Genesis 46 (TOMA)
1 Izilayɛle ʋilɛni pelei zu, é ɗa li, é ʋɛɛ naati kpein ba, ti ɠɛni ga nɔnɔi. Siɛgi zu é zeelini la Ɓeel-Seɓa, é zalaɠaiti kulani kɛɛɠɛ Izaake ná-GALAGI ʋɛ. 2 GALA ge ɓɔɛni Izilayɛle ʋɔ kulakɛlɛmaiti su kpidii naa. É tolini, é ɠɛ ma: «Zakɔɓe! Zakɔɓe!» Izilayɛle gooɠaaʋoteni, é ɠɛni ma: «Nà ɠaa!» 3 GALA ge ɠɛni ma: «Nà ga GALA, è-ɠɛɛ ná-GALAGI. Mina lua è lii vai zu Ezipete yooi zu, mazɔlɔɔ náʋɛ ɠa gè è ɠɛɛzu ná ga zii wola. 4 Nà ɓɔɠɔi ɠa gè yɛsu è ʋa, de yei Ezipete yooi zu, nà ɓɔɠɔi nɔ ɠa mɔnɔ gè ʋaazu lɛɛzu ga ɗe, gè è ɠula náʋɛ. Ɗa zaana, Zozɛfe ɠa é ʋaazu è-ɠaazuʋɛti pɛɛzu ma ga tɔ ɓɔɠɔi zeei.» 5 Zakɔɓe zeɠeni Ɓeel-Seɓa. Izilayɛle ná-doun zunuiti ti ti-ɠɛɛ Zakɔɓe zeɠeni, ta ti-lointi, ta ti-anzaiti, ti ti lɛ wotoloiti su, niiti Falaɠɔn ti leʋeni ga ti ti zeɠe ti zu. 6 Ti ta-logani ɓulugiti seɠeni ɓalaa, ta ti-yeaɠɔligiti kpein, niiti ti ti zɔlɔɔni Kanaan yooi zu. Pele ɠana Zakɔɓe zeelini la Ezipete yooi zu, é ʋɛɛ ná-pɛlɛyeɠei kpein ba. 7 É liini ga ná-pɛlɛyeɠei kpein Ezipete yooi zu: ná-doun zunuiti, ta naati ti-loun zunuiti ta ti-loun anzanuiti, ta ná-doun anzanuiti. 8 Izilayɛle ná-doun zunuiti daaseigiti kaa, niiti ti yeini Ezipete yooi zu, Zakɔɓe ta ná-doun zunuiti.Zakɔɓe ná-doun zunu mɔungi, é sɔlɔɔni, daaseigi ɠɛni ga Luɓɛn. 9 Luɓɛn ná-doun zunuiti ti ɠɛni ga: Enɔke, Palu, Ɠɛsɛlon, ta Kaalemi. 10 Simiyɔn ná-doun zunuiti ti ɠɛni ga: Yemuwɛle, Yamin, Woɠade, Yakin, Soɠaal, ta Sayile, nii é ga Kanaan anzanui ná-doun zunui. 11 Levi ná-doun zunuiti ti ɠɛni ga: Gɛɛlɛson, Keɠate, ta Melali. 12 Zuda ná-doun zunuiti ti ɠɛni ga: Ɛɛl, Wonan, Sela, Pelɛze, ta Zela. Kɛlɛ Ɛɛl ta Wɔnanni ti zaani Kanaan yooi zu. Pelɛze nɔnɔ ma loun zunuiti ti ɠɛni ga: Ɠɛsɛlon ta Ɠamule. 13 Isakaal ná-doun zunuiti ti ɠɛni ga: Tola, Puva, Yoɓe, ta Similon. 14 Zaɓulɔn ná-doun zunuiti ti ɠɛni ga: Selɛde, Elon, ta Yaleyɛle. 15 Zunu lointi kana Lea ti zɔlɔɔni Zakɔɓe ʋɛ Padan-Alame, é ʋɛɛ ti-loun anzanui Dina ʋa. Ti-mavofodaiti pɛ ti ɠɛni ga nu ʋuusaʋa maazu saʋa (33). 16 Gade ná-doun zunuiti ti ɠɛni ga: Sifiyon, Ɠagi, Suni, Ɛseɓon, Eli, Alodi, ta Aleli. 17 Asɛɛl ná-doun zunuiti ti ɠɛni ga: Yimina, Yisiva, Yisivi, Ɓelia, ta ti-ʋaazeelai Sela. Ɓelia ná-doun zunuiti ti ɠɛni ga: Ɠeɓɛɛl ta Malekiyɛle. 