Ezekiel 30 (TOMA)

1 Ɠɔoɠɔ GALAGI ɓɔɛni pɔ̀, é ɠɛ mà: 2 «Ɗa ʋe, zunui, GALA gooi wo, è ɠɛ ma:‹Maliɠii Ɠɔoɠɔ GALAGI wooi ɠaa:À kpeei loo, wo ɠɛ ma: Ee! Foloi ma ɓɛgele ɠaa! 3 Mazɔlɔɔ foloi maa ɠa na ɓuɠa,Ɠɔoɠɔ GALAGI ná-foloi maaɓuɠaa,folo ʋe é ɠɛɛzu ga tonaɓiin tetelegi,toɠa ga yeeɠɛɠalainii zɔɔma nuɓusɛiti ta-lukpɔi ɠaa ʋaazu leʋezu ma. 4 Kɔɔi ɠa ɓɔi Ezipete yooi zu,nuiti ta ɠɛ luazu, ti zasu ɗa ɓali Etiyopi,siɛgi zu nu ʋoomaiti ti ʋuuzu la Ezipete,ta ɠɛna loa ti-ɠɔligiti su,ti ɗa ta-yooi ɠoloɠolo. 5 Etiyopi, ta Pute, ta Lude, naa ʋɛɛ nuɓusɛ zupui naati pɛ ba, Liɓi ɓalaa,ta nuɓusɛiti ti zooiti su ti yeezogai,ta za ga boɠa zɔkpɔi ʋɔɔma ta Ezipete nuiti. 6 Ɠɔoɠɔ GALAGI wooi ɠaa:Ezipete maalobo nuiti ta za kɔɔi zu,Ezipete ná-zobogi é wasosu da, gaa ɠa ʋala ba,é zo Migedɔle, é li Siyɛne, ta loo bu ga boɠa zɔkpɔi,Maliɠii Ɠɔoɠɔ GALAGI wooi ɠana. 7 Ezipete ɠa ɠɛ ga teʋebai zu, é leʋe teʋebai zu yooiti pɛ ba,ná-taaiti gaa ɠa luu taaiti saama ti ɠoloɠologai. 8 Ta suɠwɛɛ naazu ga nà ɠa gè ga Ɠɔoɠɔ GALAGI,siɛgi zu gè abui losu da Ezipete ʋa,ná-kpɔba nuiti pɛ ti zuɠoloɠolo. 9 Naama voloi, keelaiti nà ti leʋe, ta li ɓatoi zu,ti Etiyopi ɲiikpi, ná-ziilɛigi ɠula zea,ti zasu ɠa ɓali, ta ɓɔlɔ,voloi gè ʋaazu Ezipete ɠoloɠolosu da.Mazɔlɔɔ wɛlɛ, toɠa na ʋa! 10 Maliɠii Ɠɔoɠɔ GALAGI wooi ɠaa:Nà Ɓaɓilɔne masagi Neɓukadenɛzaal zeɠe,gè Ezipete ʋɛbɛi ma zuwu ɠaaleʋe la. 11 Tɔ-o, ná-nuɓusɛiti-yo,zunuiti ti ga nu ʋaa nu wolaiti ziiti saama,ta ʋa, ti zooi ɠoloɠolo.Ta ta-woɠa zɔkpɔi ʋili Ezipete laalɔɠɔma,ti zooi zulaave ga nu ʋoomai. 12 Nà ziɛ wolai Nile ma ɓekegiti fɔ su,nà Ezipete yooi ʋɔdi nu ɲɔiti ma.Nà zobo fe wɛɛinti bɛ, ti zooi ɠoloɠolo ta gaa aniiti.Nà, Ɠɔoɠɔ GALAGI, nà ɠa kpɔ̀ɛai. 13 Maliɠii Ɠɔoɠɔ GALAGI wooi ɠaa:Nà kɔɔɠɔ gani nɔɠɔiti koloɠolo mɛtu,gè zɛɛ ɠalagiti ta-vai zeɠe ga Mɛmefise.Kundiɠi