Job 30 (TOMA)

1 «Kɛlɛ ee, za, wɛlɛ nà ʋa, gè ɠɛa ga ɲɛɛɠulasu anii nu niinɛiti zea,niiti gè ti-ɠɛɛni wɔinzeɠeni, gè la ɓena zoo gè ʋa ti ɓɔ nà-gilɛiti ba,ti ʋa ɠɛ ga nà-togani ɓulugi makɛ nua. 2 Leeni ɠa ti-yeei ná-zɛbɛi a kɛ bɛ̀?Ti-zɛbɛi ɲɛɛlɛni. 3 Ti-zuvikɛi ɠulaʋɛ ti ya, baladai ta pului ʋɛ.Ta ani ɠaiziɛzu teʋebai zu,ʋɛ kaite ná ɠoloɠologai, ná ɠaaʋala ba. 4 Ta tufa ɲɔiti tɔɔɠulazu, kpɔvɔ goiti saamaʋɛ,ti-laamianigi ɠa nɔ ga gului daa ga zenɛ, naa ma zapei. 5 «Ti ti ɓɛ nuɓusɛiti saama,ti ɗa ɓain ti ma, eɠɛ ta ɠɛ unma nu ʋolu. 6 Ti ɗa zeizu ɠaiziɛ pɛtu zeɠeiti su,ta zeɠeiti su, ti wɔai zooi ʋa, ta fasa yeɠeiti. 7 Ti ʋu ɓɔɠɔ ma, ti lɔɔɠu ɠaingiti bu,ta-ɓee wooi ɗa ɠula, kpɔvɔ goiti saamaʋɛ. 8 Ɠimalala nuiti, nuiti daasei ge la ti ʋa.Ti ɓɛai, ti ɠula zooi ʋa. 9 «Wɛlɛ, niizu ti dàalɔa guye zu,gè ɠɛa ti-laa ga faalaalii. 10 Wɔ̀inzeɠeʋɛ ti ma, ti ɗa maaɠooza bà,ti la inɛinɛsu ga ti-laaɗɛi ʋuu vai gàazuʋɛ. 11 É zo niizu ma, GALA ge gàalɛɠɛga, é ùnfe,ti la mɔ daazu ma kpɛ ga nà-faa. 12 Maawɔin nui niiti ta wuzeɠezu zèezazuʋɛ,naati ta pɔ ga ti kɔ̀ɠɔyɛʋɛ bù.Ti ɗa maanɔɠɔ ʋeleiti to bà. 13 Ta nà ɓɔɠɔi nà-peleiti teʋezu tùɠɔ, ti ùndaaʋili botii ɠɛ,tɛiti nu nɔpɛ ge la ɠɛni ɓɔsu ti ʋa. 14 Ta zeelizu mà ga zeɠe wolai laa ʋelei,ta ɠaazuvilɛzu, ti lɔ ani ɠoloɠologaiti bu. 15 Maalua vai ma zii pɛ ka seeliai mà,gàazu unfegi ɲɛɛlɛa eɠɛ fiilɛi lugi.Nà-undaanɛɛi leʋega eɠɛ tonaɓiingi é ɓizɛzu. 16 «Niizu, zɛ̀nvui ɠa na ɠula zèa.Mazɔlɔɔ kpɔlɔi ma voloiti ti zeelia nà ɓɔɠɔi ma. 17 Kpidii ɠa mà ɠaeiti bɔɔzu dùɠuzuʋɛ.Taɓai nii é mìizu, naa la ɓɔlɔzu. 18 É nà-seɠei zogɛ ga maaɓaai,é ɗa kpàkpa eɠɛ seɠei nii kɔgizu lɔiɗɛi. 19 GALA ge pìlini ya palaʋalai zu,gè ɠulaa ga fufiligi ta zuʋui. 20 «GALAGI, gè è lolini ga è ɓɔ bà, è la gòoɠaaʋoteni.Gè loga è ɠaazu, è ɗa wɛlɛ bà nɔ. 21 Kɛlɛ ɗa-vai ɓaa nɔ̀un tetema!È laalɛa bù ga è-yeei zuɲɛgi pɛ. 22 È fiilɛi ɠɛa ga sooi, è li ga ze kɔma.Fiilɛ wolai ɲìikpiga mini-o-mini. 23 Mazɔlɔɔ gè kwɛɛ ga pagɔ ga ɗa liizu ga ze saai ʋɔ bɛ,ʋɛ ná ɓɛtɛai ga fuluaniiti kpein koinsuʋɛ. 24 Kɛlɛ zɔi undaaʋilisu, é la ɗa ga yeelɛa ɓaa?Zɔi é faaɓaagi laawu, é la ɗa ga kpeei loa ɓaa? 25 «Anɛɛ naa ʋe, mɔungi zu, gè la ɠɛni wɔlɔni naati bɛ ɓaa, niiti eteai ɓaani ti ma?Zìi la ɠɛni kpɔlɔzu ɓaa, nà la bala nui ɠaana kpɔlɔi zu? 26 Mazɔlɔɔ kìgi ɠɛni undaanɛɛi ʋa, maanɔɠɔi ɠa paai.Gè ɠɛni wozakalagi maaɓɔunsu, kpidii ɠa paai. 27 Sàsu ɠa ɓalizu nɔ ɠɔ, kwɛ ge la ba.Kpɔlɔi ma voloiti ti ʋaa, ti zeeli mà. 28 Nà ziɛzu gɔlɔɗɛi zu, gè la ɠaazu laazu foloi ma.Nà wuzeɠezu kpɔgi zu, gè kpeei loo. 29 Gè ɠɛa ga koʋeiti ti-ɠɛɛloin,ta saa wɔnigiti siɛpoluɲɔɠɔi. 30 Kɔ̀lɔgi lɛiɗa mà tiintiin,kàeiti ti ɗa ɠala ga kɔɔlɛɓadii. 31 Nà-kɔnigi ɠa zeizu gɔlɔ wo nuiti gooi wu,nà-koolei ɓalaa ɠa gɔlɔ wo nuiti gooi loozu ma.»

Job 30 (TOMA)

In Other Versions