Proverbs 15 (YALU)

1 Yabi faɲin xɔlɔn ɲanma nɛn,koni fala xɔlɛn xɔlɔn fari saan nɛn. 2 Fe kolonne falane kolonna nan sɛnbɛ soma,koni daxuya falan nan minima xaxilitaren dɛ han! 3 Alatala yɛɛn yiren birin na,a muxu ɲaxine nun muxu faɲine rakɔrɔsima. 4 Fala faɲin luxi nɛn alo siimaya wudina,koni yanfantenya falan muxun niin nan tɔrɔma. 5 Xaxilitaren fafe a kawandi xuiin mi rafan a ma,koni naxan a tuli matima a sɔnna fala muxun na,xaxilimaan nan na ra. 6 Nafulu gbeen luma nɛn tinxin muxuna banxini,koni muxu ɲaxine sɔtɔ seen fama kɔntɔfinla nan na. 7 Fe kolonne falane kolonna nan naxuyama ayi,koni xaxilitarene bɔɲɛn mi na kiini. 8 Muxu ɲaxine saraxan findixi haramun nan na Alatala xa,koni muxu faɲine maxandin nafan Alatala ma. 9 Muxu ɲaxine kiraan naɲaxu Alatala ma.Koni naxan tinxinna fenma na rafan a ma. 10 Naxan na kiraan beɲin,na kanna xuruma nɛn ki xɔdɛxɛni.A mi rafan naxan ma a sɔnna xa fala,na kanna faxama nɛn. 11 Alatala laxira nun yahannama yiren birin toma,e faxi fa naxan muxun bɔɲɛni! 12 Maxadin mi rafan magele tiin ma,a mi sigama fekolonne fɛma. 13 Sɛwan yɛtagini yalanma nɛn,koni nii yifɔrɛn fama bɔɲɛ kalan nan xɔn. 14 Xaxilimaan kolonna nan fenma a bɔɲɛni.Koni daxuya falan nan tun xaxilitaren dɛ. 15 Yiigelitɔne siimayaan findixi tɔrɔn nan na,koni naxan bɔɲɛ sɛwaxi,na luma ɲaxanxi nɛn waxatin birin. 16 A fisa i ndedi sɔtɔ i lu Alatala yɛɛragaxuni,benun i xa nafulu gbeen sɔtɔ kɔntɔfinli. 17 Bogi seene gbansanna donna fisa xanuntenmane tagi,dangu ɲinge raturaxin suben donna ra xɔnnantenyani. 18 Muxu bɔɲɛ gbeen yɛngɛn nan nakelima.Koni muxu diɲaxin tan yɛngɛn naxunbelima nɛn. 19 Muxu narixina kiraan nafexi ɲanle nan na,koni muxu faɲina kiraan malaxun nɛn. 20 Dii xaxilimana a baba rasɛwama nɛn,koni xaxilitarena a nga xurunma nɛn. 21 Xaxilitareyaan findixi sɛwan nan na xaxilitaren xa,koni xaxilimana kiraan tinxin nɛn. 22 Maxaditareyaan nan fe yitɔnxine kalama,koni e sɔnɔyama nɛn xa maxadi tiine wuya. 23 Sɛwan na ra muxun xa,a na yabi faɲin ti.Falan naxan tima a waxatini,na tɔnɔn gbo han! 24 Xaxilimana dunuɲa yi gidin kiraan tema nɛnhan kore xɔnna,a yi a tanga laxira ma. 25 Alatala wasodene banxine rabirama nɛn,koni a kaɲa gilɛna bɔxɔn danne luma nɛn e kiini. 26 Miriya ɲaxine mi rafan Alatala ma,koni fala faɲine sariɲan. 27 Tɔnɔ sɔtɔ ki ɲaxin nafan naxan ma,na kanna gbalon nan nasoma a denbayani,koni naxan mi dimi yi seene rasuxuma mayifuni,na siimayaan sɔtɔma nɛn. 28 Tinxin muxuna a mirima nɛn,benun a xa yabin ti,koni muxu ɲaxin fala ɲaxin nan tima han! 29 Alatala makuya muxu ɲaxine ra,koni a tinxin muxune maxandi xuine ramɛma nɛn. 30 Yɛɛ yiyalanna muxune bɔɲɛn nan nasɛwama,xɛrayaan fala faɲin muxun sɛnbɛ soma nɛn. 31 Naxan na a tuli mati maxadi xuine ranaxanye muxun nakisima,na kanna luma nɛn fe kolonne yɛ. 32 Naxan na tondi xurɛ,na mi rafan a yɛtɛn ma,koni naxan na a tuli mati a sɔnna fala muxune ra,na xaxinla nan sɔtɔma. 33 Fe kolonna sɔtɔma Alatala yɛɛragaxun nin,yɛtɛ magodon nan fama binyen na.

Proverbs 15 (YALU)

In Other Versions