Amos 9 (TOMA)

1 Gè Maliɠii ɠaani loni zalaɠa ɠulazuʋɛ maazuʋɛ. É ɠɛni ma:«GALA sei ʋɛlɛi wu ɓɛdɛgiti ma ʋɛɛungai loɠa,kpofalagiti pɛ ti ɓali!Ti pɛ tɔungiti golo,niiti ta yɛ ʋoluzu, boɠa zɔkpɔi ɠa naati paa.Nu nɔpɛ ge la zooga ʋelazu,kɔɔlooɠoba nɔpɛ ge la ɠɛa ná. 2 Ni ta ʋelana, ti li gɔvɛalaazu,nà ti zo miná, gè ti ɠula ná.Ni mɔnɔ ta zoona, ti lɛ geeɠɔlɔgi zu, nà zɔ ti ʋa, ti yei. 3 Ta lɔɔɠuna Kaalamɛle gizei ma,nà ti ɠaiziɛ, gè ti zo.Ni ta lɔɔna kpoloɗɛi wu, nii a kɛ ti lɔɔɠu bà,nà vali kaalii ma, é li, é ti ɲi miná. 4 Ni ta liina ti zili nuiti pɔ bɛ, ti ɠɛ ga kɔɔ luɔiti,nà zobogi ve boɠa zɔkpɔi ya, é ti undaaʋili.Gàazu ɠa ti ʋa ta-maanɔɠɔ vai zu, kɛlɛ ta-undaanɛ vaa laade.» 5 Ɠɔoɠɔ GALAGI, Fai-Pɛ-Maliɠii yeevɔɔɠua zooi ʋa, naa ɓali,zooi ɠa nuɓusɛiti pɛ ta gaazuɗɛʋui zu.Zooi ɓɔɠɔi ná pɛ ka lɛ su,naa ʋoluma, é ɠula su ga Ezipete ɗɛ wolai Nile ɠɛʋele. 6 É zeizuʋɛ ɓɛtɛʋɛ geeɠɔlɔgi zu,é ná-masa pɛlɛi logɛ zooi maazuʋɛ.Toɠa ɗa kpoloɗɛi ma ɗɛiti toli,é ti ʋu ya zooi ma.Daaseigi ɠa ga Ɠɔoɠɔ GALAGI. 7 «Ee, Izilayɛle nuiti, wa zèa nɔ ga Etiyopi nuiti kɛʋele,»Ɠɔoɠɔ GALAGI wooi ɠana.«Nà lɛi gè ʋa Izilayɛle ɠula Ezipete yooi ʋa ɓaa?Wo la kwɛni ɓaa ga ʋele nɔ ɠana gè kɛɛni laga Filisiti nuiti, ti Kafatɔɔl, ta Siili nuiti, ti Kiil?» 8 Maliɠii Ɠɔoɠɔ GALAGI ɠaazu ɠa sɔba masadai tɛi ba.«Nà ʋaazu koloɠolosu, gè kula zooi ɠa.Kɛlɛ tama, gè la Zakɔɓe mavofodai zuwuɠaaleʋea tɛtɛ,»Ɠɔoɠɔ GALAGI wooi ɠana. 9 «Wɛlɛ nii gè deveai, nà Izilayɛle ʋɛlɛyeɠei ɓuɠuɓuɠusu, zii zɔiti saama,ʋelei nu ani ɠaei ɓuɠuɓuɠusu da sɛpɛgi zu.Kɔtu ɠaegi gila kpalaa ge la loa zooi ma. 10 Faa ɲɔu ɠɛ nuiti kpein ti nà-nuɓusɛiti saama,boɠa zɔkpɔi ɠa ti pɛ paazu,tɛigiti ti ɠɛɛzu ma: ‹Maanɔɠɔi la maaɓuɠaa gi ʋa,é la zeelia gi ma.› » 11 «Naama volo ná, Davide ná-kotai nii goloai, nà buzeɠe ʋolu,zeɠeiti ti wɔai ba, gè naati daaɠulu,ʋɛti náti koloɠologai, gè mináti kpɛtɛ ʋolu.Nà to ʋolu ga ma mɔungi ɠɛʋele, 12 naa ɠa a kɛ ti Edɔme mɔtai zɔlɔɔ,ta zii ɠiligi niiti kpein ti ɠɛai ga nɔ̀nɔ,»Ɠɔoɠɔ GALAGI wooi ɠana,tɔ ɠa é ʋaazu niima vaiti kpein kɛɛzu. 13 «Foloi tanigaa ta ʋaazu,molo leʋei ɠa ɓe nɔ feya, wozawolii lɔɔzei.Ta ɓe nɔ feya ga moloi woli, dɔɔ ɗɛi ɠula vai sei da.Naazu dɔɔ niinɛi ɠa ɠɛ ɠulazu gizeiti kpein ba,gize ɓufɛgiti pɛ ti maa ɠa ɓɔɔle ga dɔɔ ɗɛi,»Ɠɔoɠɔ GALAGI wooi ɠana. 14 «Nà-nuɓusɛiti Izilayɛle nuiti, niiti kpein ti duɔlai zu,nà ʋa ga tiye ʋolu.Taai niiti kpein ti ɠoloai,ta naati to ʋolu, ti zei ti zu.Ta leezɛn ɓeleiti da, ti ɗa ma lɔɔi ɓɔle.Ta kpeleiti tɛ, ti ɗa ma ɠulanumai mi. 15 Nà ti ziin ta-yooi ma,ti lɔɔ la mɔ ɠulaa eyɛsu pɛ naama yooi ma,nii gè feezu ti ʋɛ.»Ɗa-ƓALAGI, Ɠɔoɠɔ GALAGI ɠa é boga.

Amos 9 (TOMA)

In Other Versions