Job 36 (TOMA)

1 Eliyu liini luɠɔma ga kpɔɛi, é ɠɛ ma: 2 «Màaɓɔun dɛɛ, Zɔɓe, gè faiti zɔɠɔzulɛ ga ɗe,mazɔlɔɔ faa mɔinmɔin kana dɛ a wo GALA ná-faiti su. 3 Nà nà-faaɠaaɠai zeɠezu ɠoozama,gè gaamai ve Kpɛ̀tɛ ƓALAGI ya. 4 Nii gè bosu, gaama ɠitei ʋe,ɠima nu ɓɔɠɔɓɔɠɔ ka é è ɠoba. 5 «Ungo, GALA bɔɔlɔʋɛ gola, é ʋa li nui ʋɛlɛʋɛlɛsu,zobobɛ ƓALAGI ʋe, ná-devei la valiboga. 6 É la nu ɲɔi yɛga vulua,kɛlɛ toɠa ɗa maanɔɠɔ nui ná-gaamai maalobo. 7 É la ɗa ga ɠaazu zeɠe telebo nuiti ba,kɛlɛ toɠa ɗa ti zei masa kpɔkpɔgi ɠa masagiti koba.Toɠa ɗa ti ʋilɛ ná, ga ti zei ná eyɛsu ɠɔ, é ti wɔɔlɔ. 8 Ni ti ɠiliʋɛ ga yɔlɔɠɔiti,ni ɠiliʋɛ ga maanɔɠɔ ɠaluiti, 9 naa ɠa ga, toɠa ta-ɠɛɛwotiiti poluɠulazu,tɔ koloɠologiti ti ti ɠɛɛni ta-wasogi zu. 10 Tɔ ɠa é ti lɛnɛsu, é ti ɠala,ga ti ɓeteʋe ta-vaa ɲɔiti ba. 11 Ni ta woilona, ti ɠolo GALA bɛ,ta ta-voloiti gaaɓela undaanɛɛi zu,ta-ɠonagiti gaa ɠa ɓela gaanɛɛi zu. 12 Ni ti la woiloni, ta ʋilɛ pelei naa ma é liizu gɔvɛalaazu,ti undaa ɠa ʋili ta-faaɠwɛtalai zu. 13 «GALA gaazuluabalala nuiti ta ɗa ta-yiiɠaawanai makɛ,ti la wooɠula kpɔba ɠaiziɛ vaa zu, siɛgi zu GALA ge ti ɠilizu la ga yɔlɔɠɔiti. 14 Ta yɛsu nu niinɛlai zaamaʋɛ, ti za,ta-eteai ɠaaɓela koloɠolo nuiti saama. 15 GALA ka ɗa maanɔɠɔ nui unmɔɔ ga ná-maanɔɠɔi maaʋele,ta é kpɔlɔi zeɠe, é kɛ ga zaɓui naa woilo goo ma. 16 «Ɗa ɓalaagi, toɠa è ɠula kidaaʋiligi zu,é undaanɛ wolai ve è ʋɛ,é ɗa-laamii wo taɓalii ɠaalaave ga daamiani nɛɛnɛgiti. 17 Kɛlɛ niizu, faa ɲɔu ɠɛ nuiti ta-maaɠoloi zeelia è ma,tukpɔi ta faawogi ti è zoga. 18 Ziiɠulagi mina è li ɲɛɛɠulasui ma!Mina ɓɔɠɔ ɠaka ga kisiɛi, ga ɗa ɠaaɓaana è faanɛɛi ɠɛ, ɗa GALA geya. 19 È ɓain gooiti ta ɗa-ɠaaɓaaiti ta kula ɠɛ nɛi ɓaa,ti ʋa è ɠula kidaaʋiligi zu? 20 Mina ɠito kpidii ʋa gola,a ɗa nuiti suvaza, ti zeɠe ti-losuʋɛ. 21 Dama ga ɓɔɠɔ, è mina ɠaaʋote faa ɲɔi ma.Mazɔlɔɔ naa ɠa é kɛa, è kpɔlɔi zu. 22 «GALA bɔɔlɔʋɛ, zobogi ɠa bɛ,kalagi wo fai zu, kɛɠala la ná. 23 Ɓɛ ɠa a ɗa pelei lɛɛ la?Ɓɛ ɠa é zooga é ɠɛ ma: ‹Nii è kɛɛzu, é la zolooni›? 24 Mina yeema, è maamusɛ kɛɛ vaiti faa zu,nii nuɓusɛi kpein ge dɛbizu ma vaa zu ga guyeiti. 25 Nuɓusɛi kpein ka wɛlɛzu ba,nui kpein ka yɛsu ɠoozama, é ɗa ka. 26 Wɛlɛ ʋelei GALA bɔɔlɔai la, ná-bɔɔlɔi ɓudɛʋɛ da-ɠisiɛiti maazu.Nu nɔpɛ ge la zooga é ʋa ná-konagi liegɔi ɠaalu. 27 Toɠa ɗa nɔɗa koiti mɛɛn ʋɔ pelei,é ɠɛ ga diegi, é ɠaaɠale ma, é ɠɛ ga tonai. 28 Tonaɓiingiti ti faza, é ʋu nuɓusɛiti ma. 29 Ɓɛ ɠa a zoo é tonaɓiingiti siɛ ʋeleiti gaaɠa,ta ʋelei tona kpunɛ tugi ɠulazu la geezuʋɛ? 30 Wɛlɛ maaɠoolii zu, ʋelei mainmain saɠazu la,é ʋɛɛ kpoloɗɛi ma ʋali wolai ɠaaʋɛ. 31 Nuɓusɛiti ta yɛnvuzu ga tonai maaʋele, é puuzu,é daamianigi ve ti ya ga bɔɔlɔa. 32 Toɠa ɗa mainmain zo yee felegɔi ɠa,naa ʋolu, é diizuʋɛ lɛɛ la. 33 A ɠɛna ʋaa, toɠa ɗa dɛɛ ga ná-tona kpunɛ tugi maaʋele,toganiiti ta looga ná ga maaɓuɠa.»

Job 36 (TOMA)

In Other Versions