Job 38 (TOMA)
1 Názu, Ɠɔoɠɔ GALAGI yɛni fiilɛ wolai zu, é Zɔɓe wooɠaaʋote, é ɠɛ ma: 2 «Ɓɛ ɠa ga ɗe, è ʋa nà-deveiti gaaʋala ba ga ɠimalala ɓɔɛzuɠulaiti? 3 Ɗa-zaamaɠiligi ɠili eɠɛ ziilo nui,nà ʋaazu è ɠaazaɠasu, ɗa kàlasu. 4 Mini ɠa è ɠɛni ná,siɛgi zu gè ɠɛni eteai ɓɛtɛzu la?Dɛɛ lɛɛ nii è kwɛɛ ga ɗa-ɠeleɠelegi. 5 Ɓɛ ɠa é ma ɠɔɠɔgiti toni, è kwɛni ɓaa?Ɓɛ ɠa é kɔɠɔ bo galui laani maazu? 6 Ná-tɔkpalaiti kɔɠɔi lɔɔʋɛ ɓɛgele zu?Ɓɛ ɠa é ma sokoga ɠɔtui laani, 7 siɛgi zu sobui somideɠaiti ti ɠɛni guyei loozu la ʋɔɔma,siɛgi zu GALA ná-geezuɠeelaiti ti ɠɛni ɠoozunɛɛzu la, ti ɗa zɔngɔ? 8 «Ɓɛ ɠa é daaɠuluni kpoloɗɛi ma,kɛai ma ɠulazu dee ɠoozu, 9 siɛgi zu gè tonaɓiingi ɠɛɛni la ga maazeɠei,gè maavelevele ganii ɠɛ ga kpidii, 10 gè pele ɓesani ná-kpizɛi luɠɔ, gè kwɛteʋe,gè daaɠuluni ma, gè sɔɠɔgi loo? 11 Gè boni ma ga:‹Ɗa ɠwɛsu ʋɛ, è la ɓudɛa ná maazu, è ʋa li munu,ɗa-ɗɛ lakpatakpagiti ta-wasogi ɠa ɠwɛsu ʋɛ!› 12 «Kaipa è ɠulani etea, è sobui levea ná ɠɛ liele,è seizu ve bɛ, a zei ná geelaabosuʋɛ, 13 é zooi lakɔlɔgi zo, é suɓukpunɛ,é faa ɲɔu ɠɛ nuiti sulua? 14 Naazu zooi ɠa valibo, eɠɛ penɛi nu zoo è yeeʋozɛ ba,anii pɛ kɛʋele ɓɛtɛai, eɠɛ seɠe a ɠɛ ti ɠɔba. 15 Kɛlɛ faa ɲɔu ɠɛ nuiti balagɛ ta-wozakalagi ma,ti-yeei buzeɠeai doɠa wo fai ma, naa ɠa ɠaleɠale. 16 «È zeelia nɛi kpoloɗɛi nɔungi zu?È ziɛziɛga nɛi kpoloɗɛi ma ʋalii ɓomaʋɛ? 17 Saai ma ziɠidaʋɛti, ti ɠulani nɛi è ʋɛ kɛlɛma?È kpidi ɓɔii ma ziɠidaʋɛti ka ɓaa? 18 È eteai ɠaawɔɔlɔ ʋelei ʋɛtɛga nɛi?Bo dɛɛ, ni è naa kpein kwɛɛ. 19 «Pelei ɠa mini, nii é liizu wozakalagi zeizuʋɛ,kpidii ma, mini ɠa seizuʋɛ ná, 20 ga è zoo è gaaɠa, ʋɛ ti yeeɠaaɠwɛɛzu ná,è peleiti kwɛɛ ga pagɔ, é li ti-zeizuʋɛ? 21 È maanɛɛʋɛ è naati kpein kwɛɛ, mazɔlɔɔ è zɔlɔɔni niina,ɗa-voloiti mɔinʋɛ gola! 22 «È lia kɔɔlɛ vukɔi makɛsuʋɛ,è sakɔtui makɛsuʋɛ ɠaa nɛi ɓaa, 23 nii gè puai ɠoba, maanɔɠɔ voloi ʋɛ,ɲɛpi ɠɔɔ voloi vaa zu, ta kɔɔɠɔ voloi? 24 Pelei ɠa mini, wozakalagi a ɗa ɠula la, gaa ɗa ɠwɛ,mini ɠa folo ɠulazu ʋele viilɛi a ɗa zeɠe ná, é ʋa ʋu zooi ma? 25 «Ɓɛ ɠa é pelei laani sabalagi ʋɛ,é mainmain ta tona kpunɛ tugi ziɛ ʋelei la, 26 ga tonai pu zooi ma, ʋɛ nu la ná,é ʋu teʋebai zu, ʋɛ nu vulu la ná, 27 ga é zou vɔɔi yɛɓɛ, adaʋɛ náti fɔai,nii a kɛ gui ʋɔnɔ, tufa wundui ɓaɠa? 28 Kɛɛɠɛ ɠa nɛi tonai ʋɛ?Ɓɛ ɠa é nɔɗagi ɠilagilagi ɓɛtɛni? 29 Ɓɛ ɠoozu ɠa kɔɔlɛi ɠulaai ná?Geeɠɔlɔgi ma ɠolegi zɔlɔɔ nui ɠa ga ɓɛ? 30 Siɛgi zu é ziɛi ɓuunsu da, naa ɠa ɓaa kpekpe eɠɛ kɔtui,ziɛi ɠaaʋɛ ma vuɠeiti ti ɠili ʋa kpe eɠɛ fasai. 31 «Geezu ʋoogi daa ga ‹Peleyadegiti›, ɗa zoo è galui lo ba,ɓaa nii daa ga ‹Wɔliyɔn›, è naa vie? 32 Ɗa zoo è poogiti kula kɛlɛma ta-yeeɠɛɠalaiti ma?Poogi daa ga ‹Wuluse Golai›, ɗa lo naa luɠɔ ta ná-somideɠa ɠiligi zɔiti? 33 È geeɠɔlɔgi zu lɔgiti kwɛɛ nɛi?Ɗa ɠidaazu nɛi zooi ná-fai wu, ta ná-seikpasui? 34 «Ɗa wooɠula tonaɓiingi ma,nii a kɛ sabalagi ʋu è ma? 35 Ɗa ɠa ɗa ɗa mainmain leve,é ʋa leɠa ziɛ, é ɠɛ è ma: ‹Giya ɠaa›? 36 Ɓɛ ɠa é ɠimalai lɔa nuɓusɛi yiimaʋɛ,ta faa yɔɠɔzuɠwɛɛ zɛnvui? 37 Ɓɛ ɠa a zoo é tonaɓiingi ɠaalu ga ɠimalai maaʋele,é geeɠɔlɔgi ma ɠɔlɔ liɠiiti maala, 38 siɛgi zu fufiligi ɓaazu la kpe eɠɛ kɔtu,zooi ma ʋɔlɔ ɓuiti ti ɗa ɓɔɠɔ zo? 39 «Ɗa zoo è dosoi ɠɛ, è zala zaai laamianigi zo bɛ,è pului zeɠe zala ɓokpagiti ma, 40 siɛgi zu ti ʋɛɛni la ta-yeɠei zu,siɛgi zu ti ʋuuni la kpifɔ, tufai maazu? 41 Ɓɛ ɠa a ɗa kalawɔnii ná-daamianigi ɓɛtɛ bɛ,siɛgi zu ná-ziʋoiti ti wɔlɔzu la GALA goizu,ti ɗa ziɛziɛ, daamiani ge la ti ya?»