Luke 2 (TOMA)
1 Naama ziɛgi zu, masagi Sezaal Oguste devei veeni ga kɛni daasei sɛʋɛi ɠɛ ná-masadai zu ná pɛ. 2 Daasei sɛʋɛ mɔungi ɠɛni ga naa, nii é ɠɛɛni. Naama ziɛgi zu Kiliniyuse ɠa é ɠɛni ga Siili you ɠundiɠii. 3 Ɛsɛ gilagilagi pɛ ge ɠɛni liizu daaseigi zɛʋɛ vai ma, tɔ ɓɔɠɔi sɔlɔɔ taai zu. 4 Zozɛfe ɓalaa zeɠeni Nazalɛte taazuʋɛ, Galilé yooi zu, é lɛ Zudé yooi zu, Davide ná-taazuʋɛ, ʋɛ ná laa ga Ɓɛteleyɛme, mazɔlɔɔ é ɠɛni ga Davide mavofodai ta, ta ná-pɛlɛ wu nui ta, 5 nii a kɛ ti-laaseigi zɛʋɛ ta Mali, nii maazoga ɠɛni de bɛ, kogi ma. 6 Siɛgi zu ti ɠɛni ná la, naa ná-doun zɔlɔɔ yeeɠɛɠalai zeelini. 7 É ná-doun zunu mɔungi zɔlɔɔni. É maaveleveleni, é da toganiiti daami aniɲakai ta zu, mazɔlɔɔ ti la ɠɛni laazu zɔlɔɔni wɛɛn laazuʋɛ ʋɛlɛi wu. 8 Baala makɛ nuiti ti ɠɛni naama yooi nɔ zu, ti ɠɛni dɔɓɔi zu, ti ɗa ta-logani ɓulugiti makɛ kpidii. 9 Maliɠii ná-geezuɠeelai gila ge ɠulani ti ʋɛ kɛlɛma. Maliɠii ná-lɛbiyai voloni ti-maaɠoolii zu. Ti wola luani. 10 Kɛlɛ geezuɠeelai ɠɛni ti ma: «À mina lua, mazɔlɔɔ woo niinɛ ʋagɔ ɠa gè daazeelizu wo ma, nii é ʋaazu ɠɛɛzu ga nuɓusɛiti pɛ ta-ɠoozunɛ vaa: 11 Tɔɔzei za Davide ná-taazuʋɛ, Kizo Nui zɔlɔɔga wo ʋɛ, nii é ga Kilista, Maliɠii. 12 Nii é ɠɛɛzu ga poogi wo ʋɛ, naa ɠa ga: Wa doun zɔlɔɔga niinɛi ɠaazu, maavelevelegai, é laani toganiiti daami aniɲakai ta zu.» 13 Gaamago nɔ, geezuɠeela ɓulugi ʋaani, é ɓɔ geezuɠeelai ʋa, ti ɗa GALA maamusɛ, ti ɗa ɠɛ ma: 14 «Lɛbiyai ɠa GALA bɛ geeɠɔlɔgi unga munu,ziilɛigi ɠɛ zooi ma, nɛɛbɛ nuiti bɛ!» 15 Geezuɠeelaiti ti zeɠeai ma ti ɠoba, ti ɠale ma geeɠɔlɔgi zu, baala makɛ nuiti ti ɠɛni ɓɔɠɔ ma: «Ade li Ɓɛteleyɛme, ade naama vai ɠa, nii kɛai, nii Maliɠii dɛai ga adeye.» 