Romans 14 (TOMA)

1 Zɔi zɛbɛ la zea kidaaleʋei zu, à yeezei bu, wo mina ɗa ga ná-kisiɛiti ma lukpɔ ɠaaleʋe. 2 Mazɔlɔɔ ta ɠidaaleʋeʋɛ ga toɠa zoo é anii pɛ mi, tama zɔi zɛbɛ la zea kidaaleʋei zu, naa ɠa tufa wuluwulugiti nɔ miizu. 3 Zɔi é anii pɛ miizu, naa mina zɔi ʋɛlɛʋili, nii é la anii pɛ miizu. Zɔi ɓalaagi é la anii pɛ miizu, naa mina zɔi lukpɔɠaaleʋe, nii é anii pɛ miizu, mazɔlɔɔ GALA ge yeezeiɗa bu. 4 Ɓɛ ɠa ga ɗe, ɗɛi è è-waani ta-wotiɠɛ nui lukpɔɠaaleʋezu? É loni kpaan, ɓaa é looni, zɔi é botii ɠɛɛzu bɛ, naa ná-faa ɠana. Kɛlɛ toɠa lo kpaan, mazɔlɔɔ zobogi ɠa Maliɠii ʋɛ, é to kpaan. 5 Nui ta ɠa ɗa ɠisiɛ ga foloi ta leʋegɛ ta ʋa, taɠili ge ɠisiɛ ga foloiti pɛ ta ga ani ɠila. Ɛsɛ pɛ ge naa leve, é la da ɓɔɠɔ yiimaʋɛ. 6 Zɔi é foloi ta vizɔsu ta ʋa, naa ɠa naa ɠɛɛzu ga é Maliɠii lɛbi. Zɔi ɓalaagi é anii pɛ miizu, naa ɠa naa ɠɛɛzu ga é Maliɠii lɛbi, mazɔlɔɔ toɠa GALA mamasu ná-daamianigi vaa zu. Zɔi ɓalaagi é la anii pɛ mia, naa ɠa naa ɠɛɛzu ga é Maliɠii lɛbi, toɠa mamagi veezu GALA bɛ. 7 Tama de tanɔpɛ ge la zɛnvui wosu ɓɔɠɔ nɔ ʋɛ, nu nɔpɛ ge la zaazu ɓɔɠɔ nɔ ʋɛ. 8 Mazɔlɔɔ ni ada zɛnvui wosu, da zɛnvui wosu Maliɠii ʋɛ, ni ada zaana, da zaazu Maliɠii ʋɛ. Naa ɠa é ba, ade ɠɛni vulua, ɓaa ade zaani, ada ga Maliɠii nɔnɔiti. 9 Mazɔlɔɔ Kilista zaani, é vulu su ʋolu, ga é ɠɛ ga gɔvɛiti ta fulu nuiti Maliɠii. 10 Kɛlɛ ɗa ʋe, leeni vaa zu è è-ɠɛɛloin lukpɔɠaaleʋezu? Ɗa ʋe, leeni vaa zu è è-ɠɛɛloin ʋɛlɛʋilisu? Mazɔlɔɔ ade pɛ da ɠaalɔ GALA kakala ná-tukpɔɠaaleʋezuʋɛ. 11 Mazɔlɔɔ sɛʋɛʋɛ GALA Sɛʋɛi zu ga:«Maliɠii Ɠɔoɠɔ GALAGI wooi ɠana:Eɠɛʋelei gè vulua la ga ɠite,nuɓusɛi kpein ka ʋilɛ ɲiibiɠa, ti nɔkɔ bù,ti-nɛgiti ti GALA dɛbi.» 12 Naa ɠa é ba, de ɠilagilagi pɛ ka ʋoluvaawo GALA ma, tɔ ɓɔɠɔi ná-faa zu. 13 Ade ɓe deɠɛmu ɓɔɠɔ ʋeelala vai ʋa, de ɠilagilagiti. Ade deve tɔun ga de mina ɠɛ ga de-ɠɛɛloun ɠɔɠɔziɠa zaɓu, ɓaa too zaɓu kotoi zu. 14 Da-ɠilibalai zu da Maliɠii Yesu, gè kwɛɛ ga anii tanɔpɛ ge la ɠɔzɔni kpɛtɛ ʋelei ma. Kɛlɛ ni nui ta ɠa ɠisiɛzu ga anii ta ɠɔzɔʋɛ, naa ɠɔzɔʋɛ tɔun bɛ. 15 Ni ɗa è-ɠɛɛloin yiiɓɔlɔna daamiani fai nɔ zu, è la mɔ ziɛzu ga nɛɛbɛi. Ɗa-laamiani fai mina ɠɛ ga zaɓu, è ʋa naa undaaʋili, nii Kilista zaai ná-faa zu. 16 Nii pagai è ɠaazu, naa mina ɠɛ tanigaani bɛ ga zaɓui, ti ʋa ɗa woo ɲɔi wo è ma. 17 Mazɔlɔɔ GALA ná-masadai la ga daamii ta kpɔɔlei, kɛlɛ toɠa ga telebodai, ta ziilɛigi, ta koozunɛɛi, nii Zɛnvu Ɲadegai feezu. 18 Zɔi é botii ɠɛɛzu Kilista ʋɛ ga niima ɠɛʋelei, naama nui ná-fai ʋagɛ GALA gaazu, nuiti ti la peelalaa. 19 Naa ɠa é ba, ade naama vaiti gaiziɛ yeenɔpɛ, nii a ɠɛ ga ziilɛigi, é ɓɔ de ʋa, de li luɠɔma kidaaleʋei zu. 20 À mina GALA ná-botii ɠoloɠolo daamianigi ná-faa zu. Gaama ʋe ga daamianigi pɛ ka zoo miizu, kɛlɛ toɠa ga faa ɲɔu, è anii ta mi, naa ɠɛ ga è-ɠɛɛloin loa kotoi zu. 21 Nii fizɔgai, naa ɠa ga è mina suai mi, è mina dɔɔi ɓɔle, è ɠɛlɛ naa pɛ ba, nii a zoo è è-ɠɛɛloin loo kotoi zu. 22 Nii è laai da kidaaleʋei zu, naa makɛ ɓɔɠɔ ʋɛ GALA gaazu. Undaanɛ nu ɠa ga naama nui, nii é la ɓɔɠɔ ʋeelalazu ɠaazu ná-deveiti su, é ti wosu! 23 Kɛlɛ zɔi inɛinɛgi ziimaʋɛ, é lo daamianigi ʋa é miizu, naa peelalai zɔlɔɔga, tɔɔzei é la mɔ kɛɛni ga kidaaleʋei. Tama faa nɔpɛ é ɠɛɛzu, é la ɠɛɛzu ga kidaaleʋei, naa ɠɛa ga kotoi.

Romans 14 (TOMA)

In Other Versions