, ezɨ akɨmariba suaghiri.Ezɨ en Godɨn akam,a zurara ikia kamaghɨra iti.” 9 O Saionɨn gumazamiziba, ia mɨghsɨar ekiamɨn mavanangɨva, akar aghuim akun.O Jerusalemɨn gumazamiziba, ia pamtemɨn dɨmɨva akar aghuim akun.Nɨ atiatingan kogh, akam akun Judan nguibabav kɨm suam,“Ia gan, ian God a izi!” 10 Ia gan. Ikiavɨra Itir God, ian Ekiam, a uan gavgavir ekiam sara izi.A uan apaniba dɨkabɨragha gɨfa.Egha a uan gumazamiziba, ua me inigha izi,mati bizir aghuir a mɨdorozimɨn me dɨkabɨragha inizir biziba. 11 A sipsipbagh eghuvir gumazimɨn mɨn,uan gumazamiziba deragha me geghuva men gari.A zurara uan agharimningɨn sipsipɨn nguziba akumakua,me isa uan evarim garɨgha, me ateragha arui.A sipsipɨn amebar nguzir bar muziariba itiba, a men asughasugha,me isa tuaviba men akakagha, men akua zui. 12 Gumazitam ongarim tuisɨghasa uan dafarimɨn bar a tuigha an suirazir puvatɨ.Gumazitam overiamɨn arozim gɨfoghasa uan dafarim onegha an suiragha an abarazir puvatɨ.Gumazitam nguazir mɨnezim tuisɨghasa uan itarim inigha bar moghɨram a tuizir puvatɨ.Gumazitam, mɨghsɨar ekiaba ko dozibar osɨmtɨzibar dɨbobonim gɨfofoghasa, uan skel inigha da medir puvatɨ. 13 Gumazitam bizibar amuamin fofozim, Ikiavɨra Itir Godɨn sure damuan kogham.Gumazitam an faragh mangɨ nɨghnɨziba a danɨngan kogham. 14 Ikiavɨra Itir God fofozim bagha gumazitamɨn azarazɨ,a ti guizɨn arazimɨn tuavimɨn an sure gami?Bar puvatɨ.Gumazitam nɨghnɨzir aghuiba ko fofozir aghuir a itir kabar Godɨn sure gamizir puvatɨ.Bar puvatɨ. 15 Bar guizbangɨra, Ikiavɨra Itir God,kantribar garima, me mati pura biziba.Me mati dɨpar muziarir ofɨzir vamɨra ira mɨner ekiam giri.Egha mati gumazim nguazir mɨnezir muziarir bar vamɨran osɨmtɨzim gɨfoghsɨa inigh skel datɨghtɨ, an osɨmtɨziba puvatɨgham.Kantriba bar, Godɨn damazimɨn guizbangɨra bar sufi.A saghuiamɨn itir arighatɨzibar garima, men osɨmtɨzibamati nguazir mɨnezir kɨnim. 16 Egh gumazamiziba asɨziba bar dav suegh, Lebanonɨn ruarimɨn temeba okegh,da inigh izɨ avir ekiam atɨgh, asɨzir kaba bar da tueghtɨ,da bar isi mɨghɨrighamin ofa damuam.Eghtɨ men ofan kam Godɨn damazimɨn pura bizimɨn mɨn otogham. 17 Nguazir kamɨn kantriba bar, me Ikiavɨra Itir Godɨn damazimɨn pura biziba.Me pura bizir kɨniba. 18 Kamaghɨn amizɨ, tinara Godɨn mɨn gari?Guizbangɨra, bizitam a ko magh garir puvatɨ. 19 Ezɨ, asebar marvir guaba, gumazir dɨgɨribagh amiba,me da aghora dar ingari.Ezɨ golɨn ingarir gumaziba me golɨn da nomke,egha da ikiasa silvan senbar ingari. 20 Gumazamizir onganarazibagh amiba,me temer aghuir bar gavgavir zuamɨra kurighan koghamiba amɨsefi.Egha gumazir dɨgɨriba deragha dagh amiba me mɨgei.Ezɨ me me bagha asebar marvir guaba temebar dar aghori.Gumazir kam bar deravɨra marvir guar kam tememɨn aneghoreghtɨ,a tugh gavgavigh ikɨ irɨghan kogham. 21 Ia ti fozir puvatɨ?Egha ia ti oraghizir puvatɨ?Gumazitam ti ia mɨkemezir puvatɨ,ezɨ ia bar fomɨra iza datɨrɨghɨn bizir kam gɨfozir puvatɨ? 22 Godɨn overiamɨn pɨn uan atrivir dabirabim gaperaghav itim,a bizir kaba bar dar ingari.Egha an overiam, inimɨn mɨn an onegha, averpenimɨn mɨn a kuasa.Ezɨ an damazimɨn, nguazir kamɨn gumazamiziba bar suvigha, odezibar mɨn iti. 23 An atriviba ko gumazir ziaba itiba abɨrima,me ua ziaba puvatɨ. 24 Atriviba mati, akɨmarir igiaba gumazamiziba datɨrɨghɨra da opari, ezɨ dar biba tɨghar nguazimɨn magɨram.Eghtɨ Ekiam amɨnir fefem amadaghtɨ, a izamin dughiamɨn, me zuamɨra mɨsɨngam.Eghtɨ amɨnim mɨnezir muziarimɨn mɨn, me giveragh mangɨgham. 25 Ezɨ Godɨn Bar Zuezim azaragha ghaze,“Tinara nan mɨn gari?Guizbangɨra, gumazitam na ko magh gari puvatɨ.” 26 Ia pɨn overiamɨn gan!Tinara mɨkoveziba ko overiamɨn itir bizibar ingarizɨ, da otifi?Bizir kaba, Godɨn mɨdorozir gumazibar mɨn iti.A ziaba dagh arɨgha dar pone.An adar dɨbobonim gɨfogha, vaghvagha dar ziabagh fo.A gavgaviba bar iti, kamaghɨn amizɨ, bizir pɨn itir katam ovengan kogham. 27 Ia Israelia, ia Jekopɨn anabamɨn adarasi, ia manmaghsua puvɨra imoba kamaghɨn mɨgei,“Ikiavɨra Itir God, en osɨmtɨzibar garir puvatɨ.E dughiar kuraba bativima, en God en akurvaghan aghua.” 28 Ia ti kamaghɨn oregha fozir puvatɨ,Ikiavɨra Itir God, a Godɨn zurara ikia mamaghɨra itim.A nguazir kam ko an itir biziba bar moghɨra dar ingari.An amɨragha amɨrazir puvatɨ.Egha an gavgavim gevir puvatɨ.Eghtɨ gumazitam an nɨghnɨzim gɨfofoghsɨ damuva avegham. 29 A gavgaviba puvatɨzir gumazamiziba gavgaviba me ganɨdi.Ezɨ men gavgaviba amɨragha uaghirima, a me gamizɨ,me uamategha gavgaviba isi. 30 Dughiar mabar, gumazir igiabar gavgaviba gefi.Ezɨ me amɨrvagha pura iri. 31 Ezɨ gumazamizir nɨghnɨzir gavgavim Ikiavɨra Itir Godɨn ikia, an gavgavim bagha a mɨzua itiba,a gavgavir igiam me danɨngtɨ, me zurara gavgavighvɨra ikiam.Me dɨkavigh deraghvɨra mangam, mati kuarazir bagaba overiamɨn mɨghagha arui.Me ivemar mangɨ, egh avɨghaghan kogham,me daru mangɨ, egh amɨrvaghan kogham.