Proverbs 15 (TOMA)

1 Gooɠaaʋote pagɔi ɠa ɗa ziiɠulagi ɠaayei,kɛlɛ nu maawana ɓɔɛi ɠa ɗa kpɔɛi zuwɔɔlɔ. 2 Zɔi é kalagi wosu ga ɠimalai, toɠa ɗa kala wɔin ɠɛ nu ma,kɛlɛ ɠimalala nui ɠa ɗa ɠimalala vaiti nɔ wo. 3 Ɠɔoɠɔ GALAGI ɠaazuʋɛ ɠa adaʋɛ pɛ,é ɗa nu ɲɔiti ta nu ʋagɔiti sumɔ. 4 Nu laawoo ʋagɔiti kɛɛʋɛ eɠɛ zɛnvu wulu wolai,kɛlɛ faa ɲɔu ɠɛ nɛgi ɠa ɗa ziiɠoloɠologi ɠɛ. 5 Ɠimalala nui ɠa ɗa kɛɛɠɛ ná-tɛnɛ gooiti pɛlɛʋɛlɛ,kɛlɛ zɔi é yeezeizu zelilomai wu, naa ɠa ɓɔɠɔ lɛɛzu ga ɠima nu. 6 Naavolo mɔinmɔin ka é telebo nui ná-pɛlɛi wu,kɛlɛ nii kpein nu ɲɔi sɔlɔɔsu, toɠa ɗa ɠɛ ga ziizoolɛi ma ungi. 7 Ɠima nuiti daawooi ɠa ɗa faaɠwɛgi vaza,kɛlɛ faaɠaaɠalala nuiti ziimaʋɛ la ɠana. 8 Ɠɔoɠɔ GALAGI maaɲɛɛi ɠa ga faa ɲɔu ɠɛ nuiti ta-zalaɠaiti,kɛlɛ sɔle nuiti ta-ƓALA maanɛɛnɛ wooiti nɛɛʋɛ bɛ. 9 Ɠɔoɠɔ GALAGI maaɲɛɛi ɠa ga faa ɲɔu ɠɛ nui ziɛ ʋelei,kɛlɛ naama nui nɛɛʋɛ bɛ, nii é ʋilɛsu telebodai ʋolu. 10 Zɔi é zeɠezu faa ʋagɔi ʋolu, faa wola ɠa la ma ga maaɠolo,zɔi é zelilomai wɔinzeɠezu, naa undaa ɠa ʋili. 11 Ɠɔoɠɔ GALAGI gɔvɛalaazu ta undaaʋili zeɠezaɠai, zu vaiti kpein kwɛɛ,nuɓusɛiti zii ɠwɛɛ fai ɠa ga leeni tɔun bɛ! 12 Waso nui nɛɛbɛ vaa la ga nu zelii lo ma,é la ɗa ga li ɠima nuiti pɔ bɛ. 13 Koozunɛɛi ɠa ɗa nu ɠaazuʋɛ volo,kɛlɛ ziiɓɔlɔi ɠa ɗa nu ɠaalɛi. 14 Keleɠele nui ɠa ɗa ɠaaɓa faa maaɠɔli vai ma yeenɔpɛ,kɛlɛ ɠimalala nui ɠɔnɔgi ɠa ɗa ɠɛ ga ɠimalala vaiti nɔ. 15 Maanɔɠɔ nui zii ma voloi kpein ɲɔuʋɛ,kɛlɛ zɔi undaanɛai, naa ɠa ɗa ɠɛ fɛti ɠula vai laawu nɔ ɠɔ. 16 Fizɔgɛ nu ɗa ani go nɔ zɔlɔɔ, è ɠɛ ga Ɠɔoɠɔ GALAGI ɠaazuluaba nu,è ʋa li naavolo wola zɔlɔɔsu, nii ziiɓɔlɔi polu. 17 Fizɔgɛ nu tufa wuulugi ma laamii wo, kpɛtɛai nɛɛbɛi zu,è ʋa li nikɛ wulɔi miizu, ni wɔinzeɠemai ɠa ná. 18 Ziiɠula nui ɠa ɗa kpɔɛiti suwɔɔlɔ,kɛlɛ zɔi ziiɠaa la wana fala, naa ɠa ɗa sakpegiti gaayei. 