Hebrews 6 (BBT1E)

1 Cho gethek de iweg muyua pha jihà wuii ne, igobi pha Masipho mua ji shii gethek ne idoh ruiimuii haro. Gethek ne awie pha blia è khid ne chiih-è Hamangkhung-aphuii ro migi rek jong; 2 khowothek nane wad ruii ne sia pha mua chiih-è iy ne hòi din chiih-è idang pha chuathek, hì thek shii din ne gai sarong arab haro; 3 Hamangkhung-aphuii è chid arone cho gethek de ibi wuii! Chiih-è gethek ne hì rek haro. 4 Hanyie è awaithek migi shii thoh pho shii khi-è rek ne lubukhid din muii phlei? Ithek luang jia Hamangkhung-aphuii muchuang shii um; ithek ne hamangkhung pha lasen shii chai chiih-è Ragung So pha mathang shii choi; 5 ithek ne Hamangkhung-aphuii ro miyaogam ji ne wie rone ley pha ji è ìdjong, chiih-è ithek ne thog ramuii pha Ishak pha bluthek shii than. 6 Chiih-è chiihphado ithek ne migi shii thoh muii! Ji-è ithek shii ne lubukhid din yi pha ne lumuii oi ro, nyieliieshii ithek ne Hamangkhung-aphuii ro Dufuii shii din è bai shii ziindin yi chiih-è limiang moi shii wo pha khia din yie. 7 Hamangkhung-aphuii è nyiak shii khirzey phi nyie shii blebbleb chiih pha haphie ji è niing chiih-è hanyie shii haipha ai blia rey muii sapho pha misiengthek shii sieng yie. 8 Jishii migemthek nane saingthek ji sieng arone ji ne nyie blia oi; hì ne Hamangkhung-aphuii è thamai pha buii ro chiih-è ji ne bai è hùb ruii phro. 9 Jishii ijakthek wo, gathek ne hì duiine ne yao magunde, nathek chiang shii gethek ne migi rek. Nathek ro giawo pha wie khirzeythek um rone gathek ne thieg. 10 Hamangkhung-aphuii ne haro ahan ro. Nathek è aishii miie pha doh yi chiih-è thuh de nathek è gai shii nong ramuii pha blia ji ne ai khuchung de abia phro. 11 Gathek ro Bajobo yang pha ji ne nathek zab jia è chid pha ji ne idohhè thog pha rek ne rai bo, ji è nathek è luthong pha manathek ne zai thog ruii phro. 12 Gathek ne nathek shii skhad-ajo pha rey yi pha ayang ro, jishii hanyiethek è migi rek chiih-è lubu phiang rek pha duiine rek ne chiih-è Hamangkhung-aphuii è nyie sbang rek pha ji mua boh. 13 Hamangkhung-aphuii è airo sbang Abraham shii rab shii, ai è nyie sbang rek pha ji shii rek pha rone surua thak. Ji shii ne hanyie jia de awaithek è bajo boh oi ro, awai ro surua rab pha ishak shii ai è awai ro ibeng kho ne rab. 14 Ai è yao, “Gu na shii khirzey phi ruii chiih-è na shii bajo riingthek phi ruii phro ne, gu na shii sbang rek.” 15 Abraham ne lubuphiang, ji è ai ne Hamangkhung-aphuii è nyie sbangthek rek pha ji shii choi jong. 16 Gathek è surua thak shii, gethek è de bajo boh jia ro ibeng khoh ne thak, chiih-è surua è ne zab khnaingthek shii khriig rek phi. 17 Hanyie yi airo sbang shii choi pha rekpho ne ithek shii ne Hamangkhung-aphuii ne airo blia ji khuchung de alai phro ne gang è ìd yie pha yang ro; ji è awai ro surua ne sbang shii chohdo. 18 Chiihphado, hì shii ne nyi miyaothek ro, ji ne khuchung de alai muii chiih-è Hamangkhung-aphuii ne ji pha chiang è biidiie arey phro. Ji-è gethek ne ai rog shii ragia doh ne gethek ibi shii ruii phi pha luthong ji shii chuh khoh bone boh lububo rek phi ro. 19 Gethek ro chai pha jarog duiine ne gethek ne hì pha luthong um ro. Hì ne ragia nane izai ro, chiih-è hamangkhung pha misiahò pha yungshaig ji è dong ne zab so ithua hà khud dun. 20 Gethek chiang shii Isu ne gethek ibi hà wuii ne chiih-è phabi Melkhizedek lumuii shii, idang pha kho phabi rey dun.

Hebrews 6 (BBT1E)

In Other Versions