Ezekiel 14 (YAPE)

1 Boch e girdi’ nma yog e thin nu Israel e rabad ra fithed ngog ko mang lanyan’ SOMOL. 2 Ma aram me non SOMOL ngog. 3 Ni ga’ar, “Fak e girdi’, pi pumo’on ney e kar m’onaged e liyos u wan’rad kemang liyos e be waliyrad nga fithik’ e denen. Ere yad be leamnag ni gu ra non ngorad? 4 “Mu non e chiney ngorad ngamog ngorad e n’en ni Gag fare SOMOL ni Th’abi Tolang e gu be yog ngorad: Arorad yu Israel nike m’on e liyos u lanyan’ kemang liyos e be waliy i yan ko denen, ma be yib i fith lanin’ug ngak reb e profet, e fulweg rog ngak — e fare fulweg nib m’ag ni nge aw ngak e pi liyos. 5 Gubin fapi liyos ni kar pingeged yu Israel kar pi’ed keru’rad ngog, machane gu be athapeg ni fulweg rog e ra sulweg lanin’rad ngog. 6 “Ere chiney, e ngamog ngak yu Israel ni Gag fare SOMOL ni Th’abi Tolang e gu be ga’ar: Mu kalgad ngan’med mu sulod mi gimed pag e pi liyos romed ni sunsonogor. 7 “Ngiyal’ i n’en nra cheal be’ nu Israel ara be’ nu bang nma par u fithik’ yu Israel nga orel rog nge meybil ko fapi liyos, me yan nga reb e profet ni nge fith lanin’ug, ma Gag SOMOL, e bay gu pi’ e fulweg rok! 8 Bay gu togopluw ngak, mu gu tay nib fanow ngak e girdi’. Bay gu chuweg u fithik’ e girdi’ rog, ya ngam nanged ni Gag SOMOL. 9 “Fa’anra ni bannag reb e profet nge pi’ e fulweg ni de riyul’, ma bochan e Gag SOMOL e kug ban nagrad. Ma bay gu chuwegrad u fithik’ e girdi’ nu Israel. 10 Fare profet nge en nike yib ngak ni ngan fanownag e ta’ab gechig e ra aw ngorow. 11 Bay gu rin’ e ren’ey ni nge duwgiliy yu Israel ni dab ra paged gag ngar alit niged yad ko pi denen rorad. Ya ngar manged girdi’ rog, mu gu mang Got rorad.” I SOMOL ni Th’abi Tolang e keyog e pi thin ney. 12 I SOMOL e non ngog, 13 ni ga’ar, “Fak e girdi’, fa’anra i denen reb e nam ni dabki yul’yul’ ngog, ma bay gu k’iyag pa’ag nggu gathay e gin ma yib e ggan riy ngorad. Mu gu pi’ e uyngol nge li’ e girdi’ nge gamanman ni ta’reb rogon. 14 Fa’an mang e i par fa dalip i pumo’on ni Noah, Danel, nge Job u rom, ma farad mat’aw e go’ yafos rorad e ra ayweg.” I SOMOL ni Th’abi Tolang e keyog e pi thin ney. 15 “Ara gol’oeg e gamanman ni malboch nge thang e pogofan ko girdi’, nge par fare binaw nib kandugwen ndakriy be’ nra milekag u langgin, 16 ni ku ra manga ku be par fa dalip i pumo’on u rom — ma bod feni muduwgil ni Gag fare SOMOL ni Th’abi Tolang, me Gag fare Got ni gu ma par ni gubfos — ma mus nga pifakrad ma dabyag ni ngar aywegned. Kemus ni pogofan rorad e yad ra ayweg, ma fare binaw e ra par nike m’ay girdi’en nike kireb. 17 “Ara ggirngiy e mael nga daken fare nam mu gu l’oeg talin e cham nib almarin nge thang mit e girdi’ nge gamanman ni ta’ab rogon, 18 ni kumang e i par fa dalip i pumo’on u rom — ma bod feni muduwgil ni Gag fare SOMOL ni Th’abi Tolang, ni fare Got nma par nib fos — ma ri dabyag rorad ni ngar aywegned pifakrad. Farad fel’ e kemus ni go’ pogofan rorad e ra ayuweg. 19 “Fa’an gu ra pag e liliy nga daken fare nam mug fek bukum e pogofan u fithik’ e damumuw rog, mug li’ e girdi’ nge gamanman, 20 mus ni fa’an mang e ku ma par Noah, Danel, nge Job u rom — ma bod feni muduwgil ni Gag fare SOMOL ni Th’abi Tolang, me gag fare Got ni gu ma par nib fos — ma mus nga pifakrad ma dabyag ni ngar aywegned. Farad mat’aw e go’ yafos rorad e ra ayweg.” 21 Irera’ e n’en ni be yog SOMOL ni Th’abi Tolang: “Bay gu pi’ aningeg e gechig ni th’abi gel nga daken yu Jerusalem — ni aram e mael, uyngol, gamanman ntacham, nge liliy ni nge thang mit e girdi’ nge gamanman ni ta’reb rogon. 22 Fa’anra magach be’ nib fos nge ayuweg pifak, ma ngam faleg’ i yaliyrad e ngiyal’ ni yad ra yib ngom, ngam guy feni kireb e leam rorad, me mich u w’unum ni re gechig nem ni ku gu fek nga daken yu Jerusalem e ba mat’aw; 23 ma aram e bay mu nanged ni bay tapgin ni bfel’ urngin e tin ku gu rin’.” I SOMOL ni Th’abi Tolang e keyog e pi thin ney.

Ezekiel 14 (YAPE)

In Other Versions