Mark 4 (BBT1E)

1 Dinne Isu è Galili pha khabang iring hà rai srane yua ramuii shii, ai moe shii boh ibrogthek wuii thog ne shan ne ley mage ne ai ne run jia shii khrog ne in dun ro. Run jine kho è fuang hà um, chiih-è ithek ne kho iring shii riu yi. 2 Chiihphado ai è najang è shan ne miyaothek yua ne ithek shii yao: 3 “Yoi mage bo! Luangjia shii bran jiie è miiriie jiie pha wuii dun. 4 Ai è ji pha miiriie ne raig shii jiie mage shii, giak ne lumuii hà chiih dun. Jipha miiriie ne fuiithek è wuii srane zab chiing ne chie muii. 5 Giak miiriie ne lubao surong pha nyak shii chiih dun. Jipha miiriie ne khthiie sieng shii. Thiisa hà nyak ne jam asi pha ji è 6 hasiang siang mage shii, misieng ne zab goh ne iy dun; nyieliieshii, ji pha misieng ne iriing jam athab mua pha ji è iy dun ro. 7 Giak miiriie ne migem um pha jabiing hà chiih dun ro, ji pha miiriie ne siengthog mage shii, migem muiithek yang ne sieng dun pha ji è iwoi awoi mua pha re dun. 8 Chiih-è giak miiriie ne nyiak wie hà chiih ne, ji pha miiriie ne wie sieng ne, iwoi wie woithog ruii phro, giak ne phrai sa-uom woithog ruii, giak ne briie sariig woithog ruii phro, chiih-è, giak ne briie wiengjia woi thog ro.” 9 Din ne Isu è yao, “Hanyie shii yoi pha khohthek um arone, yoi mage bo!” 10 Isu yi awai ji shii, ai miyao yoi pho thek chiih-è samoythek è aishii wuii srane najang shan ne yao pha miyao siu ji sai, 11 Isu è ithek shii chang, “Nathek shii ne Hamangkhung-aphuii ro Sajathua pha miyao ug ne ruii pha ji phijong ro.” Jishii fuang hà riu pha thek è najang hì pha miyao siu ji nuii phro, 12 ji-è,Ithek ne riig phane riig shii,Thuh de adoh ro;ithek ne yoi phane yoi shii,thuh de agao ro.Chiih-è ithek ne ji rek arone, ithek ne Hamangkhung-aphuii shii khid phro,chiih-è, Hamangkhung-aphuii è ithek layogthek shii de khung phi ro. 13 Chiih-è Isu ithek shii sai, nathek hì pha najang shan ne yao pha miyao agao ba bey? Chiihphado, nyie khi-èrek ne gai pha najang è shan ne yao pha miyao ji ithek thieg mua yi phlei? 14 Jipha miiriie jiie pha ne Hamangkhung-aphuii pha mua ji jiie ro. 15 Giak ne lumuii shii chiih pha miiriie ne ji duiine ro, ithek ne ji pha mua nuii ched dang shii ibuii è wuii srane ji pha mua ne ithek è yie dun. 16 Giak bran ne lubao lakhung shii chiih pha miiriie duiine ro. Mua jine ithek bajo lised rek ne nuii gieng phro. 17 Jishii, ji pha mua ne ithek lubu iliing hà athog ba shii, mua phi pha chiang è, ithek shii diigchiaothek thog mage shii ithek ne jithek shii zab thoh din muii ro. 18 Giak branthek ne migem biing hà jiie pha miiriie duiine ro. Ithek ne ji pha mua ne nuii habuii shii, 19 Jishii awaithek sieng pha chiang è rum ne, bukho re yi pha miie ne, ichua ichua chiid pha ji thek è ji pha mua shii ne yang dun ne sennyia muii srane ji pha mua ne iwoi awoi mua pha iy dun ro. 20 Jishii, giak miiriie ne nyiak wie hà chiih pha duiine ro. Ithek ne mua ji nuii srane lubu hà ruii, chiih-è, iwoithek de wie woi ruii phro. Giak ne briie sa-uom woi ruii phro, giak ne briie so-riig woi ruii phro, chiih-è giak ne briie