Revelation 2 (TOMA)

1 «Sɛʋɛi ɠɛ, è teʋe Efɛze Egilisii ná-geezuɠeelai ma: ‹Wɛlɛ, zɔi somideɠa lɔfelaiti ti zoni zeezai ɠa, é ziɛzu zanu fitina zei ani lɔfelaiti saama, naa ɠa é nii wosu: 2 « ‹Gè è-ziɛ ʋeleiti kwɛɛ, ɗa-wotii, ta ɗa-yiilɔɔi. Gè kwɛni ga è la yeezeiɗa nu ɲɔiti bu: È naati suɠɔɠɔga, niiti ti ɓɔɠɔ ɠɛɛzu ga keelaiti, è kaani ga ta ga zɛɛ nuiti, ti la ga keela. 3 Ziilɔɔi ɠa è ya, è ɓɔlɔa nɔ̀un maaʋele ma, è la ɠɛni iɲɔteʋeni. 4 Kɛlɛ nii gè ma yelii losu è ma, naa ɠa é ga, è ɠɛlɛa nɛɛbɛi ʋa, é ɠɛni è-yiimaʋɛ mɔungi. 5 Naa ɠa é ba, ɠizɛ deɠɛmu è loozuʋɛ zu, è è-ziɛ ʋelei maavalibo, è kɛɛwotiiti kɛ niiti è ɠɛa ti ɠɛɛzu mɔungi zu. Ni naa laade, nà ʋaazu è ʋɔ, gè ɗa-vitina zei anii zeɠe losuʋɛ, ni è la è-ziɛ ʋelei maavaliboni. 6 Kɛlɛ anɛɛ naa ʋe, faa ʋagɔ ɠila ka è ya, ga ɗa naati kɛɛ vai wɔinzeɠezu niiti ti ʋilɛsu Nikola ná-kalagi ʋolu, nii nà ɓalaa gè wɔinzeɠezu. 7 « ‹Zɔi nɔpɛ goiyeɠe ba, naama nui naa mɛni, nii GALA Zɛnvui bosu Egilisiiti ma. Zɔi a pilɛ sɔlɔɔ, nà zɛnvu wului ma waai ve zea, é mi, nii é GALA ná-taa ʋagɔi zu.› 8 «Sɛʋɛi ɠɛ, è teʋe Simiiline Egilisii ná-geezuɠeelai ma: ‹Wɛlɛ, zɔi é ga ma mɔungi ta ma ɠaaɓelagi, nii é zaani ta é vulu su ʋolu, naa ɠa é nii wosu: 9 « ‹Gè ɗa-ɓɔlɔiti kwɛɛ, gè ɗa-ʋaladai ɠwɛɛ, kɛlɛ gaamazu, è ɓɛtɛʋɛ! Niiti ti ɠɛ ta ga Zuifuiti, kɛlɛ Zuifu la ga tiye, è-lɔɠɔi ti koloɠolosu, gè naa ɠwɛɛ, ta ga Setana lɛbi ʋɛlɛi ma nuɓusɛi. 10 Mina lua ga ɗa ʋaazu kpɔlɔi zɔlɔɔsu. Wɛlɛ! Inɛgi ɠa ʋaazu tanigaani pilisu kasoi ɠa wo zaama ga é ti zuɠɔɠɔ, wa maanɔɠɔi zɔlɔɔ gola folo puugɔ laawu. Ɠɛ ga wooɠɛɠila nu eyɛsu saai, masa bɔɔlɔgi é ga zɛnvu gelei, nà naa ve è ya naazu. 11 « ‹Zɔi nɔpɛ goiyeɠe ba, naama nui naa mɛni, nii GALA Zɛnvui bosu Egilisiiti ma. Zɔi a pilɛ sɔlɔɔ, saai velesiɛi la faa ɲɔu nɔpɛ kɛa la.› 12 «Sɛʋɛi ɠɛ, è teʋe Pɛɛlegame Egilisii ná-geezuɠeelai ma: ‹Wɛlɛ zɔi gaavele boɠa zɔkpɔ ɠaaligi zea, naa ɠa é nii wosu: 13 « ‹Gè è-zeizuʋɛ ɠwɛɛ, ná ɠa Setana ná-masa kpɔkpɔgi ná. È ɠiliʋɛ bà kpaan, è la ɠɛlɛni nà-kidaaleʋei ʋa, anɛɛ naama ziɛgi zu ti nà-zeelei Antipase ʋaani la wo ʋɔ bɛ, nii é ɠɛni ga wooɠɛɠila nui, naa ɠɛɛni wo ʋɔ bɛ, ʋɛ Setanai zeini ná. 14 Kɛlɛ fai tanigaani ta ná, gè ma yelii losu è ma, naa ɠa é ga, nui tanigaa ta è ʋɔ bɛ, ti ziɛzu ga Ɓalaame ná-kala gooi. Tɔ ɠa é Ɓalake ɠalani ga é kɔɠɔziɠa zaɓui la Izilayɛle nuiti tuɠɔ, ga ti suaiti mi, niiti ti ɠulaai ga zalaɠai kɔɔɠɔ ganigiti bɛ, ti ɓɔɠɔ lɔ koloɠologi zu. 15 Ɗa ɓalaagi zenɔ ɠana, nui tanigaani ta è ʋɔ bɛ, ti ziɛzu ga Nikola ná-kalagi. 