Mark 15 (BBT1E)

1 Hamiang riang shii boh Phabithek è thiig pha dukhothek chiih-è Iphey yua pha masdothek chiih-è zab limiangthek ne khthiie si srane phak rai. Ithek è Isu shii shiirnai è zoi srane Philathus moe hà noh ne, ai wad shii phi muii phro. 2 Philathus è Isu shii sai, “Na ne Jewthek pha saja bey?”Isu è aishii chang, “Na è nyie yao pha ji ne, ji chak ro.” 3 Jipha boh phabithek ne Isu shii bajo ichua yao ne nin dun. 4 Ji-è, Philathus ne aishii sai din, “Na ne chang pha nyie oi bey? Nuii bo, branthek è na shii awie pha nin pha ji ne ayoi bey?” 5 Ji è yao magunde, Isu ne miyaogam jia de ayao phi, ji è Philathus de wiengphleg dun ro. 6 Idang Hiìadun pha ji Sai pha itho shii ne Philathus è phatheg shii chab pha hanyie shii magunde bran jia shii branthek è lia pha ji thoh muii phro. 7 Jipha ishak shii Barabas beng pha bran jia yi phatheg hà chab muii phro, nyieliieshii ai è giak thek gak pha ji shii, gui ne bran ua muii pha chiang è phatheg hà chab muii phro. 8 Bran ibrog è Philathus shii khrab thog ne idang rek pha duiine phathegpho jia shii thoh bo è yao, 9 Philathus è ithek shii sai, “Gu shii ithek ne Jewthek pha saja shii se ne thoh bo ne yang bey?” 10 Philathus ne thieg muii, boh phabithek è Isu shii miegriie ne zum srane ai wad shii phi muii phro. 11 Jishii boh phabithek è ibrogthek shii nyiu ne yao srane Isu chiang shii, Barabas shii ichad thoh phi bo è Philath shii yao ba yi phro. 12 Philathus è ibrog shii sai, chiihphado gune nathek è Jewthek pha saja rone ho pha bran shii ne nyie rek bo è now lei? 13 Ithek è idoh ziak, “Aishii ne bai shii zun muii bo!” 14 Philathus è sai, “Jishii ai ne nyie ichiig rek phlei?” Ithek ne dinne de gang ziak, “Aishii ne bai shii zun muii bo!” 15 Philathus è bran ibrogthek wie than yi pha Barabas shii ithek chiang è thaluii thoh mage phro. Chiihphado ai è Roman siphahithek shii phi ne Isu shii chia yi srane chiih-è bai hà zun ne ua yi pha phi muii phro. 16 Siphahithek è Isu shii badri ro ithua pha muthua iliing hà noh srane, gai ijakthek shii de ò ho phro. 17 Ithek è Isu shii yung phiang ishaig guii phi srane migem è rab pha rago ai khrug shii khak phi phro. 18 Ithek è wad khung ne aishii yao, “Jewthek pha saja phiang sieng bo!” 19 Ithek è ai khrug shii muchang è thab srane, chiih-è ithek è aishii chan è cho phro, chiih-è, ithek lagiung niing srane aishii chiing phro. 20 Ithek è aishii makhak-riing ched mage shii, ithek è yung phiang than srane awairo yung idoh guii phi phro. Chiihphado ithek è aishii bai hà zun ne ua pha noh dun phro. 21 Lumuii hà ithek è Simon beng pha bran shii si, ai yi soh è rajan hà wuiiramuii shii, siphahithek è aishii de Isu ro bai nuang pha bangchiie rek phro. (Simon ne Syrene pha bran ro, chiih-è ai ne Alezandar chiih-è Rufus ro Aphuii ro). 22 Ithek è Isu shii Golgotha beng pha ithua hà noh dun phro, hì pha miyao ne gathong ithua rone yao phro. 23 Thiisa hà ithek è Isu shii riie pha ji them yi pha angurphuii shii myrrh lao ne phi pha bidiang shii, jishii Isu è niing pha anuii phi ro. 24 Chiihphado ithek è Isu shii sharo rek ne phey srane zun muii phro, chiih-è airo yung yi awaithek chung thang rai phro, chiih-è airo yung idum ji ne hanyie muii lei ne jigigam fen ne riig phro. 25 Hamiang ishak dige shii, ithek è Isu shii zun