Ezekiel 26 (TOMA)

1 Kona puugɔ maazu ɠilasiɛi (11), ma alugi ma volo mɔungi, Ɠɔoɠɔ GALAGI ɓɔɛni pɔ̀, é ɠɛ mà: 2 «Ɗa ʋe, zunui, tɔɔzei Tiil nuiti ti ɲɛɛɠulani Zeluzalɛme zu, ti ɗa ɠɛ ma: ‹A kela-o! É ɠoloɠologa, taa wolai ɛsɛ pɛ ge ɠɛni liizu pɔ! Tosuʋɛ ɠa ve niina gi ya, gá ɓɛtɛ niinɛ ʋolu, Zeluzalɛme zuwoga!› 3 Tama, Maliɠii Ɠɔoɠɔ GALAGI wooi ɠaa: ‹Nà ʋaazu wuzeɠezu è laalɔɠɔma, Tiil taa wolai. Nà nuɓusɛ ʋɛbɛi wuzeɠezu è laalɔɠɔma eɠɛʋelei kpoloɗɛi a ɗa ma lakpatakpagiti buzeɠe la. 4 Ta Tiil ziɠigiti golo, ti ná-pɛlɛ ɠaaɠoozagi toka. Nà ma vufiligiti pɛ kpale, gè ná-kɔtui maaɲakai yɛ de. 5 Toɠa ɠɛ niina ga ziɛ zaama yooi nɔ, ʋɛ kale ɓɛɛ nuiti ta ɠɛ ta-lumɔiti fɔɔzu ná, mazɔlɔɔ nà ɠa gè boga,› » Maliɠii Ɠɔoɠɔ GALAGI wooi ɠana. « ‹Zii ɠiligiti ta ʋa, ti loo taai zu. 6 Taa wolai niiti ti è-maaɠoolii zu, ti logai ziɛlaʋɛ, toɠa naati su nuɓusɛiti paa. Ta suɠwɛɛ naazu ga nà ɠa gè ga Ɠɔoɠɔ GALAGI. 7 « ‹Maliɠii Ɠɔoɠɔ GALAGI wooi ɠaa: Nà ʋaazu ga Ɓaɓilɔne masagi Neɓukadenɛzaal, Tiil taai laalɔɠɔma, masagi ná-zobogi wɔɔlɔai masagiti ta-zobogi ʋa, gè zeɠe la lɛkpɛmaʋɛ nu ɠɔʋɛzu ʋelei. Toɠa ʋa, é laalɛ è wu ga sooiti ta kɔɔɠɔ wotoloiti, ta soo ɓizɛ zalaʋusuiti, ta salaʋusu ɓulugiti. 8 Taa wolai niiti ti è-maaɠoolii zu, ti logai ziɛlaʋɛ, toɠa naati su nuɓusɛiti paa, é kɔɔɠɔ yeɠeiti bɔ è laalɔɠɔma. Toɠa kɔɔɠɔ ziɠigiti kpɛtɛ ta é kɔɔɠɔ ɠɔlu zɛpɛgiti to ga siɠigi è laalɔɠɔma. 9 Ta ɗa-ziɠigiti golo ga ta-ɠɔɔɠɔ zɔɔlaiti, ta ɗa-ʋɛlɛ ɠaaɠoozagiti toka ga ta-ʋekasiiti. 10 Ná-soo ɓulugiti ta-vufili buzeɠeai ɠa ʋɛɛ è unga, é è maaɓɔle, soo ɓulu kɛɛ nuiti ta kɔɔɠɔ wotoloiti su lugi ɠa ɗa-ziɠigiti ɲiikpi, siɛgi zu ti lɛɛzu la ɗa-ziɠidaʋɛti, eɠɛʋelei nu a taai zei la kɛlɛ su é zeɠe wɔ siɠigi ʋa, é leʋe su é ɗa lɛ taai zu. 11 Ta ziɛ ga ta-zooiti ɗa-laazuʋɛ ná pɛ, ta ɗa-nuɓusɛiti paa ga boɠa zɔkpɔi, ɗa-ɠɔtu ziɠigiti ti loni ga ɗa-zobogi ma ʋoogi, ta naati suvaza zooi ma. 12 Ta ɗa-naavoloiti seɠe, ti loo è-ɠɔligiti su, ti siɠigiti golo ɗa-laaiti ma, ti ɗa-ʋɛlɛ ʋagɔiti golo, ta ɗa-ɠɔtuiti pili ya kpoloɗɛi wu, ta ɗa-wulu zɛʋɛiti, ta ɗa-vufiligiti. 