Genesis 34 (TOMA)
1 Yeeta, Lea ná-doun anzanui Dina, nii é sɔlɔɔni Zakɔɓe ʋa, naa ɠa é ɠulani zooi zu anzanu loungoiti pɛtɛ fai ma. 2 Zou ɠundiɠii Ɠeve nui Ɠamɔɔl ná-doun zunui Sikɛme kaani, é vala ba, é ma ɓea zeɠe. 3 É ɠilini Zakɔɓe ná-doun anzanui Dina ʋa ga zii pɛ. Anzalopoi nɛɛni bɛ, é ɓɔɛni naa ʋɔ ga é kigi lati. 4 Sikɛme ɠɛni kɛɛɠɛ Ɠamɔɔl ma: «Anzalopoi nii ɠaiziɛ bɛ̀ ga anza.» 5 Zakɔɓe mɛnigai ma ga é ɓaaɠulaʋɛ ná-doun anzanui Dina ma, tɛi ná-doun zunuiti ti ɠɛni dɔɓɔi zu ga ná-togani ɓulugi, é maaɠɛni kpɔ, eyɛsu ti ʋa. 6 Sikɛme kɛɛɠɛ Ɠamɔɔl liini, é ɓɔɛ Zakɔɓe ʋɔ. 7 Naa laa yɔɠɔzu, Zakɔɓe ná-doun zunuiti ti ʋaani, ti zeɠe dɔɓɔi zu. Ti mɛnigai ma, ti yiiɠaawanani, ti yiiɠula, tɔɔzei Sikɛme kɔzɔba vai ɠɛɛni Izilayɛle nuiti saama, daa vai zu ga Zakɔɓe ná-doun anzanui, nii maa la nɛɛni ga é ʋa ɠɛ. 8 Ɠamɔɔl ɓɔɛni ti ʋɔ, é ɠɛ ti ma: «Wo-loun anzanui wola nɛɛʋɛ dòun zunui Sikɛme ʋɛ, nà wo maanɛɛnɛzu ga wo fe bɛ niina ga anza. 9 À ɠili gi ʋa vulu vai zu, wo ɗa wo-loun anzanuiti fe gi ʋɛ, wo ɗa gɔnɔiti seɠe. 10 Wa zei gi zaama, zooi laa ɠa lao wo luɠɔ ga wo zei ná, wo wa-wotii ɠɛ su, wo ná tanigaa ɠeya ɓɔɠɔ ʋɛ.» 11 Sikɛme ɠɛni anzanu loungoi kɛɛɠɛ ta diɛni ma: «À niima vaaɓɔɠɔi ɠɛ bɛ̀, nà naa ve wo ya, nii wa bona ga gè fe. 12 À kàkala la ga vulu anii, nii bɔɔlɔai, ta faaɓɔɠɔ ani mɔinmɔin, nà naa ve, nii wa bo mà, kɛlɛ à va bu ga anzalopoi ɠɛ ga ànza.» 13 Zakɔɓe ná-doun zunuiti ti Sikɛme ta kɛɛɠɛ Ɠamɔɔl wooɠaaʋoteni ga keleɠele, tɔɔzei é ɓaaɠulani ti-ʋaazeelai Dina ma. 14 Ti ɠɛni ti ma: «Faa ɠana, nii gi la zooga gi ʋa kɛ, ga gi gi-ʋaazeelai ve zunu ʋɛ, nii é la latini pɛlɛʋolu, mazɔlɔɔ toɠa ɠɛ ga ɓaaɠulama vaa gi ʋɛ. 15 Gá va niima vai wu, kɛlɛ kɛni wa ɠɛna ga gi ɠɛʋele, ga wo zaama zunuiti kpein ti lati pɛlɛʋolu. 