muii phro. 26 Ai khrug lakhung shii hì the pha miyao ji zey phro: “Jewthek pha saja ro.” 27 Ithek è mugopho nyi shii de Isu rog shii zun muii phro, jia shii Isu phawig hà, chiih-è jia shii Isu phazoi hà. 28 Jigigam shii nyie yao pha ji ne hì re dun phro, Branthek è Iphey anuii pho mirek shii rek pha duiine aishii de rek phro. 29 Lumuii shii lua ramuii pha branthek è khrug sid srane Isu shii gang è makhak-riing phro: “Ua! Nane Hamangkhung-aphuii ro Misiahò shii chuak srane da-uom shii rung din phi pha rek bidey ne! 30 Thuh shii thazam wuii srane nawai shii bai è ragia rek bo!” 31 Ji duiine, boh Phabithek chiih-è Iphey yua pha masdothek de Isu shii makhak-riing srane awaithek chung yao rai, “Ai ne gai thek shii ne ragia rek phi, jishii ai ne awaishii ragia arek-mua ara! 32 Cho Masi shii riig srane, Israel pha saja ne, thuh shii bai è thazam wuii mage arone, chiih-è gathek de aishii migi rek pha ro!”Chiih-è bran nyi hanyie shii yi Isu rog shii zun muii pha bran è de aishii makhak-riing phro. 33 Hanai duchoi shii zab pha soh ne igiia è chiieg dun phro, ji pha igiia ne ishak uom re dang dun phro. 34 Ishak uom shii Isu è gang è ziak mage phro, “Eloi, Eloi, lama sabakhthani?” Hì pha miyao siu ne, “Hamangkhung-aphuii, Hamangkhung-aphuii, nane gu shii nyie rek ne ji thoh muiii phlei?” 35 Thiichiih um pha giak branthek è ai miyao ji sang ayoi pha nuii srane chiih-è yao, “Yoi bo, ai ne Elija shii ho ramuii ro!” 36 Thiichiih um pha bran jia è ijuang shii rui duiine rek pha yung è jiang pha muchang phiang rog shii ran srane, phuii chiieng shii wo srane Isu ro sem shii wang ne yao, “Khan rai! Elija è wuii srane aishii bai è thazam noh phi pha de um phro, cho riig haro!” 37 Gang è ziak srane Isu iy dun phro. 38 Hamangkhung-aphuii ro Misiahò shii zun ne ruii pha yung de ijuang è yie ne ikhiing thog pha ji dun ro. 39 Arming dumuiithek thiichiih shii hanyie bai ibi shii riu pho ne Isu nyie khi-èrek ne iy dun pha ji doh phro. “Hì pha bran ne izai Hamangkhung-aphuii ro Dufuii chak ro!” Ai è yao. 40 Giak hò-amuiithek thiisa ìujia ruang è riig ne rai phro. Ithek ne Mery Magdalene, ikhuii Jems chiih-è Joseph, ro amuii Mery chiih-è salomethek ro. 41 Ithek ne Isu Galili hà ba shii ai rog luagieng ne nong phi pha branthek ro. Jerusalem è Isu rog shii wuii gieng pha gai hò-amuii de thiichiih shii bajo um phro. 42 42-43 Habjuang re mage shii, Joseph Arimathea wuii thog ruii phro. Ai ne limiangthek shii de ilab um pha bran ro. Chiih-è, Hamangkhung-aphuii ro Sajathua ji thog ruii phro ne khan ne rai pha bran ji ro. Hì pha inai ne (Jew Thung pha Inai saro pha ibi shii ro), ji-è Joseph arum pha Philathus shii wuii srane Isu siu ji lia phro. 44 Philathus è Isu iy jong dun pha mua yoi mage ne wieng dun phro. Ai è awai arming dumuii shii ho ne sai, “Isu iy pha ji ne ishak phiang re sha bey?” 45 Dumuiithek è yao pha idoh, Philathus è Joseph shii yao Isu ro siu ji nya yi dun bo. 46 Joseph è jiang yung pheg srane, siu shii thazam yi ne yung è jiang srane sak è chog pha wieng rab pha ji shii yi ne ruii muii phro. Chiihphado wieng cho shii bajo lubao boh thud ne kheb marui phro. 47 Chiih-è Mery Magdalene chiih-è Joseph ro amuii Mery de Isu siu-iy ji khi hà wieng lei ne sow ne riig wuii phro.

Mark 15 (BBT1E)

In Other Versions