13 Nà è ɓesu ɗa-wuye loo vaiti ba, nu la mɔ ɗa-ɠɔni goomɛniga. 14 Nà è ɠɛ ga kɔtui maaɲakai, nii kale ɓɛɛ nuiti ta ɠɛ ta-lumɔiti fɔɔzu maazu, è la mɔ loga ʋolu eyɛsu pɛ. Mazɔlɔɔ nà, Ɠɔoɠɔ GALAGI, nà ɠa gè boni,› » Maliɠii Ɠɔoɠɔ GALAGI wooi ɠana. 15 «Maliɠii Ɠɔoɠɔ GALAGI wooi ɠaa Tiil taa wolai ma: ‹È loo lugi a ɠɛna ɠulaa, siɛgi zu nuiti ti saamaaɠɔgi wosu da, siɛgi zu nu ʋaai ɠɛɛzu la taa zaamaʋɛ, ziɛ zaama yooiti ta kpoloɗɛi laaʋɛ yooiti ti la ɲiikpiga ɓaa? 16 Kpoloɗɛlaʋɛ masagiti kpein ti ʋilɛ, ti zeɠe ta-masa kpɔkpɔgiti ga, ti ta-zeɠeungiti kula ɠɔba, ti ɠula ta-zeɠe ɠɔsuʋugiti su, ti ɓɔɠɔ maaɠili ga dualuagi, ti zei zooi ma, yeeɠɛɠalai pɛ su ti zasu ɗa ɓali, ti lua ʋelei ma ɗa-vaa zu. 17 Ta maawɔin wuyei nii loo è ma, ti ɠɛ ma:Ee, tooʋɛ bu ɠale,ɗɛi kpoloɗɛi ɠaa leʋe bo nuiti ti ɠɛni è maamɔinzu,tɔɠɔɠula taa wolai, ná-zobogi ɠɛni kpoloɗɛi ɠa,ta ná-nuɓusɛiti,nii ɠɛni maaɠoolii zu nuiti sasuɓalizu! 18 Ziɛ zaama yooiti sasu ɠa ɓali niina,naama voloi è ɠoloɠolosu da.Kpoloɗɛi zaamaʋɛ yooiti ta lua golayeei ɗa-vaiti ti ɓesu da. 19 « ‹Maliɠii Ɠɔoɠɔ GALAGI wooi ɠaa: Siɛgi zu gè è ɠɛɛzu la ga taa wolai koloɠologai, eɠɛ taa wolai naati nu la mɔ ti zu, siɛgi zu gè è lɔɔɠuzu la pali ɓomaʋɛ, ziɛ wolaiti ti è maaɓɔle, 20 nà yeizu ga ɗe naati pɔ bɛ, niiti ti yeiɗai zeɠezaɠai zu, wɔlɔwɔlɔ nuɓusɛiti pɔ bɛ, ɗa yɛ zeini zooi wu eɠɛ puulega ɠɔtu wɔlɔwɔlɔgiti ti zooi wu, wo ɠɛ ʋa wa gɔvɛiti ti liini è luɠɔ. È la mɔ ɠɛa ga taa nu a zei su, è la mɔ ʋuuzu zɔlɔɔga nu vuluiti ta-yooi ɠa. 21 Ɗa-vai ɠa nuɓusɛi pɛ maalua, mazɔlɔɔ ɗa ɠoloɠolo mɛtu. Nuiti ta è ɠaiziɛ, kɛlɛ ti la è ɠa mɔnɔ pɛ,› » Maliɠii Ɠɔoɠɔ GALAGI wooi ɠana.

Ezekiel 26 (TOMA)

In Other Versions