16 Naazu, gá gi-loun anzanuiti fe wo ya, gi wo-loun anzanuiti seɠe ʋɛ, gá zei wo zaama, ade ɠɛ ga nuɓusɛ ɠila. 17 Kɛlɛ ni wo la vaani tatipɛlɛʋolu vai wu, gi bogai, gá gi-ʋaazeelai zeɠe, gi li.» 18 Ɠamɔɔl ta Sikɛme ti yeezeini naama wooiti bu, ti boni. 19 Zunu loungoi la ɠɛni suɠoozani, é naama vai ɠɛ, nii ti boni, mazɔlɔɔ é ɠɛni Zakɔɓe ná-doun anzanui ʋɔ. Toɠa ti ɠɛni woilosu goo ma gola kɛɛɠɛ ʋɛlɛi wu. 20 Ɠamɔɔl ta ná-doun zunui Sikɛme ti liini taa ziɠidaʋɛ, ti ɓɔɛ ɠani ta-laazu nuiti pɔ, 21 ti ɠɛ ma: «Nui niiti ta ga ziilɛi bea ade letegi, de va bu, ti zei zooi zu, ti ɗa suɠani ɠaiziɛ, wɛlɛ zooi zuwɔɔlɔʋɛ ta-vaa zu, naati kpein nɔ. Da ti-loun anzanuiti sei, de dɔnɔiti fe ti ya. 22 Kɛlɛ zunui naati ti la vaa bu, ti ʋa zei ade zaama, de ʋa ɠɛ ga nuɓusɛ ɠila, kɛni ade zaama zunui kpein ge lati pɛlɛʋolu, eɠɛʋelei tiya ɓɔɠɔi ti la, ti latigai da pɛlɛʋolu. 23 Ta-logani ɓulugiti, ti-yeaɠɔligiti ta ta-loganiiti kpein ti la ɠɛa ga dɔnɔ ɓaa? Ade yeezei nɔ ta-levei wu, nii a kɛ ti yɛ ade ʋa.» 24 Niiti kpein ti ɠɛni taa ziɠidaʋɛ, ti Ɠamɔɔl ta ná-doun zunui Sikɛme wooi mɛni, ti yeezeini ti-wooi wu. Taazuʋɛ zunuiti kpein ti latini pɛlɛʋolu. 25 Foloi zaʋasiɛi ma, siɛgi zu ti ɠɛni taɓai zu la, Zakɔɓe ná-doun zunu felegɔiti Simiyɔn ta Levi, Dina diɛiti, ti ta-woɠa zɔkpɔiti seɠeni, ti loo taai zu, ʋɛ ziilɛigi ɠɛni ná, ti zunuiti kpein paa. 26 Ti Ɠamɔɔl ta Sikɛmeni ɓalaa paani ga boɠa zɔkpɔi, ti lɛ, ti Dina ɠula Sikɛme ná-pɛlɛi wu, ti ɠula ná ʋa. 27 Zakɔɓe ná-doun zunui zɔiti ti ʋaani, ti nu ʋoomaiti zeaɠɔligiti seɠe, ti taazuʋɛ zɔɔlaiti seɠe, tɔɔzei ti ɓaaɠulani ti-ʋaazeelai ma. 28 Ti togani goiti ta ma wolaiti seɠeni, é ʋɛɛ soovalegiti ba, nii kpein nɔ é ɠɛni taazuʋɛ, ta ɓalaɠaiti su. 29 Ti liini ga ta-naavoloiti kpein, ta ti-lointi, ta ti-anzaiti, ta nii kpein é ɠɛni pɛlɛiti bu, ti naati kpein seɠeni. 30 Zakɔɓe ɠɛni naazu Simiyɔn ta Levi ma: «Wa kpɔ̀lɔzu, wo màayoseɠe zooi zu nuɓusɛiti bɛ, niiti ti ga Kanaan nuiti, ta Felɛze nuiti. Nuɓusɛ go nɔ ɠa é zèa, ta ʋaazu ɠaalɛɛzu ba dàalɔɠɔma, ti kɔɔi ʋɛɛ bà, ti kòloɠolo, nà-o, nà-pɛlɛyeɠei-yo.» 31 Ti gooɠaaʋoteni, ti ɠɛ ma: «Lee vaa zu gá gi-ʋaazeelai yɛ ná, ti so eɠɛ koloɠolo anzanu?»