Genesis 34 (YAPE)
1 Reb e rran, e Dinah ni bochi pin ni fak Jakob nge Leah, e yan ni nge mda’nag boch e ppin nu Kanaan. 2 Nap’an ni guy Shechem, nib pagel ni fak Hamor ni ir e ba ga’ lungun ko Hivite, Dinah me yan i kol nge moleg u gelngin. 3 Me pir’eg rok ni ba’adag Dinah ma ke t’uf rok me guy rogon ni ngki magan’ Dinah ngak. 4 Me yan i yog ko chitmangin ni Hamor ni be ga’ar, “Gub adag ni ngam fek Dinah nggu le’engiy.” 5 Me rung’ag Jakob ni kan m’aynag fan Dinah ni fak, ma ngiyal’in’em e fapi pagel ni fak e yad bay ko gin bay e gamanman rok riy, ere de rin’ ban’en ngay nge taw nga nap’an ni kar sulod nga tabinaw. 6 Me yan Hamor ni chitamngin Shekem nge yan i non ngak Jakob, 7 ma aram e ngiyal’ nike taw fapi pagel ni fak Jakob ni karbad ko fa yung i flang. Ma fa’an rrung’aged e n’en’ nike buch, mri dada’ lanin’rad ngay ma kri kireb u lanin’rad nike rin’ Shekem ban’en ni aram rogon nib yaba’ ngak piyu Israel ko ran’em ni kan kol fak Jakob ni bpin u yargal. 8 Me ga’ar Hamor ngak Jakob, “I Shekem ni fakag e ke par fakam nga taban lanyan’; are wenig ngom mu pag nge le’engiy fakam. 9 Ere nge m’agan’dad ngay; ni nge par ngi i mabgol e gal ke girdi’ rodadney. 10 Ma aram me yag ni ngam pired romad u roy ko binaw romad; me yag ni ngam mel’eged e gin ngam pired riy ni gimed ba’adag, mu um falchuway’gad nib puf rogmed me milsuwon bang e binaw ngomed.” 11 Me ga’ar Shekem ngak e chitmangin Dinah nge pi walagen ni pumo’on, “Wenig ngomed, mu faned lanin’ug, ma demturug e n’en ni gimed ba’adag mug ra pi’ ngomed. 12 Mogned ngog ko mang e gimed ba’adag ni nge yag ngomed, mi gimed tay puluwon e re pin nir ni rogon tolngin ni gimed be leamnag, ma demturug ko mang e gimed ra yog mu gu ra pi’, ni fa’an gimed ra pi’ e re pin nir nggu le’engiy.” 13 Ma fapi pagel ni fak Jakob e ra lifithed l’ugunrad ngak Shekem nge Hamor ni chitamngin, ni bochan Dinah ni walagrad ni kan dariy fannag. 14 Roged nra ga’argad, “Dabiyag ni nggu paged walagmad nge figirngiy be’ ni pumo’on ndawor ni maad’adnag; binem e ra ma’nag famad. 15 Ra fel’ u wun’mad ni kemus ni fa’anra gimed ra bod gamad ni ngan maad’adnag urngin e pumo’on romed. 16 Fin aram e gamad ra pining e kefel’ ngay ni ngi i mabgol e gal ke girdi’ rodad ney. Ma gamad par u fithik’med ngad ta’ab girdi’gad. 17 Ma fa’anra dabi fel’ u wunmed rogon ni kug duwgiliyed ni ngan maad’ad nagmed ma aram e gamad ra fek e re pin nir nggu chuwgad romed.” 18 Me mat’aw u wan’ Hamor nge Shekem e tin karogned, 19 ma fare pagel i Shekem e da ki ayal ya kachingiyal’ nem me rin e tin kannog, ni bochan e ke aliliynag fare rugod ni fak Jakob. Ma cha’nem i Shekem e ir e cha’ ni ri yima tayfan u tabnaw rok. 20 Me yan Hamor nge Shekem ni fak ko gin’en ni yima mu’ulung riy u langan e garog ko fare binaw mi yow non ko pumo’on ko fare binaw nra ga’ar gow, 21 “Picha’ ney e riyad ba gol; ngad paged yad ngar pired rodad u daken tafedad ngu’ur malekaggad nib puf matow’rad. Ya but’ e ba ga’ nib gaman’ ni gadad ra fel’ riy. Me bung rogon ni ngi i mabgol pifakdad. 22 Ma pi pumo’on ney e ra fel u wun’rad ni ngar pired u fithik’dad miyad ta’ab girdi’ ngodad ni kemus ni fa’anra ni maad’adnag gubin e pumo’on rodad, ni bod yad. 23 Gathi aram e rayag ngodad gubin e gamanman rorad nge urngin e tirorad ban’en? Ere nge m’ag u wan’dad me yag ni ngad pired u ta’bang.” 24 Gubin girdi’en fare binaw ni ta’reban’rad ngak Hamor nge Shekem ko n’en ni yow be yog, ma aram e gubin e pumo’on u lan fare binaw nni maad’ad nagrad. 25 Dalip e rran nga tom’ren, ma kab m’ar fapi pumo’on ko fare maad’ad ni kan tay ngorad, ma l’agruw ni’ ni fak Jakob, ni Simeon nge Levi, ni walagen Dinah, e ra fekew e saydon rorow nib smamith, ngranow ngalan fare binaw ngar li’ew urngin e pumo’on riy, 26 nib mu’un Hamor nge Shekem ni fak ngay. Ma aram miyow fek Dinah u naun rok Shekem ngranod. 27 Tomuren fare cham me yib boch i pifak Jakob ni pumo’on ngar giliw naged fare binaw ni yad be filbeyen walagrad ni bpin ni kan dariy fannag. 28 Rab ra koled yu ran’ i saf, kaming, dangki, mar feked gubin e tin bay u lan fare binaw nge tin u daken e pi flang. 29 Mar feked urngin e tin nib fafalel’ ban’en, nge urngin e ppin nge bitir, miyad fek u yargal urngin e tin bay u naun. 30 Me ga’ar Jakob ngak Simeon nge Levi, “Kam tew e oloboch nga puluwog; ni aram e bayi dabuyeg piyu Kanaan, nge Perizzites, nge gubin e girdi’ ko re binaw ney. Ma gadad buchu’uw; mra chey ni ta’reb lungrad ni ngar togopluwgad ngar chamgad ngog, ma ga’ngin e re ke girdi’ rodad ney nra math owcharad.” 31 Miyow fulweg, “Dabiyag ni nggu pagew walagmow ni bpin ngan dariy fannag ni bod be’ ni bpin ni ba gathar.”