Ezekiel 14 (TOMA)

1 Foloi ta, Izilayɛle ɠɛwolai tanigaa ti ʋaani pɔ̀ bɛ, ti ʋu kàkala. 2 Ɠɔoɠɔ GALAGI ɓɔɛni pɔ̀, é ɠɛ mà: 3 «Ɗa ʋe, zunui, nui niiti ta-ɠɔɔɠɔ gani nɔɠɔiti ta ti ya ti-yiimaʋɛ, ti ɠaazulogɛ naa nɔ, nii é ti loozu kotoi zu. Nà va bu nɛi ga ti gàazaɠa ɓaa? 4 Naa ɠa é ba, ɓɔɛ ti ʋɔ, è ɠɛ ti ma: ‹Maliɠii Ɠɔoɠɔ GALAGI wooi ɠaa: Ni Izilayɛle nui ta a ɠɛna ná, ná-kɔɔɠɔ gani nɔɠɔiti ti ziimaʋɛ, gaazulogai naa ʋa, nii é toozu kotoi zu, é ʋa é GALA goo wo nui ɠaazaɠa, nà, Ɠɔoɠɔ GALAGI, nà ɠa nà gooɠaaʋotegi ve zea, é zoloo ná-kɔɔɠɔ gani nɔɠɔ mɔinmɔingiti tosuʋɛ ma. 5 Naa maaʋele ma, nà Izilayɛle nuɓusɛiti pɛ kigi maazɔlɔɔ ʋolu, tɛiti ti ʋoluavegai bà, ti ɠaaʋote ta-ɠɔɔɠɔ gani nɔɠɔiti ma.› 6 «Naa ɠa é ba, ɠɛ Izilayɛle nuiti ma: ‹Maliɠii Ɠɔoɠɔ GALAGI wooi ɠaa: À ʋa pɔ̀ ʋolu, wo ɠɛlɛ wa-ɠɔɔɠɔ gani nɔɠɔiti ba, à zeɠe kɔzɔba vaiti polu, wo ti ɠɛɛzu!› 7 Ni Izilayɛle nui ta ɓaa seikɔɠɔma nui ta a ɠɛna ná, ná-kɔɔɠɔ gani nɔɠɔiti ti ziimaʋɛ, gaazulogai naa ʋa, nii é toozu kotoi zu, é ʋa é GALA goo wo nui ta ɠaazaɠa, nà, Ɠɔoɠɔ GALAGI, nà ɠa nà gooɠaaʋotegi ve zea. 8 Nà wuzeɠe naama nui laalɔɠɔma, nà kɛ ga poogi, é ɗa wo faalaalii zu, nà kpeteʋe nà-nuɓusɛiti ba. Wa suɠwɛɛ naazu ga nà ɠa gè ga Ɠɔoɠɔ GALAGI. 9 «Ni GALA goo wo nui a ɓena ɓɔɠɔ ʋa é ɠaka, é ɗa ɓɔɠɔ ɓɔɛi wo, nà, Ɠɔoɠɔ GALAGI, nà ɠa gè diai kakagi ma. Nà nà-zobogi lɛɛ la, gè teʋe ga, gè kula nà-nuɓusɛiti saama, Izilayɛle nuiti. 10 Ti felegɔ pɛ ta-vaaɠaazagi ma ɠasɔi ɠa la ti unma, GALA goo wo nui, ta zɔi é ʋaazu é gaazaɠa, 11 naa ɠa a kɛ, Izilayɛle nuiti ti mina loo ya, ti ʋa maaɠooza bà, ti ʋa ɓɔɠɔ ɠɔzɔ ga ta-lɔ koloɠologiti, ti ɠɛ ga nà-nuɓusɛiti, gè ɠɛ ga ta-ƓALAGI,» Maliɠii Ɠɔoɠɔ GALAGI wooi ɠana. 12 Ɠɔoɠɔ GALAGI ɓɔɛni pɔ̀, é ɠɛ mà: 13 «Ɗa ʋe, zunui, ni zou a kotoi ɠɛɛna dàalɔɠɔma, é la ɠɛɛni bɛ̀ ga wooɠɛɠila nu, nà nà-zobogi ɠula kɛlɛma daalɔɠɔma. Nà daamianigi zɔlɔɔ pelei ɠoloɠolo ti ma, gè pului leʋe ti ma, gè nuɓusɛiti ta suaiti suwuɠaaleʋe zooi ɠa. 14 Anɛɛ ni zunu saʋagɔi niiti ta la