Mark 15 (TOMA)
1 Sobuzobui, zalaɠa ɠula ɠundiɠiiti ta totuɠɔiti, naa ʋɛɛ tɔ kalamɔinti ba, ta tukpɔɠaaleʋe nu wolai mɔtaiti ba, ti gaalɛba ɠɛɛni, ti deve wo. Ti Yesu ɠilini, ti lii la, ti dɔ Pilate yeezu. 2 Pilate gaazaɠani, é ɠɛ ma: «Ɗa ɠa è ga Zuifuiti ta-masagi?» Yesu gooɠaaʋoteni, é ɠɛ ma: «Ɗa ɓɔɠɔi è boga.» 3 Zalaɠa ɠula ɠundiɠiiti ti ɠɛni maalɔɔzu ga faa mɔinmɔin. 4 Pilate gaazaɠani ʋolu, é ɠɛ ma: «Ɗɔun è la gooɠaaʋote feezu? Maalɔɔi pɛ ti bosu è laalɔɠɔma, ɗa ti mɛnisu nɛi?» 5 Kɛlɛ Yesu la mɔ ɠɛni gooɠaaʋoteni. Naa ɠa é Pilate laavɔɔni. 6 Pake fɛtii ɠula laa ɠilagila, Pilate ɓena kasoɠa nu ɠila pilɛ bɛbɛi ʋɛ, nii nɔpɛ a la maavalina. 7 Tama naama ziɛgi zu, zunui ta ɠɛni kasoi ɠa wutu teʋe nuiti saama, daaseigi ga Ɓalaɓase, ti soni, tɔɔzei nu ʋaa vai ʋa, wutugi ta zu. 8 Bɛbɛi ʋaani zou zɛʋɛ ɠundiɠii ná-koizuʋɛ, ti faaɓɔɠɔi naa zuvali Pilate ma, nii a ɗa kɛ ti ʋɛ pɔlɔma. 9 Pilate ti wooɠaaʋoteni, é ɠɛ ma: «Wa pɔ ga gè Zuifuiti ta-masagi ʋilɛ wo ʋɛ?» 10 Mazɔlɔɔ é suɠwɛɛni ga toloi maaʋele nɔ ɠa é kɛa, zalaɠa ɠula ɠundiɠiiti ti Yesu leʋega la pɔ. 11 Kɛlɛ zalaɠa ɠula ɠundiɠiiti ti lɔɔni bɛbɛi unsu ga naati ti Ɓalaɓase ʋilɛ fai zuvali. 12 Pilate ti ɠaazaɠani ʋolu, é ɠɛ ma: «Lee ɠa mu nà kɛ ga nii wo tolisu ga Zuifuiti ta-masagi?» 13 Ti wooɠulani ʋolu, ti ɠɛ ma: «Kpadɔ saa wului ma!» 14 Pilate ɠɛni ti ma: «Faa ɲɔi ɓɛgele ɠa é kɛai?» Kɛlɛ tɔun ti ɠɛni wola ɓainsu sɛsɛ, ti ɗa ɠɛ ma: «Kpadɔ saa wului ma!» 15 Tɛi Pilate ɠɛni pɔ ga é bɛbɛi yiima vai ɠɛ, é Ɓalaɓase ʋilɛ ti ʋɛ. É devei veeni ga ti Yesu loɠa ga kpakɔi. Naa ɓegai ma, é teʋeni ti ʋɔ kpadɔ vai zu saa wului ma. 16 Salaʋusuiti ti liini ga Yesu zou zɛʋɛ ɠundiɠii ná-koizuʋɛ, ti salaʋusu ɓulugi pɛ gaalɛ ba. 17 Ti zɛba ti seɠe ɓɔi golai ta loo kɔba. Ti ɠaingi vɛlɛni ga masa bɔɔlɔgi, ti dɔ unma. 18 Naa ʋoluma ti tɔɔzei ga ti ɗa laali ma, ti ɗa ɠɛ ma: «Ɗa ná, ee, Zuifuiti ta-masagi!» 19 Ti ɠɛni doɠazu nɔungi zu ga seeli kpakui, ti ɗa laaɗɛi ʋili ma, ti ɗa ʋilɛ ɲiibiɠa ga ti nɔkɔ bu. 20 Ti ɓegai ma ga ɲɛɛɠula su, ti seɠe wola ɓɔigi ɠulani kɔba, ti ná-seɠeiti too kɔba, ti ɠula la ga ti kpadɔ saa wului ma. 21 Zunui ta ɠɛni zeɠezu kpalagaʋɛ, Silɛne nu ɠɛni de, daaseigi ga Simon, é ga Alɛgezandele ta Lufuse ti-ɠɛɛ. Ti kɛɛni zea ga maaɓaa vaa ga kɛni é Yesu zaa wului zeɠe. 22 Ti liini ga Yesu adɛ ta, ʋɛ ná laaseigi ga Gɔlegota (nii poluʋɛ ga «unkala adaʋɛ»). 23 Ti dɔɔi veeni zea, nii supuai ga miilegi, kɛlɛ é la kɛɛni, é ʋa ta ɓɔle. 24 Ti kpadɔni saa wului ma. Naa ʋoluma ti ná-seɠeiti gaaɠwɛɛni ʋa ga kpakutoomai, ti ʋa kwɛɛ, nii ɛsɛ ka sɔlɔɔ. 25 Sobu lɛlɛi laaʋuusiɛi ma ɠa ti kpadɔni la saa wului ma. 26 Sɛʋɛi nii é ɠɛni saa ungi lɛɛzu, é zɛʋɛni naa zu ga «Zuifuiti ta-masagi». 