wieng jia thog pha woi ruii phro. 21 Isu è dinne yao din, “Hanyie è ichuang yie srane shiikhiiakhjam chiih-è biang bucho hà ruii ne bey? Jine ithek è bunthruak lakhung hà aruii ne bey? 22 Nyie ug ne ruii pha ji ne fuang khia yi phro, nyie thieg ne ruii pha ji ne hong yi ruii. 23 Nathek shii khohthek um arone yoi mage bo!” 24 Isu è de ithek shii yao, “Nathek è nyie yoi pha ji shii isiie rek mage bo, nathek è ithek shii khi-èrek ne chua pha ji duiine, Hamangkhung-aphuii è de nathek shii ji duiine chua ruii phro, jishii, ai ne ji-è de boh huak ne chua ruii phro. 25 Bran hanyie shii um iang phane, aishii dinne de bajo phi ruii phro, chiih-è, hanyie shii oi iang pha ji shii ne, aishii ìujia um iang pha ji de yie dun phro.” 26 Isu dinne yao, Hamangkhung-aphuii pha Sajathua ne hì duiine ro, bran jia è awai raig shii iriie jiie marui. 27 Ai ne habiu shii men dun, chiih-è inai shii ne lakhung sieng, chiih-è iriie jithek ne awailum ne sieng khlei ruii, jishii, ji pha iriie ne khi-èrek ne sieng ruii pha ji ne thuh de athieg mua ro. 28 Jine nyiak è rek ne sieng yi srane iwoithek de woi ruii phro; igobi ne iliung liung srane irab nyiu ne sieng bi ruii phro, chiih-è, imabuiithek bua ne iwoi woi ruii phro. 29 Iwoi jithek men pha ishak thog mage shii, ji pha bran è awairo barai rog shii riug pha jao, nyieliieshii yamiing pha ishak ne thog ro. 30 Isu è sai, “Hamangkhung-aphuii pha Sajathua ne imia rone gethek ne yao nyie rek ne yao phlei?” Isu è sai. Nathek shii nyie najang è yi ne yao pha lei? 31 Hì ne ji duiine ro, bran jia è sohjambling shii zab è ididuii thanaro iriie ji yi srane raig shii jiie pha wuii dun. 32 Ji è jiie marui pha idoh è ji pha misieng ne zab è de boh re ne sieng mage shii ji pha idiphak pha ilem shii fuiithek wuii ne irungthek rak ro. 33 Isu è branthek shii awai bajo najang è hì duiine awai mua ji yua; ai ne ithek shii khinyama gao mua pha rek ne yao phi ro. 34 Ai ne khuchung magunde najang è ayao phane nyie de ayao dang ro, jishii ai ne awai samoy rog shii ji pha najang pha miyao siuthek ne wie rek ne yao phi ne gao yi ro. 35 Jipha habjuang shii, Isu è awai samoythek shii yao, “Cho gethek ne khabang iring thrang hà wuii sha rai haro.” 36 Ji-è ithek ne run moe pha ibrogthek shii thoh marui ne Isu injong pha run shii khud ne in dun, ji-è rek pha ji shii gai runthek de bajo um ro. 37 Humblo shii hasam boh sam mage, chiih-è khasao ne run lakhung shii jao thog. 38 Isu ne run pha idoh hà dun srane awai khrug shii tharo ro ne athan dang pha men dun. Samoythek è Isu shii chun ne ho, “Masdo, gathek iy sha pha rek muii pha ji ne na athieg bey?” 39 Isu è jai srane ji pha hasam nane khasao shii yung, ji è giung dang shii ji pha hasam ne them dun. Thiichiih ne bajo liijiing rey dun. 40 Chiihphado, Isu è awai samoy shii yao, “Nathek ne nyie rek ne rum phlei? Thuh de nathek ne migi oi ba bey?” 41 Jishii ithek ne Isu blia ji doh mage ne bajo rum dun chiih-è awaithek chung yao rai, “Hì ne hanyie lei? Hasam nane khajao de ai miyao nuii dun ro!”

Mark 4 (BBT1E)

In Other Versions