Ezekiel 26 (YAPE)
1 Rofen ni som’on ko pul, ko bin ragag nge ta’reb e duw ni gamad ba kalbus, me non SOMOL ngog. 2 Ni ga’ar, “Fak e girdi’, irera’ e n’en ni be felfelan’ e girdi’ nu lan e binaw nu Tyre ngay. Yad be tolul ni be lungrad, ‘Ke puth yu Jerusalem! Dakuriy gelngin ko siyobay! Dakriy e ngiyal’ nra magawon nagdad.’ 3 “Ere chiney, e ba’aray e n’en ni Gag SOMOL ni Th’abi Tolang e gu be yog: I gag e to’ogor rom, gur fare binaw nu Tyre. Bay gu fek bo’or e nam i yib nge cham ngom, ni bay rabad ni bod e n’ew u maday. 4 Bay ra gothgotheyed e rungrung ko binaw rom miyad buthug nga but’ e pi wulyang ni tafen e damit riy. Ma aram e bay gu walguy nge chuw gubin e fiyath nggu pag ni ta’ab malang ni dakriy ban’en u daken. 5 Pi ta fita’ e bay ur gilk’aded e nug rorad u daken, u rom ko gin ba suwon riy u lan e day. I Gag SOMOL ni Th’abi Tolang e gu be non. Ma fapi nam e bay ra feked e chugom rok yu Tyre u yargal, 6 ma saydon rorad e bay ra chamgad ngay ngar li’ed e pi’in nma par ko yochi binaw u dap’el’ay. Ma aram e bay ra nanged ni Gag fare SOMOL.” 7 I SOMOL ni Th’abi Tolang e be ga’ar, “Bay gu fek i yib ba pilung ni ir e th’abi gel gelngin u fithik’ uringin e pilung ni Nebukadnezzar nu Babylonia — ni nge mael nga Tyre. Bay i yib u lan e lel’och nib mu’un barba i salthaw ngak nib ga’, nge os nge chariot, nge girdi’en e yan u os. 8 Pi’in yad ma par u lan e yochi binaw u dap’el’ay e bay ram’ad u fithik’ e mael. Pi to’ogor e bay ra kired e lra’ ngar ubunguyed e but’ riy, miyad ngongliy e rungrung nib gel ni nge mang rungrung rorad. 9 Bay ra buthuged e yungi rungrung rom ko ren ni fen e buth rungrung miyad buthug nga but’ e wulyang ni tafen e damit rom nga yulay i wasey. 10 Pi os rorad nib yo’or e bayi pug e fiyath ngalang ni bod bang i manileng ni tharaymed. Ma lingan e os rorad ni be girengiy e waygon nge chariot e bay i rurug e rungrung romed ko ngiyal’ ni bay rabad u langan e garog ko fare binaw nike mogothgoth. 11 Pi girdi’en e yan u os e bay ra thelapgad u daken e yupa’ i kanawo romed’, miyad li’ e girdi’ romed ko saydon rorad. Pin’en nib gel ni kam suweged ngalang e bay ron’ed nga but’. 12 Pi to’ogor romed e bay ra feked gubin e machaf romed nge pin’en ni gimed ma pi’ ni chuway’. Bay ra buthuged nga but’ e pi rungrung romed miyad bilig e pi naun romed ni fafelel’. Bay ra feked e malang nge ren nge gubin chabungen nga non’ nga maday. 13 Ma bay gu taleg e pi tang ni gimed ma yin’, mu gu m’aynag lingan e musik romed ni harp. 14 Bay gu pag ta’ab malang u but’ ndariy ban’en u daken ni aram e gin bay i gilk’ad e pi tafita’ e nug rorad riy. Fare binaw e dariy bi’id ni ku yira ubung. I Gag SOMOL ni Th’abi Tolang e gu be non.” 15 Fare SOMOL ni Th’abi Tolang e ba’aray e n’en ni yog ko fare binaw nu Tyre: “Nap’an ni bay ni kolem, ma girdi’ ni yad ma par u dap’elay e bay ra digowgad nga laman e gogo’ ko pi’in ni yibe thang e fan rorad.” 16 Gubin e pilung ko pi nam u dap’el’ay e bay ra luwgad nga but’ u tagil’rad. Bay rabad ra lufed e thal ni wuru’ e mad rorad nge mad rorad ni kan sisyunag miyad par nga daken e but’ ni yad be t’on. Bay ra pired nike puw e marus rorad ko n’en nike buch rom miyad par ni dabkiyag ni ngar talgad ko t’on. 17 Bay ron’ed e re daloloy’ ni ba’aray ni fan ngom:Fare binaw nib gilbugwan e ke mogothgoth!Pi barkow riy e kan wolguy ke chuw u maday.Girdi’ ko re binaw ney e ur gagiyeg niged e dayngu’ur k’aringed e marus ko gubin e pi’in ni ur pired u dap’el’ay. 18 Machane chiney nike mogoth yu Tyre,e pi donguch u maday e be durru’,e girdi’ riy e kar ngatgad ko binem e riya’.yad be dada’ ko marus.” 19 I SOMOL ni Th’abi Tolang e be ga’ar: “Bay gu tem ni dakriy e fel’ rom ni bod e binaw nike mogothgoth ni dakriy be’ nma par riy. Bay gu thareyem ko day u t’ay e regur. 20 Ma aram e bay gu l’oegem nga’ar ko fayleng ko yam’ ngam pired fapi girdi’ ni urmed kakrom. Bay gu tem u rom ko fare fayleng u tan e but’ u fithik’ e tin ke mogoth ni dariy n’umngin nap’an, ni nge mang gimed e pi’in ni karm’ad e ngu’um puruy’gad. Ma aram ma ga par ni gab binaw ni dakriy be’ riy ma dabkiyag ni ngam sul ko gin ummoy riy ko fayleng rok e pi’in nib fos. 21 Bay gu tem ngam mang ba pow ko marus, ma aram ma ga mus u rom. Bay i changar nigem e girdi’ ma dab kun pir’egnem bi’id.” Fare SOMOL ni Th’abi Tolang e be non.