la mɔ ɠɛa Ezipete yooi zu eyɛsu pɛ.Nà dualuagi lɔ ɛsɛ pɛ su Ezipete yooi zu. 14 Nà Ezipete yooi ɠoloɠolo lɛkpɛmaʋɛ nu yeezazu ʋelei,gè abui lo Soan taa wolai ʋa,gè tukpɔi laalɛ No taa wolai wu. 15 Nà yiiɠula Sin laalɔɠɔma, Ezipete ná-poluzeigi,gè No nu mɔinmɔingi ɠaaleʋe. 16 Nà abui lo Ezipete yooi ʋa,Sin nuiti sasu ɠa ɓali ga taɓai.Zeɠei ɠa wɔ No siɠigi ʋa,Mɛmefise taa wolai ɠa zo kɛlɛmaʋɛ. 17 Won nu niinɛiti ta Pi-Bezɛte geleitita za kɔɔmaʋɛ ga boɠa zɔkpɔi,ma laaiti ta li duɔlai zu. 18 Foloi la toa Taapanɛse,siɛgi zu gè Ezipete ná-zobogi zuɠoloɠolosu da,gè ná-wasogi ɠula ba é ɠɛni su.Tonaɓiingi ɠa ʋɛɛ Taapanɛse maazu,ná-taaʋeaiti ta li duɔlai zu. 19 Nà Ezipete lukpɔɠaaleʋezu.Ta suɠwɛɛ naazu ga nà ɠa gè ga Ɠɔoɠɔ GALAGI.› » 20 Kona puugɔ maazu ɠilasiɛi (11) ma alu mɔungi ma volo lɔfelasiɛi ma, Maliɠii Ɠɔoɠɔ GALAGI ɓɔɛni pɔ̀, é ɠɛ mà: 21 «Ɗa ʋe, zunui, gè Ezipete masagi Falaɠɔn yeei ɠaleni, gaa la ɠilini é ʋa ʋalo, é la laani kpazavɛlɛa zu, nii a kɛ é zɛbɛ zɔlɔɔ, é zoo é boɠa zɔkpɔi ʋili. 22 Maliɠii Ɠɔoɠɔ GALAGI wooi ɠaa: ‹Nà wuzeɠezu Ezipete masagi Falaɠɔn laalɔɠɔma. Nà zee felegɔiti galeɠalezu, é la nɔ ga zɔi galeai, kɛlɛ ma ʋagɔi ɓalaa, gè ná-boɠa zɔkpɔi ɠula zea, é loo. 23 Naazu nà Ezipete nuiti faza zii ɠiligiti saama, nà ti zuvaza zou mɔinmɔin kiligaa zu. 24 Nà ta ɓɔ Ɓaɓilɔne masagi ná-zobogi ʋa, nà, nà ɓɔɠɔi nà-boɠa zɔkpɔi la zea. Falaɠɔn nii gè zeei zuɠaleɠalezu, toɠa yɛ ɓalasu zili nui ya, eyɛsu é za. 25 Ungo, nà zobogi ve Ɓaɓilɔne masagi ya, kɛlɛ Falaɠɔn yeei zu ɠa ɓɔlɔ. Ta suɠwɛɛ naazu ga nà ɠa gè ga Ɠɔoɠɔ GALAGI, siɛgi zu gè nà-boɠa zɔkpɔi laazu la Ɓaɓilɔne masagi ya, é ɗa pili Ezipete yooi laalɔɠɔma. 26 Nà Ezipete nuiti faza zii ɠiligiti saama, nà ti zuvaza zou mɔinmɔin kiligaa zu. Ta suɠwɛɛ naazu ga nà ɠa gè ga Ɠɔoɠɔ GALAGI.› »

Ezekiel 30 (TOMA)

In Other Versions