Romans 12 (TOMA)

1 Kɛ̀ɛleaiti, nà wo maanɛɛnɛzu GALA ná-maawɔinɠai maaʋele ma, ga wo ɓɔɠɔ ve GALA bɛ ga zalaɠai é vulua, ɲadegai, nɛai GALA bɛ. Naa ɠa é ga GALA dɛbi ʋele ɠitei, nii soloogai ga wo ɗa fe bɛ. 2 À mina ʋokɔɠɔ niima eteai zu vaiti ma, kɛlɛ à va bu wo valibo ga wa-ɠisiɛiti niinɛai maaʋele, wa zoo naazu wo GALA ziimai ɠaaɠa, nii pagai, nii nɛai bɛ, nii daazeeliai. 3 Zaalai nii GALA ge daa mà, naa maaʋele ɠa gè ɠɛɛzu la wo ɠilagilagi pɛ ma, tanɔpɛ ge mina ɠisiɛ ɓɔɠɔ zu, é ʋa teʋe kɛɛzu ʋa. Kɛlɛ kɛni wo ɗa kisiɛ ʋagɔi wo, eɠɛʋelei GALA ge kidaaleʋei ɠɔɠɔgai la, é gaaɠwɛ ɛsɛ pɛ ba. 4 Kpusɛ ɠilagi ʋaalobazuʋɛti mɔinʋɛ, kɛlɛ ti pɛ ti la boti zii ɠila kɛɛzu. 5 Zekana ade la, anɛɛ ni de mɔinʋɛ, de pɛ da ga kpusɛ ɠilagi, de ɠiliai Kilista ʋa, de ɠilagilagi de ɠiliʋɛ ɓɔɠɔ ʋa, eɠɛʋelei kpusɛi ʋaalobazuʋɛti ti la. 6 De-losuʋɛti ma vebɛaniiti ti la ɓɔni, eɠɛʋelei zaalai la feai ade ʋɛ. Ni GALA goo wo fai ɠa feai de ta ʋɛ, maanɛɛʋɛ, é naa ɠɛ, é zoloo kidaaleʋei ma. 7 Zɔi tosuʋɛ ga é boti ɠɛ, naa boti ɠɛ. Zɔi tosuʋɛ ga é kalagi wo, naa kalagi wo. 8 Zɔi é iɲɔdɔɔi wosu, naa iɲɔdɔɔi wo. Zɔi é faaɓɔɠɔi ɠɛɛzu, é kɛ ga faanɛɛi. Zɔi é totuɠɔlai ɠɛɛzu, é kɛ ga pagɔ. Zɔi é maanɔɠɔ nuiti gaazumaawɔinɠaazu, naa kɛ ga koozunɛɛi. 9 Wooveledai mina ɠɛ nɛɛbɛi zu. À faa ɲɔi wɔinzeɠe, wo ɠili kpe faa ʋagɔi ʋa. 10 À wɔin ga ɓɔɠɔ wo ɠilagilagi pɛ ga kɛɛɠɛloun nɛɛbɛi. À ɓɔɠɔ wɔɔlɔ, wo ɗa leʋe ɓɔɠɔ ʋa naa zu. 11 À ɠɛ ga botiɠɛ nu, wo mina ɠɛ ga dɔɔʋɛ nu. À botii ɠɛ Maliɠii ʋɛ ga wo-yiimaʋɛ pɛ. 12 À ɠoozunɛ wa-ɠitogi zu. À yiilɔɔ kpɔlɔi zu. À ɠaaɓa GALA falii ma yeenɔpɛ. 13 À ɓɔ GALA ná-nuiti ba ti-maavaiti su. À yeezei wɛɛinti bu yeenɔpɛ su. 14 À tuya loo naati bɛ, niiti ti wo wɔinzeɠezu. À tuyai loo, à mina foovoo loo. 15 À ɠoozunɛ wa naati, niiti ti ɠoozunɛai, wo wɔlɔ wa naati, niiti ti wɔlɔzu. 16 À zoloo su wo ɠilagilagi. À mina ɠisiɛ faa wolaiti su, kɛni faa goiti. À mina waso, wo ʋa ɓɔɠɔ leve ga ɠima nu wa ɓɔɠɔi wo ɠaazu. 17 À mina nu nɔpɛ ná-faa ɲɔi ʋotokula ga faa ɲɔi. À ɠaaɓa faa ʋagɔi ɠɛɛ vai ma ɛsɛ pɛ gaazu. 18 Ni toɠa zoo ɠɛɛzu, ʋelei wa zoo la da, à ɠɛ ziilɛigi zu wa nuɓusɛiti pɛ. 19 Nɛ̀ɛɲɔɠɔiti, à mina wɔnɔ ʋotokula wa ɓɔɠɔi. À GALA ná-ziiɠaawanai yɛ ná, é botii ɠɛ, mazɔlɔɔ sɛʋɛʋɛ GALA Sɛʋɛi zu ga:«Nà ɠa gè ga potokula nui,nà ɠa nà sala, Maliɠii wooi ɠana.» 20 Kɛlɛ:«Ni pului ɠa è zili nui ma, daamianigi ve zea, é mi,ni kpɔɔle wɔin ɠa ma, kɔ, é ɓɔɔle,mazɔlɔɔ ɗa ɠɛna naa ɠɛa,abulekaiti kana è puuzu unmaʋɛ.» 21 Mina va bu faa ɲɔi ʋa zobo sɔlɔɔ è ma, kɛni tɔun è ɠɛ ga zobo sɔlɔɔ nu faa ɲɔi ma ga faa ʋagɔi.

Romans 12 (TOMA)

In Other Versions