27 Ti ti ɓadɔni ʋɔɔma saa wuluiti ma ta toosu nu felegɔ, gilagi ɠɛni zeezazu ʋelei, zɔi ɠɛ kɔʋɛzu ʋelei. 28 [Ʋele ɠana GALA Sɛʋɛi wooi ʋilɛni la su ga: «Ti gaalugɛ faa ɲɔu ɠɛ nuiti saama.»] 29 Zɔiti ti ɠɛni leʋesu ga ná ʋelei, naati ti ɠɛni ungi ɲiikpisu, ti ɗa poomu, ti ɗa ɠɛ ma: «Koo! Ɗɛi è GALA sei ʋɛlɛi ɠolozu, è to ʋolu folo saʋagɔ laawu, 30 ɓɔɠɔ ɠizona, è ɠula saa wului ma, è yei!» 31 Zalaɠa ɠula ɠundiɠiiti ɓalaa, naa ʋɛɛ tɔ kalamɔinti ba, ti ɠɛni ɲɛɛɠulazu su ɓɔɠɔ zaama, ti ɗa ɠɛ ma: «É zɔiti kizoga, kɛlɛ é la zooga é ʋa ɓɔɠɔ ɠizo! 32 Tɛigi é ga Kilista, Izilayɛle masagi, é yei na, é ɠula saa wului ma, gi ka, gá la da naazu!» Zɔiti ɓalaa ti ti ɓadɔni ʋɔɔma saa wuluiti ma ta tiye, ti ɠɛni ɲɛɛɠulazu su. 33 Foloi gaalɔgai ma, kpidii ʋɛɛni zooi zu ná pɛ, eyɛsu lɛlɛi zaʋasiɛi ma kpɔkɔ voloi. 34 Kpɔkɔ volo lɛlɛi zaʋasiɛi ma, Yesu kpee looni ga woo wola, é ɠɛ ma: «Eloyi, Eloyi, lama saɓaketani?» (nii poluʋɛ ga «Nà-GALAGI, nà-GALAGI, lee vaa zu è ɠɛlɛa bà?»). 35 Siɛgi zu ti naama wooi mɛnini da, zɔiti ti ɠɛni ná, naa tanigaa ti ɠɛni ma: «Wɛlɛ, toɠa Eli lolisu.» 36 Gila ge ɓizɛni, é seɠe ɓuɠai lɔ dɔɔ ɓodai wu, é gili seeli kpakui ʋa, é tete Yesu ma ga naa kpɔle, é ɗa ɠɛ ma: «À zɛna! Ada ka ni Eli ɠa ʋa, é kula ʋɛ.» 37 Yesu kpee wolai looni, naa ʋoluma niina zii loo. 38 Názu ɠa kwɛpele seɠezuɠoozagi nii é ɠɛni zɛlɛni GALA sei ʋɛlɛi wu, naa ʋalini la su fele, é zo ungaʋɛ, é yei buuʋɛ. 39 Wɔlɔme zalaʋusu ɠundiɠii nii é ɠɛni loni Yesu ɠakala, é naa zaa ʋelei ɠaai ma, é ɠɛni ma: «Gaamazu, zunui nii ɠɛa ga GALA Doun Zunui!» 40 Anzanui tanigaa ɓalaa ti ɠɛni loni ɠoozama, ti ɗa wɛlɛ ná ʋa. Naati saama, Magedala nui Mali ɠɛni ná, naa ʋɛɛ Zake goi ta Zoze ti-lee Mali ʋa, ta Salomé. 41 Tiya ɠa ti ɠɛni Yesu ʋolu, ti ɗa maaleʋebo kaite, siɛgi zu é ɠɛni la Galilé yooi zu. Anzanu mɔinmɔin kiligaa ti ɠɛni ná, niiti ti yɛni polu, ti lɛ Zeluzalɛme. 42 Tɛi kpɔkɔ voloi zeelini, dooɠo foloi ma ɠɛʋele ɓɛtɛ voloi ɠɛni de, nii é ga dooɠo foloi maaɲii, 43 Alimaté taazuʋɛ nui Zozɛfe ʋaani. É ɠɛni ga tukpɔɠaaleʋe nu wolaiti ti ɠila, unfema nu wolai ɠɛni de. Tɔ ɓalaa é ɠɛni GALA ná-masadai ʋaa vai maaɓɔunsu kitogi zu. É yiiɓaani, é li Pilate ʋɔ bɛ, é Yesu ma ʋoomai maavali ma. 44 Pilate laavɔɔni ga é mɛni ga Yesu zaa ɠɛni de niina. É salaʋusu ɠundiɠii lolini, é gaazaɠa ni Yesu zaa ɠɛni de niina. 45 Tɛi salaʋusu ɠundiɠii kisuɠalani kpoke, é vaani bu ga Zozɛfe Yesu ma ʋoomai zeɠe. 46 Zozɛfe geze zeɠei ɠeyani, é Yesu ɠula saa wului ma, é maavelevele ga geze zeɠei, é da kabai ta zu, nii bɔai fasai ʋa. Naa ʋoluma, é kɔtu wolai ta ɠilikilini, é da kabai la. 47 Magedala nui Mali ta Zoze dee Mali ti ɠɛni wɛlɛzu, ʋɛ ti Yesu laani ná.