Job 22 (TOMA)

1 Teman nui Elifaze kpɔɛi lɔɔzeini, é ɠɛ ma: 2 «Nui losu ɠa zoo nɛi é ɠɛ Ɠɔoɠɔ GALAGI ʋɛ?Ɠima nui ɠa botii ɠɛɛzu ɓɔɠɔ nɔ ʋɛ. 3 Kɛlɛ Zɛbɛi-Pɛ-Maliɠii ná-kulanumai ɓɛgele ɠa é ɗa-lelebodai zu?Leeni ɠa a sɔlɔɔ, ni è-ziɛ ʋelei a zɔlena? 4 È laaʋɛ da, ga toɠa è maaɠolozu, é è lukpɔ,tɔɔzei ɗa unmaayeizu ná-zobogi wu? 5 È la ɓɔɠɔ ɠɛɛni ga sɔba nu tooma vaa mɔinmɔin su ɓaa?Kwɛ ka nɛi ɗa-vaaɠaazagiti ba? 6 È ɠɛni kpɔunmai ɠulazu è-zeiɲɔɠɔiti zea, un ge la ba.È ɗa nuiti ta-zeɠeiti kula ti ma, eyɛsu è ti maaɲakai ʋilɛ. 7 Nui kpɔɔle wɔin ma, è la ɠɛni ziɛ veeni naa ya.Nui pului ɠɛni ma, è naa ɠomani ga daamianigi. 8 È zooi lɔɔni tooma nui yeezu.Nui nɛai è ʋɛ, naa nɔ ɠa è ɠɛni seizu ɓɛtɛzu. 9 È ɠɛni yeeɓesu poanzaiti ba, ti li ga yeaɲaka.È ɠɛni podointi suvikɛi ɠulazu ti ya. 10 Wɛlɛ, naa ɠa é ba, baliiti daai è maaɠoolizu,gaamago nɔ, dualua golai è zogɛ. 11 È la kpidii naati kaazu ɓaa,ziɛi naati kpein ti è maaɓɔlesu? 12 «GALA ge la geeɠɔlɔgi zu ɓaa?Geezuʋɛ ʋɛtɛ, ná ɠaaɠoozaai, somideɠaiti ɲɛkpɛai ga! 13 È woo ɠaaɓela ga: ‹GALA ka zoo nɛi é suɠwɛɛ?Toɠa zoo nɛi, é ɓudɛ tonaɓiingi maazu, é tukpɔi ɠaaleʋe? 14 Tonaɓiingiti gaaɠiligɛ gola GALA gaazu, é la ani nɔpɛ kaa,siɛgi zu é ziɛzu la, é ɗa lati geeɠɔlɔgi ma.› 15 «Ɗa pɔ è yɛ pele wɔlɔmai ʋolu,nii telebotala nuiti ti ziɛni la? 16 Ungo, ti leʋeni ga ma yeeluɠɔ,eɠɛ siɠigi nii ziɛ ɓoigi yeizu la. 17 Tɛi ti ɠɛni ɠɛɛzu GALA ma: ‹Maaɠooza gi ʋa!Toɠa ga Zɛbɛi-Pɛ-Maliɠii, leeni ɠa a zoo é kɛ ga giye?› 18 Anɛɛ naa ʋe, tɔ ɠa é ta-ʋɛlɛiti buulaaveni ga ani ʋagɔiti.Faa ɲɔu ɠɛ nuiti ta-lɛnɛ gooi maaɠoozani bà. 19 Telebo nuiti ta ti-ɠoloɠolosuʋɛ ɠa, ti ɠoozunɛ.Sɔbalala nuiti ta ɲɛɛɠula ti zu, ti ɠɛ ma: 20 ‹Ungo, ade zili nuiti pɛtɛ, ti ɠoloɠologa!Nii dɔi ti zɛni, abui naati galani.› 21 «À yɔɠɔzuɓɛtɛ wa GALA, ziilɛigi ɠaiziɛ wo yɔɠɔzu wa tɔ.Ʋele ɠana undaanɛɛi a ɠaaɠale ma la è ma ʋolu. 22 Kalagi zo tɔ ɓɔɠɔi bosu ga ɗe,ɠizɛ daawooiti su. 23 Ʋa ʋolu Zɛbɛi-Pɛ-Maliɠii ʋɔ, toɠa è zei ʋele ɓɛtɛ ʋolu,telebotala vai kpein maaɠooza è-zeizuʋɛ ʋa. 24 Zanugi é è ya, pili ya zooi ma,ɓaa è zanu kitei yɛ kɔtuɗɛi ma ɠɔtui saama. 25 Naazu Zɛbɛi-Pɛ-Maliɠii ɠa ɠɛ è ʋɛ ga zanugi, ta wali wola. 26 Mazɔlɔɔ naazu, ɗa GALA Zɛbɛi-Pɛ-Maliɠii ná-fai ɠɛ ga è yiima vai,ɗa ɠaazuʋɛ wuzeɠe, è to GALA ba ga ladalai. 27 Ɗa wooɠula ma, toɠa è wooɠaaʋote,ta ɗa ɗa-minazeɠegiti daazeeli. 28 Ni ɗa deve wona, naa laa ɠa zeeli è ʋɛ,wozakalagi ɠa volo ɗa-ʋeleiti kpein su. 29 Ni nui ta ɠa ná kpɔlɔai, ɗa buzeɠe.Mazɔlɔɔ GALA ka ɗa ɓɔ naa ʋa, nii é ga ɓɔɠɔmaayei nui. 30 Toɠa sɔba nui unmɔɔ ɓalaa.È-yee ɲadegaiti saɓui zu ɠa zunui naa a ɠizo da.»

Job 22 (TOMA)

In Other Versions