ɠɛ ti zaama, Nowe, Daniyɛle ta Zɔɓe, naati ta-lelebodai a la tiya ɓɔɠɔi nɔ ti-yɛnvui ɠizo,» Maliɠii Ɠɔoɠɔ GALAGI wooi ɠana. 15 «Ɓaa mu ni nà sua ɲɔiti puuna ma yooi zu, ti ná zuwo, nuɓusɛi ɠula ná ʋa, zooi zu ɠɛ ga teʋebai, mazɔlɔɔ suaiti ta ná nuiti pɛ paa, nu nɔpɛ ge la mɔ zooga é ʋa zei ná, duai maaʋele ma, 16 zunu saʋagɔiti ti-laaseigi wogai, anɛɛ ni naati ta la ɠɛ ná, tiya ɠila nɔ ɠa ti-yɛnvui a la ɠizo. Eɠɛʋelei gè vulua la ga ɠite, ti la ɓena zoo ti ʋa ti ɓɔɠɔ loin taɠila kpalaa kizo, zunu ɓaa anzanu, zooi a la ɠɛ nɔ ga teʋebai zu,» Maliɠii Ɠɔoɠɔ GALAGI wooi ɠana. 17 «Ɓaa mu gè ʋa ga kɔɔi niima nuɓusɛiti daalɔɠɔma, gè deve ve ga kɔɔi laalɛ zooi wu, é koloɠolo, ti nuiti ma zuwu ɠaaleʋe ta suaiti, 18 zunu saʋagɔiti ti-laaseigi wogai, anɛɛ ni naati ta la ɠɛ ná, eɠɛʋelei gè vulua la ga ɠite, ti la ɓena zoo ti ʋa ti ɓɔɠɔ loin taɠila kpalaa kizo, zunu ɓaa anzanu, tiya ɠila nɔ ɠa ta ɠizo,» Maliɠii Ɠɔoɠɔ GALAGI wooi ɠana. 19 «Ɓaa mu ni nà ɗɔfɔ zeeɓɛi leʋena nuɓusɛiti saama zooi zu, gè nà-ziiɠaawanai yei ti ma ga saai, é nuɓusɛiti ma zuwu ɠaaleʋe ta suaiti zooi ɠa, 20 anɛɛ ni Nowe, ta Daniyɛle ta Zɔɓeni ka ta la ɠɛ ná, naati ta-lelebodai a la tiya ɓɔɠɔi nɔ ti-yɛnvui ɠizo. Eɠɛʋelei gè vulua la ga ɠite, ti la ɓena zoo ti ʋa ti ɓɔɠɔ loin taɠila kpalaa kizo, zunu ɓaa anzanu,» Maliɠii Ɠɔoɠɔ GALAGI wooi ɠana. 21 «Mazɔlɔɔ Maliɠii Ɠɔoɠɔ GALAGI wooi ɠaa: ‹Gè faa ɓɔi naanigɔ zeini Zeluzalɛme ma, kɔɔi, ta pului, ta sua ɲɔiti, naa ʋɛɛ ɗɔfɔ zeeɓɛi ʋa, ga é nuiti ma zuwu ɠaaleʋe ta suaiti. 22 Anɛɛ naa ʋe tanigaa nɔ ɠa ta yɛ vulua zunuiti su ta anzanuiti. Ta ti ɠulana taai ʋa, ta ʋa wo ʋɔ bɛ. Siɛgi zu wo ti-ziɛ ʋelei ɲɔi ʋɛtɛsu da, ta ti luʋa ʋelei ɲɔi, wa ɓɔɠɔ ɠaanɛɛnɛ é ʋilɛ maanɔɠɔi ʋa, nii gè seini Zeluzalɛme ma, ta fai nii kpein gè daani ma. 23 Wo-yii ɠa la názu, siɛgi zu wa ti-ziɛ ʋelei ta ti luʋa ʋelei ɠaana la, wa suɠwɛɛ naazu ga nii kpein gè kɛɛni ga taai tɛi, gè la ɠɛni kɛɛni wafuun,› » Maliɠii Ɠɔoɠɔ GALAGI wooi ɠana.

Ezekiel 14 (TOMA)

In Other Versions