Hebrews 6 (TOMA)

1 Naa ɠa é ba, fai niiti ti ga Kilista laawooi zu vai ma ɠala mɔungi, ade naati zɛ lɛɛ ná dɛ, ade li luɠɔ faa ɓiigiti su, ade mina seɓasema la ga niinɛ ga: nu siɛ ʋelei maavalibo fai é zeɠe kɛɛwotiiti polu ti nu lɔɔzu saai zu, kidaaleʋei GALA ma, 2 ɲade fai ma ɠɛɛwotiiti ma ɠalagi, nu yeei la nuiti ma, gɔvɛiti buzeɠe vai, ta tukpɔi é ɠɛɛzu ga ɠɔoɠɔ kelei. 3 Naa ɠa ade ʋaazu kɛɛzu, ni GALA ka vaana bu. 4 Ade naati ta-vai ʋɛtɛna, niiti ti ɠalegai ma ʋolu ta-etea wɔlɔmai ma: Ti GALA ná-wozakalagi zɔlɔɔni. Naa ʋoluma ti geeɠɔlɔgi zu vebɛanii ɠɔɠɔ, ti tɔnɔ zɔlɔɔ Zɛnvu Ɲadegai zu. 5 Ti GALA daawoo ʋapagi wɔin ɠɛɛni. Etea niinɛi é ʋaazu, ti naa ná-zɛbɛi ɠaaɠa. 6 Naa pɛ poluma, ti ɠale ma ta-etea wɔlɔmai ma ʋolu. Naama nuiti, nu la mɔ zooga ti zeɠezu ti-ziɛ ʋelei ʋa, ti ʋa valibo. Tɔɔzei ta GALA Doun zunui ɓadɔzu ʋolu ga niina saa wului ma, ti zɛba ti yeeɠɛɠalai ve nu ɠiligiti zea ga ti GALA poomu kɛlɛi zu. 7 Tama, siɛgi zu zooi yɛɓɛzu la ga tonai é ʋuuzu ma valafala, é zɛba é siinziin ganigiti pɔnɔ, niiti ti zoloogai tii ɠɛɛ nui ma, GALA ka tuya loo ma yooi ma. 8 Kɛlɛ ɠain dɔɓɔi a wuzeɠena, ta ɠain guluiti, kulanuma la mɔ ɠɛa ba, su la ɠooza é voovoo, gaa ɠa ɓela ga abui lo ba. 9 Kɛlɛ nɛ̀ɛɲɔɠɔiti, anɛɛ ni gá ɓɔɛzu ɠani, gi laaʋɛ da ga wa pele ʋagɔi ma, nii soloogai kizogi ma. 10 GALA ge la ga telebotala ƓALAGI, é ʋa yeema wa-wotiiti ma ta nɛɛbɛi wo kulani kɛlɛma daaseigi ma vaa ma, ga botiiti wo ti ɠɛɛni, ta wo ba dɛ, wo ɗa kɛ ná-nuiti bɛ. 11 Kɛlɛ wɔin ɠa gi ma ga wo ɠilagilagi pɛ ge naa ɠɛɠala ɠaaɓaai wo, eyɛsu gaaɓela foloi zeeli, naa ɠa a kɛ wa-ɠitogi pɛ daazeeli. 12 À mina ɠɛ ga ɲaka nua, kɛlɛ anii niiti GALA ge minazeɠeai ga tiye, zɔiti ti ʋaazu tɔnɔ zɔlɔɔsu naati su ga ta-ɠidaaleʋei ta ta-yiilɔɔi maaʋele, à ʋokɔɠɔ naati ma. 13 Siɛgi zu GALA ge minazeɠegi woni da Abalaame ʋɛ, tɛi nu la ɠɛni ná, nii bɔɔlɔai tɔun ba, a la zoo ɠonazu ma, é ɠonani tɔ ɓɔɠɔi ma, 14 é ɠɛ ma: «La da ga nà tuya loozu è ʋɛ, gè è-mavofodai ɠaawɔɔlɔ.» 15 Abalaame maaɓɔungi woni ga ziilɔɔi. Naa ma, é naa zɔlɔɔni, nii GALA ge ma minazeɠegi woni. 16 Mazɔlɔɔ ni nuiti ta ɠɛna konai woga, ta ɗa ɠona naa ma, nii bɔɔlɔai tiya ɓɔɠɔi ti ʋa, konai ɠa a ɗa maaɠaalii ta kpɔɛiti pɛ kpe ti yɔɠɔzu. 17 Naa ɠa é ba, GALA ná-devei niiti ti la valiboga, é ɠɛni pɔ ga é naati dɛɛ ga naati, niiti é minazeɠeai ti ʋɛ ga tɔnɔi, é naa ɠulani kɛlɛma ga konai é boni. 18 Naazu é ade ʋilɛga faa felegɔ ɠakala, niiti ti la valiboga, niiti GALA ge la zooga zɛɛ wosu ti zu pɛ. Naama vaiti ta de ʋɛ ga iɲɔdɔɔ wola, dɛiti de faiti pɛ zɛgai ná, de kitogi naa zo kpaankpaan, nii ma minazeɠegi wogai ga é ve ade ya. 19 Kitogi naa ɠa ade ʋɛ, eɠɛ anii nii ade-yɛnvui lɔɔɓadɔgai ma, de laai da ta togai kpaan. Toɠa leʋesu, é lɔ ada ɲadegai ma ɠwɛpele seɠezuɠoozagi ʋoluʋɛ, 20 ʋɛ Yesu ɠɛai ga nu mɔungi é lɛ ná ade luɠɔ ade ma vaa ma. Toɠa ga zalaɠa ɠula ɠundiɠi wolai eyɛsu ɠɔ, eɠɛʋelei Mɛlekizedɛke ɠɛni la.

Hebrews 6 (TOMA)

In Other Versions