16 Ti liini ga gaazuvilɛ, ti Mali ta Zozɛfe ɠa, naa ʋɛɛ doun ɲɛgi ʋa, é laani toganiiti daami aniɲakai ta zu. 17 Ti kaai ma, ti naa kpein suɠulani, nii é woni ti ma, é ʋilɛ doungoi ʋa. 18 Zɔiti kpein ti ɠɛni ti-wooi mɛnisu, naati pɛ ti laavɔɔni ga naama wooiti, nii baala makɛ nuiti ti ɠɛni bosu ti ma. 19 Kɛlɛ Mali mu ge ɠɛni ti pɛ makɛsu yiimaʋɛ, é ɗa ɠisiɛ su ga gola. 20 Baala makɛ nuiti ti ɠaleni ma, ti ɗa GALA dɛbi, ti ɗa maamusɛ, mazɔlɔɔ nii ti mɛnini, ti ka, naa zolooni naa ma, nii é woni ti ma. 21 Doungoi lati yee zeeliai ma pɛlɛʋolu, foloi lɔsaʋasiɛi, ti daasei pɛɛni ga Yesu, daaseigi nii geezuɠeelai pɛɛni ba, aisa dee ʋa kogi zeɠe. 22 Yeeɠɛɠalai zeeliai ma ga ti ɓɔɠɔ ɲade, eɠɛʋelei sɛʋɛai la Moize ná-tɔgi zu, ti liini ga doungoi Zeluzalɛme ga ti kaliva Maliɠii ma. 23 Mazɔlɔɔ sɛʋɛʋɛ Maliɠii ná-tɔgi zu ga: «Doun zunu mɔungi kpein ka ve Maliɠii ʋɛ.» 24 Ti zalaɠai ɓalaa kulani, eɠɛʋelei sɛʋɛai la Maliɠii ná-tɔgi zu ga: «kpumago felegɔ, ɓaa poopo kpokpa felegɔ.» 25 Zunui ta ɠɛni Zeluzalɛme, daa ga Simiyɔn. É ɠɛni ga telebo nu, é ɗa lua GALA gaazu ʋa, é ɠɛni Izilayɛle ɠaanɛɛnɛ vai maaɓɔunsu kitogi zu. Zɛnvu Ɲadegai ɠɛni ba. 26 Zɛnvu Ɲadegai dɛɛni la ga é la zaa, kɛni a Kilista ɠaana, nii Maliɠii teʋegai. 27 Zɛnvu Ɲadegai loni tuɠɔ, é li GALA sei ʋɛlɛi wu. Siɛgi zu Yesu zɔlɔɔ nuiti ti ʋaani la ga doun ɲɛgi ga ti naa ɠɛ bɛ, nii tɔgi bogai, 28 Simiyɔn daani yeezu, é GALA maamusɛ, é ɠɛ ma: 29 «Màliɠii, ɗa-minazeɠegi laazeelia niina,ɗa-wotiɠɛ nui yɛ ná niina, é li ziilɛigi zu. 30 Mazɔlɔɔ gàazuʋɛ kizogi ɠaa, nii è teʋegai, 31 nii è kɛʋele ɓɛtɛai ga nuɓusɛiti pɛ ti ka. 32 Tɔ ɠa é ga wozakalagi, é faaɠaaɠai ve zii ɠiligiti bɛ,é ɠɛ ga lɛbiyai ɗa-nuɓusɛiti bɛ, Izilayɛle nuiti.» 33 Deeni ta kɛɛɠɛ ti laavɔɔni ga naa, nii é ɠɛni wosu ná-faa zu. 34 Simiyɔn tuya looni ti ʋɛ, é ɠɛ doun dee Mali ma: «Suɠwɛɛ ga doungoi nii leʋegɛ ga é ɠɛ ga Izilayɛle nui ma mɔinmɔin too zaɓui, ɓaa tanigaa wuzeɠe zaɓui. Toɠa ɠɛ ga poogi nii nuiti ta sakpe, 35 koozu ɠisiɛi niiti ti lɔɔɠuai nui ma mɔinmɔin ziima, naa ɠa ɠula kɛlɛma. Ɗa ɓɔɠɔi mu, è-yii ɠa ɠɛ eɠɛ boɠa zɔkpɔi a baaɓota.» 