16 È-ziɛ ʋelei maavalibo deɠɛmu. Ni naa laade, nà ʋaazu è ʋɔ bɛ ɠani nɔ, gè ti zakpe ga boɠa zɔkpɔi é ɠulazu dàaʋɛ. 17 « ‹Zɔi nɔpɛ goiyeɠe ba, naama nui naa mɛni, nii GALA Zɛnvui bosu Egilisiiti ma. Zɔi a pilɛ sɔlɔɔ, nà manegi ve zea, nii dɔɔɠuai, ta kɔtu ɠolegi, kɔtui nii daasei niinɛi zɛʋɛai ma. Nu ɠili nɔpɛ ge la kwɛɛ, kɛni zɔi é veezu zea.› 18 «Sɛʋɛi ɠɛ, è teʋe Tiyatiil Egilisii ná-geezuɠeelai ma: ‹Wɛlɛ, GALA Doun Zunui, gaazuɠɛzɛiti ti volozu eɠɛ abuzogi, kɔɠɔiti ti volozu eɠɛ kɔlu ɓɔigi, naa ɠa é nii wosu: 19 « ‹Gè è-ziɛ ʋeleiti kwɛɛ, ɗa-nɛɛbɛi, ɗa-wooɠɛɠiladai, ɗa-wotii, ɗa-yiilɔɔi. Gè kwɛni ga ɗa-ɠɛɛwoti ʋagɔiti mɔinʋɛ niizu, é leʋe mɔungi zu geleiti ba. 20 Kɛlɛ wɛlɛ, nii gè ma yelii losu è ma, naa ɠa é ga, ɗa Zezaɓɛle yɛsu ná, anzanui naa nii é ɠɛ toɠa ga GALA goo wo nu, é ɗa nà-botiɠɛ nuiti kaka ga ti ɓɔɠɔ lɔ koloɠologi zu, ti ɗa suaiti mi, niiti ti ɠulaai ga zalaɠai kɔɔɠɔ ganigiti bɛ. 21 Gè yeeɠɛɠala veeʋɛ zea ga é siɛ ʋelei maavalibo, kɛlɛ é la pɔ é ʋa ɓeteʋe ná-koloɠologi ʋa. 22 Naa ɠa é ba, nà ʋaazu pilisu ya betei zu, é la ná kidaaʋili golai zu, gè naati pɛ kpɔlɔ ɠana nɔ, zɔiti ti wɛɛnziɛgi ɠɛai ta tiye, kɛni ni ta ti-ziɛ ʋelei maavalibona, ti zeɠe ná-faa ɲɔiti polu. 23 Naa ʋoluma, nà ná-dointi pɛ paa, naazu Egilisiiti pɛ ta kwɛɛ ga gè nuiti ta-ɠisiɛiti ta ti yiima vaiti pɛ kwɛɛ. Nà wo ɠilagilagi pɛ sala é zoloo kɛɛwotii ma wo kɛɛni. 24 Kɛlɛ wɔun, wa Tiyatiil Egilisi nui zɔiti, wɔi wo la ɠilini ná-kala ɲɔiti ba, nii ti ɠɛɛzu ma Setana ná-dɔɔɠuzu vaiti, nà bosu wo ma ga gè la kasɔ ɠili daazu wo unma. 25 Kɛlɛ tama, nii é wo ya, à naa zo kpaan eyɛsu gè ʋa. 26 « ‹Zɔi a pilɛ sɔlɔɔ, é yɛ ziɛzu ga zìima vaiti eyɛsu gaaɓela, nà zobogi ve bɛ, é zei ziiti unda. 27 Toɠa lo ti luɠɔ ga kɔlu lukpɔi, eɠɛʋelei nu a ɗa pɔlɔ liɠii wolowolo la, zekana nà ɓɔɠɔi ɓalaa gè ma zobogi zɔlɔɔni la Kɛ̀ɛ ya. 28 Nà geelaalaosu zomideɠai ve zea. 29 « ‹Zɔi nɔpɛ goiyeɠe ba, naama nui naa mɛni, nii GALA Zɛnvui bosu Egilisiiti ma.›

Revelation 2 (TOMA)

In Other Versions