Isaiah 2 (TOMA)

1 Wooiti Amɔse ná-doun zunui Ezayi ti zɔlɔɔni GALA zea kulakɛlɛmai zu, é ʋilɛ Zuda masadai ʋa, ta Zeluzalɛme taai. 2 Yeeɠɛɠala ɠaaɓelagiti ta zeelina,Ɠɔoɠɔ GALAGI zei ʋɛlɛi ma ɠizei ɠaa ɠa ɠooza, é lo gizeiti pɛ maazu,toɠa lo gize goiti pɛ maazu,nuɓusɛ ʋɛbɛi ɠa ɠɛ liizu pɔ bɛ. 3 Zii ɠiligiti ta ɠɛ liizu ná, ti ɗa ɠɛ ma:«À ʋa ade lɛ Ɠɔoɠɔ GALAGI ná-gizei ma,Zakɔɓe ná-GALAGI zei ʋɛlɛi wu,naa ɠa a kɛ, é ná-peleiti dɛɛ ga adeye,ade ʋa ziɛ ga ná-peleiti.»Mazɔlɔɔ Siyɔn ɠa tɔgi a zeɠe ná,ta Ɠɔoɠɔ GALAGI laawooi ɠa zɔlɔɔ Zeluzalɛme nɔ. 4 Toɠa zaamazu logi wo zii wolaiti zɔɠɔzu,toɠa ɠɛ ga nuɓusɛ mɔinmɔin tukpɔɠaaleʋe nui.Ta ta-ɠɔɔɠɔ woɠa zɔkpɔiti kɛ ga kaliiti,ti ta-ɓɛɛinti kɛ ga molo leʋe woɠaiti.Zii la mɔ valaa zii ʋa,nu la mɔ kɔɔɠɔ vaa ma ɠala boga. 5 Zakɔɓe mavofodaiti, à ʋa deɠɛmu,ade ziɛ Ɠɔoɠɔ GALAGI ná-wozakalagi ɠa. 6 Maliɠii, è la mɔ ɗa-nuɓusɛiti pɔ, Zakɔɓe mavofodaiti.Mazɔlɔɔ folo ɠulazu ʋelei ma ungaiziɛ nuiti ti ʋooʋaa ti zaama,eɠɛʋelei ti ʋooʋaai la Filisiti yooi zu.Ɗa-nuɓusɛi ɠa yeeʋilisu ɓɔɠɔ zu ta wɛɛinti. 7 Ná-zooi laavegɛ ga walii ta zanugi,ɓela ge la ná-naavoloi ʋa.Ná-zooi laavegɛ ga sooiti,ta nu la zooga ná-kɔɔɠɔ wotoloiti gaalusu. 8 Ná-zooi zulaavegɛ ga zɛɛ ɠalagiti ɓalaa,ɛsɛ pɛ ka nɔkɔsu kɔɔɠɔ ganigiti bu,aniiti tiya ɓɔɠɔi ti ti ɓɛtɛai ga yeeɓeɠai,nuɓusɛiti ti ti ɓɛtɛai ga yeei. 9 Naa ɠa é ba, nuɓusɛi pɛ maanɛɛʋɛ ga é ɓɔɠɔmaayei,é laaʋɛɛ fufiligi ʋa.Ɗɔun ɗa, Maliɠii, mina ti wuzeɠe! 10 À lɔɔɠu fasa yeɠeiti su,à lɔɔɠu zooi wu,wo maaɠooza Ɠɔoɠɔ GALAGI ná-ziiɠaawanai ʋa,ta ná-maayikii ma voloi. 11 Nuɓusɛiti ta-ɠaazumaanɛɛiti gaa ɠa yei,toɠa waso nuiti gaayei,naama volo ná, Ɠɔoɠɔ GALAGI ɠila kpe ka a wɔɔlɔ. 12 Ɠɔoɠɔ GALAGI, Fai-Pɛ-Maliɠii folo ɠila deveʋɛ,gaazumaanɛɛ nuiti daalɔɠɔma ta waso nuiti pɛ,ta naati daalɔɠɔma niiti ti ɓɔɠɔ lɛɛzu su, ti ɠaa ɠa yei. 13 Toɠa ɠɛ Liɓan sɛdele guluiti daalɔɠɔma,ti wuzeɠeai, ti ɠaaɠooza, ta Ɓasan sɛne guluiti pɛ. 14 Toɠa ɠɛ gize ɠaaɠoozagi pɛ daalɔɠɔmata gize goiti daalɔɠɔma, ti wuzeɠeai. 15 Toɠa ɠɛ siɠi gaaɠoozagiti daalɔɠɔma,siɠi golaiti nu la lɔa ti ʋa. 16 Toɠa ɠɛ Taalasise ɓatoiti daalɔɠɔmata ziɛ ɠa ɠeingiti pɛ ti wola ʋagai. 17 Nuɓusɛiti ta-ɠaazumaanɛɛiti gaa ɠa yei,toɠa waso nuiti gaayei,naama volo ná, Ɠɔoɠɔ GALAGI ɠila kpe ka a wɔɔlɔ. 18 Zɛɛ ɠalagiti kpein ta ɲɛɛlɛ. 19 Nuiti ta lɔ pugiti su,ti lɔ zooi ma yeɠeiti su,ti maaɠooza Ɠɔoɠɔ GALAGI ná-ziiɠaawanai ʋa,ta ná-maayikii ma voloi,siɛgi zu é wuzeɠezu la ga é eteai maalua. 20 Naama volo ná, zɛɛ ɠalagiti ti ga walii ta zanugiti,nuiti ti ti ɓɛtɛai, ti ɗa nɔkɔ ti wu,ta naati seɠe, ti ti ʋili ya inɛgiti bu ta dɛvɛiti. 21 Nuiti ta lɔ pugiti su,ti lɔ kɔtui ma yeɠeiti su,ti maaɠooza Ɠɔoɠɔ GALAGI ná-ziiɠaawanai ʋa,ta ná-maayikii ma voloi,siɛgi zu é wuzeɠezu la ga é eteai maalua. 22 À ɓe ɠalivaazu nuɓusɛi ma,fiilɛ goi é sokpa zu, naa nɔ ɠa é ga ná-eteai,tosuʋɛ ɠa ga mini?

Isaiah 2 (TOMA)

In Other Versions