Isaiah 40 (TOMA)
1 À nà-nuɓusɛiti gaanɛɛnɛ,wa-ƓALAGI ɠɛ naa,Ungo, à ti ɠaanɛɛnɛ! 2 À Zeluzalɛme iɲɔdɔɔ,wo wooɠula ma ga duɔla wotii ɓega,ná-faaɠaaza golaiti ma zalai ɠulaa,É ná-kotoiti ma zalai ɠaavɔnigai zɔlɔɔga Ɠɔoɠɔ GALAGI ya. 3 Kpee wooi ɠa ɠulazu, é ɠɛ ma:«À pelei laalao Ɠɔoɠɔ GALAGI ʋɛ teʋebai zu,wo ada vɔɔvɔi nii gaa ɠɛ sɔli,wo pelei ɓɛtɛ ada-ƓALAGI ʋɛ. 4 Pɛtugiti pɛ daave,gize wolaiti ta gize goiti pɛ gaayei.Ʋɛti náti gaa la sɔli, mináti ti ɠɛ ga zou ɠaanɛmɛai,ʋɛti náti gaaɠoozaai, mináti ti ɠɛ ga nɛmɛi. 5 Naazu Ɠɔoɠɔ GALAGI ná-lɛbiyai ɠa ɠula kɛlɛma,nuɓusɛi pɛ ka ka ʋɔɔma.Mazɔlɔɔ Ɠɔoɠɔ GALAGI ɠa é boga.» 6 Woo ɠila ge ɠɛni ma:«Keela wooi wo!»Woo ɠili ge ɠɛ ma:«Leeni ɠa nà bo?»Wooi ɠulani ʋolu, é ɠɛ ma:«Nuɓusɛi pɛ kɛɛʋɛ eɠɛ tufai,zɛbɛ la su é ʋa leʋe dɔɓɔzu lufai ma ʋuai ʋa, 7 tufai ɠa ɗa vɔ, ma ʋuai ʋoolo,siɛgi zu Ɠɔoɠɔ GALAGI ná-fiilɛi ʋuuzu la ma.Gaamai zu, nuɓusɛi ɠulaʋɛ ga tufai. 8 Tufai ɠa ɗa vɔ, ma ʋuai ʋoolo,kɛlɛ ada-ƓALAGI laawooi ɠa yɛsu ná eyɛsu ɠɔ.» 9 Siyɔn, woo niinɛ ʋagɔi ma ɠeelai, lɛ gize ɠaaɠoozagi ma!Kpeei loo ga zɛbɛi, Zeluzalɛme, woo niinɛ ʋagɔi ma ɠeelai!Wooɠula gola, mina lua, è ɠɛ Zuda laa wolaiti ma:«Wɛlɛ wa-ƓALAGI ʋa!» 10 Wɛlɛ Maliɠii Ɠɔoɠɔ GALAGI ʋa,toɠa ʋaazu ga zobogi,ná-zobogi ɠa é masadai ɠɛɛzu la.Toɠa ʋaazu ga ná-sɔlɔɔgi ta kpɔlɔzuʋɛ ma lɔnɔgi. 11 Toɠa ɗa ná-baala kpulugi ɠɔnɔkula,eɠɛʋelei baala makɛ nui a ɗa kɛɛ la,toɠa ɗa ná-baala ziʋoiti gaalɛ ba yeelokoi zu,toɠa ɗa ti zeɠe, é ti ʋɛɛ yiila,é ɗa lo baala deeiti tuɠɔ, ziʋoi ti ʋa. 12 Ɓɛ ɠa é kpoloɗɛi ɠaalɛa ba,é pu yeaʋɛ, é kɔɠɔ ná?Ɓɛ ɠa é geei ɠɔɠɔni ga yeeɓeɠaiti?Ɓɛ ɠa é zooi ma vufiligi ʋua kɔɠɔ ganii zu?Ɓɛ ɠa é gizeiti kɔɠɔga kiloi ɠa? 13 Ɓɛ ɠa é Ɠɔoɠɔ GALAGI ná-Zɛnvui ɠɔɠɔni?Ɓɛ ɠa é ɠɛni ga tɛnɛ nui, é ɗa kala? 14 Ɓɛ ɠa é ɠɛni ga GALA tɛnɛ nui,é ʋa ɠi ve bɛ, faiti gaa ʋa ɠala?Ɓɛ ɠa é kalani ga pele ʋagɔi?Ɓɛ ɠa é kalani ga ɠimalai,é keleɠelegi ma ʋelei lɛɛ la? 15 Ɠɔoɠɔ GALAGI ɠaazu, zii ɠiligiti ti la leʋeni ziɛ goi ʋaé ʋilɛsu peinpein songoi zu,ɓaa eɠɛ fufili gilagi, é kiloi ɠa.Wɛlɛ ziɛ zaama yooiti ba, ta kpoloɗɛi laaʋɛ yooiti,toɠa ɗa ti wuzeɠe nɔ eɠɛ fufiligi nɔ. 16 Sɛdele guluiti ti Liɓan yooi zu,ti la kula ɠɛa ga ná-zalaɠa ɠulazuʋɛ ɠoʋii,suaiti pɛ ti ná, ti lɔiʋɛ ga gala zalaɠai. 