John 2 (TOMA)

1 Naa ʋoluma folo felegɔ ɠulaai ma su, vulu maazaa ɠoozunɛɛi ta ɠɛni ɠulazu Kana, Galilé yooi zu, Yesu dee ɠɛni ná. 2 Ti Yesu ɓalaa tolini ta ná-kaladopoiti vulu ɠɛɛzuʋɛ. 3 Siɛgi zu dɔɔi ɓeni la, Yesu dee ɠɛni ma: «Dɔɔ la mɔ ti ya.» 4 Yesu gooɠaaʋoteni, é ɠɛ ma: «Anzanu, lee ɠa è pòluma? Nà-yeeɠɛɠalai la dɛ zeelini.» 5 Dee ɠɛni botiɠɛ nuiti ma: «Nii nɔpɛ a bo wo ma, à naa ɠɛ.» 6 Kɔtu liɠi lɔzita ɠɛni ná, nii Zuifuiti ti ɓena ɓɔɠɔ ɲade faiti kɛ ga tiye. Diɠii naati gilagilagi ɲɛ gilagi a la zo ɠɛɛzu ga litɛlɛ ʋuulɔsaʋa (80) ɓaa ungila (100). 7 Yesu ɠɛni botiɠɛ nuiti ma: «À diɠii niiti daave ga ziɛi.» Naati ti ti laaveni lɛɠɛlɛɠɛ ga ziɛi. 8 Naa ʋolu é ɠɛ ti ma: «À tago zaɠa, wo lii la ɠɔnɔ gaaɠwɛɛ nui ʋɔ.» Ti liini ga ta ɠɔnɔ gaaɠwɛɛ nui ʋɔ. 9 Ɠɔnɔ gaaɠwɛɛ nui ziɛi ɠɔɠɔni, nii falibogai ga dɔɔi. É la ɠɛni kwɛɛni ʋɛ dɔɔi naa zeɠeai ná, kɛlɛ botiɠɛ nuiti mu, ti ɠɛni seɠezuʋɛ ɠwɛɛ. É anzazinigi lolini, 10 é ɠɛ ma: «Pɔlɔmazu, nu ɠa ɗa dɔɔ ʋagɔi ese gaaɠwɛ, naa ʋolu siɛgi zu dɔɔi nuɓusɛiti sosu la, ɗa zɔi ɠula niina, nii é la zeelini zɔi zu. Kɛlɛ ɗɔun, è dɔɔ ʋagɔi yɛga ná, eyɛsu niizu zeeli.» 11 Naa ɠa é ɠɛni ga Yesu ná-laavɔɔ vaa mɔunpagi. Nii ɠɛɛni Kana, Galilé yooi zu. Zekana é ná-lɛbiyai ɠulani la kɛlɛma. Ná-kaladopoiti ti laani da. 12 Naa ʋoluma, Yesu yeini Kapɛɛlɛnawume taazuʋɛ ta dee, é ʋɛɛ deɠeiti ta ná-kaladopoiti ba. Ti ku ɠɛɛni ná fele. 13 Zuifuiti ta-Ʋake|Pakegi fɛtii maa ɠɛni ɓuɠazu. Yesu lɛɛni Zeluzalɛme. 14 É yaaɠoiti pɛtɛni GALA sei ʋɛlɛi ma ɠoizuʋɛ, ti ɗa nikɛiti, baalagiti ta poopogiti pɔdi. Wali valibo nuiti ɓalaa ti ɠɛni ná. 15 É galuiti seɠeni, é kɛ ga kpakɔi. É ti ɓɛɛni, é ti ɠula GALA sei ʋɛlɛi wu, ta ta-nikɛiti, naa ʋɛɛ ta-ʋaalagiti ba. É wali valibo nuiti ta-waliiti suvazani, é ta-laɓaliiti toka. 16 É ɠɛ poopo pɔdi nuiti ma: «À niiti kula ʋɛ! À mina Kɛ̀ɛ ná-pɛlɛi ɠɛ ga yaaɠo ʋɛlɛ!» 17 Ná-kaladopoiti ti-ɠi ge looni su ga sɛʋɛʋɛ ga:«Ee, GALA, ɗa-ʋɛlɛi ma wɔinlai ɠa gàla eɠɛ abui.» 18 Zuifuiti ta-ɠundiɠiiti ti kpɔɛi zeɠeni, ti ɠɛ ma: «Laavɔɔ vai ɓɛgele ɠa è kɛɛzu, è ʋa dɛɛ ga giye ga zobo ka è ya ga è niima vaiti kɛ?» 19 Yesu ti wooɠaaʋoteni, é ɠɛ ti ma: «À GALA sei ʋɛlɛi nii ɠolo, nɔ̀un nà to ʋolu folo saʋagɔ laawu.» 20 Zuifuiti ta-ɠundiɠiiti ti ɠɛni ma: «GALA sei ʋɛlɛi nii lo fai kɛɛni ga kona ʋuunaani maazu lɔzita (46), é ʋa ɓe, ɗɔun naa ɠa ɗa to ʋolu folo saʋagɔ laawu?» 21 Tama é ɠɛni ɓɔɛzu é ʋilɛ tɔ ɓɔɠɔi ɓusɛi ʋa, nii é ga GALA sei ʋɛlɛi. 22 Siɛgi zu é wuzeɠeni, é ɠula saai ya, ná-kaladopoiti ki ge looni su ga é naama wooi woni. Ti laani GALA sɛʋɛiti da, ti la ɓalaa naama wooi la, nii Yesu boni. 23 Siɛgi zu Yesu ɠɛni la Zeluzalɛme Pake|Pakegi fɛtii zu, nu mɔinmɔin ge ɠidaaleʋeni ma, siɛgi zu ti laavɔɔ vaiti kaani la, é ɗa ti ɠɛ. 24 Kɛlɛ Yesu la ɠɛni laani ti la, tɔɔzei é ɠɛni ti pɛ kwɛɛ ga gola. 25 Mazɔlɔɔ kpɛdɛ la ɠɛni ba ga ti nuiti ta-vaa zuɠula ma, tɔɔzei é ɠɛni nui yiimaʋɛ ɠwɛɛ.

John 2 (TOMA)

In Other Versions