Deuteronomy 29 (YAPE)
1 Irera’ e pi thin nu lan fare m’ag ni yog SOMOL ngak Moses ni nge ngongliy u thilin Got nge girdi’ nu Israel u lan fare nam nu Moab; ngan puthuy gubin e tiney ko fare m’ag ni ngongliy SOMOL u thilrad u daken fare Burey ni Sinai. 2 Me pining Moses e girdi’ nu Israel nga ta’bang ni yad gubin me ga’ar ngorad, “Kam guyed nga owchemed e tini rin’ SOMOL ngak fare pilung nu Egypt, nge pi tolang ko salthaw rok, nge re nam nem ni ga’ngin. 3 Kam guyed gubin mit e gafgow nib gel nge pi maang’ang nge pin’en nma balyang an’uy ngay ni i ngongliy SOMOL. 4 Machane ke mada’ ko bin daba’ e rran ma dawori tamilangnag laniyan’med ngam nanged fan e pin’en ni kam marod u fithik’. 5 Aningeg i ragag e duw ni pow’iymed SOMOL u daken fare gi ted ndar tugul ban’en riy; ma de mogchoth e mad u dakenmed, ma de math’math’ e sus u rifrifen aymed. 6 Dariy e flowa ni um ked, ara wayin nge biya ni um unumed, machane urngin e tin nib t’uf romed ma i pi’ SOMOL ngomed, ni bochan e ngam filed riy ni ir e Got romed. 7 Ma nap’an nda bad ko re gin’ey me yib Sihon ni Pilung nu Heshbon nge Og ni Pilung nu Bashan ni ngar chamgow ngodad. Machane da gelgad ngorow, 8 ma gadad fek e binaw rorow ngad f’othed rok e pi ganong rok Ruben nge Gad, nge baley ko ganong rok Manasseh. 9 Ere mu folgad ngu’um yulyul’gad ko gubin e thin ko re m’ag ney, ya nge urngin e tin ra um rin’ed mra aw ni bfel’. 10 “Daba’ e gimed be sak’iy u mit SOMOL ni Got romed, ni gimed gubin — nge pi tayugang’ nge pi ga’ ko salthaw, nge pi pumo’on, 11 nge ppin, nge pifakmed, nge pi girdi’ nu boch e nam ni yad be par u fithik’med, yad be masey l’ud ma yad be mal’ing ran romed. 12 Gimed bay u roy e daba’ ni ngam uned nga langgin fare m’ag ni fare SOMOL ni Got romed e ke ngongliy u thilmed, ma ngki fel’ u wun’med e pin’en ni yagagen e re m’ag ney. 13 Ya nge yag ni taymed SOMOL e bin daba’ e rran ni gimed e tirok e girdi’, me par ni ir e Got romed ni bod ni micheg ngomed nge pi ga’ romed i Abraham nge Isak nge Jakob. 14 Gathi kemus ni gimed e ke ngongliy SOMOL e re m’ag ney u thilmed nge pin’en ni yagagen. 15 Ya ku be ngongliy fare m’ag u thildad ni gadad gubin e pi’in gadad be sak’iy u roy u p’eowchen e daba’ nge pi’in owchedad ndawor ra sumgad. 16 “Ki gimed manang rogon e par ni ud ted u Egypt nge rogon nda milekaggad i yan u lan e binaw u boch e nam. 17 Kam guyed e pi liyos nrib kireb ni yad ma meybil ngay nni ngongliy ko gek’iy, nge mlang, nge silber, nge gol. 18 Ngam fal’eged i leamnag nge par ndariy be’ nib mo’on, ara be’ ni bpin, ara ba tabnaw, fa reb e ganong ni be sak’iy u roy e daba’ ni nge pigicheal nge pi’ keru’ ngak SOMOL ni Got rodad, ngi i tayfan e pi got rok yug boch e nam. Ya ra bod ba lik’ngin ni thay e nof riy nge ilal nib mo’oy mab yub. 19 Nopa’med ni dariy be’ u roy e daba’ ni be rung’ag e pin’ey ni kan ta’chiylen ni nge pagan’ ngak ni ir e dariy ban’en nra buch rok, ni yug aram rogon nib gelan’ ma beyan nga fiti laniyan’. Fa’anra aram rogon mra math owchamed ni gimed gubin, ni pi’in ni bf’el nge pi’in kireb ni ta’reb rograd. 20 Dabi n’ag Got fan rok e cha’ nra rin’ e biney. Ya damumuw rok SOMOL e ra daramram nib togopluw ngak, ma urungin e pi gafgow ni kan yoloy ngalan e re ke babyor ney e go’ ra aw ngak nge mada’ ko ngiyal’ ni ka ri thirif SOMOL facha’ u but’. 21 Bayi gechignag SOMOL facha’ u mit urngin e pi ganong nu Israel ya ngar filed ban’en ko tin ke buch rok. Ma bayi pag SOMOL e gafgow ni bod rogon ni kanturguy u gubin fapi buchwa’athan ni kanog u lan fare m’ag, ni kan yoloy ngalan e re ke babyor ney ko tin kefil SOMOL ngodad. 22 “Tin bay i yib e mfen ni pi’in owchemed nge pi girdi’ nu boch e nam nib palog e bay ra guyed e pi riya’ nge gafgow ni bayi pag SOMOL nge yib nga daken e nam romed. 23 Pi yungi milay’ e bayi par ndakuriy ban’en ni bfel’ ngay ya ke upunguy e sulfur nge sol. Dariy ban’en ni yira yung riy, mus ko pan ma ku dabki tugul riy. Nam romed e bayi par nike bod fa gali binaw nu Sodom ngu Gomorrah ni bay u Admah ngu Zeboiim, ni fa’a ni thirif SOMOL u but’ ko fangiyal’ ni kari damumuw. 24 Ma aram e ga’ngin e fayleng ni bay ra fithed ni lungurad, ‘Mangfan nike rin’ SOMOL e ren’ey ko nam rorad? Mang tapgin ni kari damumuw?’ 25 Ma ba’aray e fulweg riy, ‘Bochan e ke th’ab e girdi’ rok SOMOL fare m’ag ni ngongliy u thilrad, ni fare Got rok e pi ga’ rorad kakrom, ni ir e fekrad nga wuru’ yu Egypt. 26 Kar pigpiggad ngak yug boch e got ni dawor ra tedfan bi’id, ni fapi got ni dabun SOMOL ni ngar meybilgad ngorad. 27 Ere ke damumuw SOMOL ngak e girdi’ rok ke pag fapi gafgow ni gubin ni kan yoloy ngalan e re babyor ney ke aw nga daken e nam rorad. 28 Kri damumuw SOMOL nib gel, ma gelngin e damumuw e ke pugrad u daken e nam rorad nge yin’rad nga daken yug reb e nam, ma aram e gin yad bay riy ke mada’ ko daba’.’ 29 “Bay boch ban’en nike tay SOMOL ni Got rodad nib mith rorad; machane ke dag ngodad e Motochiyel rok ni gadad nge pi’in owchedad e ngad folgad riy ni manemus.
In Other Versions
Deuteronomy 29 in the ANTPNG2D
Deuteronomy 29 in the BNTABOOT
Deuteronomy 29 in the BOHNTLTAL
Deuteronomy 29 in the BOILNTAP
Deuteronomy 29 in the KBT1ETNIK
Deuteronomy 29 in the TBIAOTANT