18 Zakɔɓe mavofodaiti kana ti yɔɠɔzu ta Zilepa, botiɠɛ anzanui nii Laɓan feeni ná-doun anzanui Lea ya. Ti pɛ ti ɠɛni ga nu puugɔ maazu lɔzita (16). 19 Zakɔɓe anzai Lasɛle ná-doun zunuiti ti ɠɛni ga: Zozɛfe ta Ɓɛnzamɛn. 20 Won ná-zalaɠa ɠula nui Potifela ná-doun anzanui Asenate doun felegɔ zɔlɔɔni Zozɛfe ʋɛ Ezipete yooi zu: Manasé ta Efelayime. 21 Ɓɛnzamɛn ná-doun zunuiti ti ɠɛni ga: Ɓela, Ɓekɛɛl, Asaɓɛle, Gela, Naaman, Eyi, Lɔse, Mupime, Ɠupime, ta Aalede. 22 Zakɔɓe mavofodaiti kana ti yɔɠɔzu ta Lasɛle. Ti pɛ ti ɠɛni ga nu puugɔ maazu naani (14). 23 Dan ná-doun zunui ɠɛni ga: Ɠusime. 24 Nɛfɛtali ná-doun zunuiti ti ɠɛni ga: Yaseyɛle, Guni, Yesɛɛl, ta Sileme. 25 Zakɔɓe mavofodaiti kana ti yɔɠɔzu ta Ɓiliɠa, botiɠɛ anzanui Laɓan feeni ná-doun anzanui Lasɛle ya. Ti pɛ ti ɠɛni ga nu lɔfela. 26 Nuiti ti yɛni Zakɔɓe ʋa, ti ʋa Ezipete yooi zu, ti ɠulaai tɔun su, ti kpein kpɔga ɠɛni ga nu ʋuulɔzita maazu lɔzita (66), Zakɔɓe ná-doun zunuiti ti-anzaiti ti la naama ɠaalugi zu. 27 Zozɛfe ná-doun zunuiti ti zɔlɔɔni Ezipete yooi zu: nu felegɔ. Zakɔɓe ná-pɛlɛyeɠei ma nuɓusɛi liegɔi é yeini Ezipete yooi zu, é ɠɛni ga nu ʋuulɔfela (70). 28 Zakɔɓe Zuda leʋeni luɠɔʋelei Zozɛfe ʋɔ bɛ, é bo ma ga é daaɠomi Gosɛn. Ti zeeliai ma Gosɛn yooi zu, 29 Zozɛfe ná-wotoloi ɠɛʋele ɓɛtɛni, é lɛ su, é li Gosɛn, kɛɛɠɛ Izilayɛle laaɠomisu. É kaai ma nɔ feya, é vɛɛlɛ ga kɔgi, é lɛbi wɔlɔzu zeei naa ɠɔgi ʋa. 30 Izilayɛle ɠɛni Zozɛfe ma: «Nà zoo zaazu niina, tɔɔzei gè è-ɠaazuʋɛ ɠaa, ɗa dɛ vulua!» 31 Zozɛfe ɠɛni kɛɛɠɛleaiti ma, ta kɛɛɠɛ ná-pɛlɛyeɠei: «Nà liizu, gè Falaɠɔn loo ɠisu, gè ɠɛ ma: ‹Kɛ̀ɛleaiti ta kɛ̀ɛ ʋɛlɛyeɠei, niiti ti ɠɛa Kanaan yooi zu, ti ʋa, ti zeelia mà. 32 Niima nuiti ta ga togani makɛ nuiti, mazɔlɔɔ togani lo nuiti be, ti ʋaaʋɛ ga ta-ʋaalagiti, ta ta-woliiti, ta ta-nikɛiti, ta nii kpein é ga ti-ɠɔligiti.› 33 Siɛgi zu Falaɠɔn a wo lolina da, é ɠɛ wo ma: ‹Ɓɛgele ɠa wa ɗa kɛ?› 34 wa gooɠaaʋote ga: ‹Ɗa-wotiɠɛ nuiti gá ga togani lo nuiti, é tɔɔzei gi-ma loungo yeei ma, eyɛsu niizu, giya-o, gi-mɛmɛwolani-yo.› Naa ɠɛʋele ma, toɠa vaazu bu, wo zei Gosɛn yooi zu, mazɔlɔɔ togani lo nuiti bɛlɛzeɠeʋɛ Ezipete nuiti bɛ.»