17 Zii ɠiligiti pɛ ti la gaazu ga ani nɔpɛ,ti-losuʋɛ ɠa tɔun bɛ nɔ ga fuungi nɔ ta ná ɲaka. 18 Ɓɛ ɠa wo wɔinni wo GALA pokɔɠɔ ma?Anii ɓɛgele ɠa ɗa ti la ɓɔɠɔ ma? 19 Kɔɔɠɔ ganigi ɠa ɲɛɛliɠi nui kpɛtɛzu,zanu kpɛtɛ nui zanugi ɲɛkpɛ ba,é wali yɔlɔɠɔiti gili ba. 20 Zɔi balagai gola, é la zoogaé ʋa naa ɠɛɠala naavolo ɠula ɓɔɠɔ ma,naa ɠa ɗa gului ta zeɠe, é la luulaa,é li, é ɲɛɛliɠi nu ɠaiziɛ,naa vololibai ɓɛtɛ bɛ, é la ɲiikpiga. 21 Wo la kwɛɛ ɓaa?Wo la ɠɛni mɛnini ɓaa?Ti la ɠɛni boni wo ma kaite mɔunpa?Wo la ɠɛni eteai ma wuulaagi vai ɠaaɠaani ɓaa? 22 Ɠɔoɠɔ GALAGI ɠa é zeini eteai ɠɔlɔkɔlɔmaʋɛ pɛ unda,eteai zu nuiti ta gaazu nɔ eɠɛ kotogiti.É geeɠɔlɔgi zuvieni eɠɛ seɠei,é suvieni eɠɛ zeɠe ʋɛlɛ ga nu zei bu. 23 Toɠa a ɗa kundiɠiiti koloɠolo, é ti ʋɛɛ su mɛɛ,niiti zobogi ti ʋɛ eteai zu, é naati kɛ ga nu ɲakaiti. 24 Ti la ɠɛni ɠite ziinni,ti la ɓeni ga vaza ɠite,ti ma zapei la ɠite ɓeni ga zooi zo,fiilɛi ʋua ti ma, ti ɗa vɔ,Ɠɔoɠɔ GALAGI ná-tɔngɔlɔ fiilɛi ɗa li ga tiye eɠɛ molo ɓooloi. 25 «Ɓɛ ɠa wa zoo wo gi la ɓɔɠɔ ma,ga tɔun é ʋa ɠɛ ga nɔ̀un kɛʋele?»GALA Ɲadegai ɠa é naa wosu. 26 À ɠaazuwuzeɠe lɛɛ, wo wɛlɛ geezuʋɛ,ɓɛ ɠa é geei ɠaaʋɛ anii naati kpɛtɛni?É losu ti luɠɔ, ti-ma ɓulugi ɠaavɔnigai ɗa ziɛ eɠɛ salaʋusuiti.É ɗa ti pɛ toli ga ti-laaseigiti.Ná-zobo golai zaɓu zu, ta ná-zɛbɛi,gaa la ʋalaga taɠila kpalaa ba. 27 Izilayɛle, Zakɔɓe mavofodai,leeni vaa zu è bosu ga:«Mà vaiti ti la Ɠɔoɠɔ GALAGI ɠaazu ga faa,nà-GALAGI è la faa nɔpɛ kɛɛzu,è ʋa ɓaa nà-gaamaiti maazu»? 28 È la kwɛni ɓaa?È la ɠɛni mɛnini ɓaa?Ɠɔoɠɔ GALAGI ɠa é ga GALA ɠɔoɠɔ,é eteai ɓɛtɛni, é zo zou ɓela ga, é li zou ɓela ga.É la ɓɔlɔa, dɔtɔzu la leʋea,nu la zooga é ʋa ná-keleɠelegi zuzɔligi ɠwɛɛ. 29 Toɠa ɗa zɛbɛi ve naama nui ʋɛ, nii suɓɔlɔai,zɔi iɲɔteʋeai, é gaaɓaai ve naa ʋɛ ʋolu. 30 Nu niinɛiti ta ɗa ɓɔlɔ, ti lɔtɔzuleʋe,anɛɛ zunu ɠɛzɛiti ta ɗa ɓunɛ, ti loo. 31 Kɛlɛ niiti ti ɠitogai Ɠɔoɠɔ GALAGI ʋa,naati sɛbɛi ɠa ɗa niinɛ ʋolu.Ti ta-ɠoʋegi lɔɔzei eɠɛ koɠɛiti,ti ɗa ɓizɛ, ti la ɓɔlɔa pɛ,ti ɗa ziɛ, ti zuvikɛi la ɓega pɛ.