36 GALA goo wo anzanui ta ɓalaa ɠɛni ná, daa ga Ane, é ɠɛni ga Fanuwɛle ná-doun anzanui, Asɛɛl wolodamai ta ɠɛni de. É wɔlɔzaɠani niina, kona dɔfelai ʋoluma nii ti kɛɛni ʋa ta sinigi ná-anzalopo ziɛgi zu. 37 É yɛni poanzayai zu, é kona ʋuulɔsaʋa maazu naanigɔ (84) zɔlɔɔ. É la ɠɛni zeɠezu pɛ GALA sei ʋɛlɛi wu, kpidi ʋɛɛ folo ʋa é ɠɛni GALA dɛbizu ga zu sogai ta GALA faliiti. 38 Tɔ ɓalaa é ʋaani naama yeeɠɛɠalai nɔ zu, é tɔɔzei ga GALA maamusɛa, ta é ɗa doungoi ná-fai laazeeli naama nuiti pɛ ma, niiti ti ɠɛni Zeluzalɛme ná-unmɔɔgi maaɓɔunsu kitogi zu. 39 Yesu zɔlɔɔ nuiti kpegai ma ga Maliɠii ná-tɔgi ná-devei zu vaiti pɛ kɛ, ti ɠaleni ma Galilé yooi zu, ta-laazuʋɛ Nazalɛte. 40 Doungoi ɠɛni wɔɔlɔzu, sɛbɛi ɗa ɓaɠo. Daaveni ga ɠimalai, GALA ná-zaalai ɠɛ ma. 41 Kona-o-kona Yesu zɔlɔɔ nuiti ti ɠɛni liizu Zeluzalɛme Pake|Pakegi fɛtii zu. 42 É kona puugɔ maazu felegɔi (12) zɔlɔɔgai ma, ti pɛ ti liini, eɠɛʋelei nɔ fɛtii ma vai ɠɛni ɠɛɛzu la pɔlɔma. 43 Fɛti voloiti kpegai ma, ti pele zoni ga ti ɠale ma, kɛlɛ zunu loungoi Yesu yɛni Zeluzalɛme, sɔlɔɔ nuiti ti la looni ga naa. 44 Ti ɠɛni ɠisiɛzu ga toɠa ti-ziɛɲɔɠɔiti polu, ti folo ɠila siɛ woni, ti ɗa gaiziɛ ta-nuiti ta ti-ɠaazuɠwɛɛgiti saama. 45 Kɛlɛ ti la ɠɛni kaani, eyɛsu ti ɠale ma ʋolu Zeluzalɛme, ti ɗa gaiziɛ. 46 Foloi zaʋasiɛi ti kaani GALA sei ʋɛlɛi wu, é zeini kalamɔinti saama, é ɗa woilo ti-woo ma, é ɗa ti ɠaazaɠa. 47 Zɔiti pɛ ti ɠɛni goomɛnisu, ti laavɔɔni ga ná-keleɠelegi, ta gooɠaaʋotegi niiti é ɠɛni ti veezu. 48 Sɔlɔɔ nuiti ti kaai ma, ti laavɔɔni ga gola, dee ɠɛ ma: «Dòun, lee ɠa è kɛai ga giye? Gi yii ɠɛa zoolɛzu, gá è-ɠɛɛ gi ɗa è ɠaiziɛ.» 49 É ɠɛni ti ma: «Lee vaa zu wo ɠɛa gàiziɛzu? Wo la suɠwɛɛni ɓaa ga kɛni gè ɠɛ Kɛ̀ɛ ná-pɛlɛi wu?» 50 Kɛlɛ ti la ɠɛni ná-kpɔɛi naa ɠaaɠaani, nii é ɠɛni bosu ti ma. 51 É ʋilɛni ti ʋolu, ti yei, ti li Nazalɛte. É ɠoloni ti ʋɛ. Dee ɠɛni naama vaiti kpein makɛsu ɠisu. 52 Yesu ɠɛni wɔɔlɔzu, é ɗa li luɠɔ ɠimalai zu, ná-fai ɗa li ga nɛa GALA ta nuiti bɛ.