19 Ɲaka nui ná-pelei ɠɛɛʋɛ eɠɛ ɠain sasai,kɛlɛ sɔle nuiti ta-ʋelei ɠaa ɠa sɔli. 20 Ɠima loun zunui ɠa ɗa kɛɛɠɛ ɠoozunɛ,kɛlɛ faaɠaaɠalala zunui ɠa ɗa dee ʋɛlɛʋili. 21 Ɠimalalai ɠa ga koozunɛɛi naama nui ʋɛ, nii balagai faaɠaaɠai ma,kɛlɛ zunui keleɠelegai, toɠa ɗa ziɛ sɔledai zu. 22 Faa mɔinmɔin ka ɗa ɠazaʋi, ti la zolooga tɔɔzei gaazaɠatalai ʋa,kɛlɛ ti zu ɠa ɗa ɓɛtɛ, ni tɛnɛbo nua ta ná. 23 Koozunɛ vaa ʋe zunui ʋɛ, siɛgi zu é ɓɔɠɔ wooɠaaʋotegi veezu la,ziilɛi faa ʋe, ni kpɔɛi a wona ga bo yeeɠɛɠala! 24 Keleɠele nui ɠa ɗa ziɛ ga pelei, nii é lɛɛzu geezuʋɛ zɛnvui ʋɔ bɛ,naa ɠa kizosu gɔvɛalaazu ma, nii é buu ʋelei. 25 Ɠɔoɠɔ GALAGI ɠa ɗa waso nuiti ta-ʋɛlɛi ɠoloɠolo,kɛlɛ toɠa ɗa ɓaa poanzai ɠɔligiti maazu. 26 Ɠɔoɠɔ GALAGI maaɲɛɛi ɠa ga kisiɛ ɲɔiti,kɛlɛ kpɔɛ ʋagɔiti ka a ɗa va ti wu. 27 Zɔi é wɔinni ʋele-o-ʋele, é ɓɛtɛ, toɠa ɗa ná-pɛlɛyeɠei lɔ kpɔlɔi zu,kɛlɛ zɔi é lobɛanii wɔinzeɠezu, naa zii zu ɠa ɠooza. 28 Telebo nui ɠa ɗa ɠigaiziɛ, aisa é ʋa gooɠaaʋotegi ve,kɛlɛ faa ɲɔu ɠɛ nuiti ta ɗa faa ɲɔi vaza ga laaʋɛ. 29 Ɠɔoɠɔ GALAGI maaɠoozaʋɛ faa ɲɔu ɠɛ nuiti ba,kɛlɛ toɠa ɗa woilo telebo nuiti ta-maanɛɛnɛ wooiti ma. 30 Nuɓɔɠɔlai ma ɠaazuʋɛ ɠa ɗa koozunɛɛi ve,nui a woo niinɛ ʋagɔi mɛnina, toɠa ɗa iɲɔdɔ, é zeeli ma ɠaeiti ma. 31 Zɔi é woilosu tɛnɛ gooiti ma, ta ɓɔ ba etea ziɛi zu,naa zeizu ɠa ɠima nuiti saama. 32 Zɔi é ɠɛlɛzu ga zelii mina lo ma, naa ɠa ɓɔɠɔ ʋɛlɛʋɛlɛsu,kɛlɛ zɔi é woilosu tɛnɛ gooiti ma, naa ɠa ɠi pagɔiti sɔlɔɔ. 33 Ɠɔoɠɔ GALAGI ɠaazuluabai ɠa ɗa nu ɠala ga ɠimalai,aisa nu ʋa lɛbiya zɔlɔɔ, kɛni è ɓɔɠɔmaayei pɛ.

Proverbs 15 (TOMA)

In Other Versions