Hebrews 1 (BHUM)

1 सुरुवात हे भगवान हमर पुरखन लग अउ ग्यानी मनसेन के दवारा कइन मेर के बात करिस। 2 पय हइ आखरी रोज हे भगवान अपन टोरवा के दवारा, हमर लग बात करिस अउ ऊ अपन टोरवा के दवारा दुनिया के सगलू चीजन के बनाइस अउ उहै के सगलू कुछु हक के रूप हे दय हबै। 3 ऊ टोरवा भगवान के महिमा के उजेड हबै, भगवान खुद के दरसाथै अउ अपन सक्ति के बचन के दवारा दुनिया के बनाय रखथै अउ सगलू मनसेन के पापन के छमा सुध्द करके भगवान के दहिना पल्ला ऊंच हे जाय के बइठे हबै। 4 अउ ओखर पदवी स्वरगदूतन लग ऊंच ठहरिस, काखे जउन नाम उके राजगद्दी हे मिले हबै, उन ऊ नाम लग कहुं जादा महान हबै। 5 काखे भगवान अपन स्वरगदूत लग असना कबहुन नेहको कहिस,“तै मोर टोरवा हबस,आज मै तुम्हर बाफ बन गय हव।”अउ न भगवान कउनो स्वरगदूत के बारे हे कहिस,कि “मै उनखर बाफ हुइहों अउ उन मोर टोरवा।” 6 अउ फेर भगवान अपन अकलउता टोरवा के दुनिया हे लानथै, “तब ऊ स्वरगदूतन लग कथै, तुम सब मोर टोरवा के महिमा करा।” 7 अउ स्वरगदूतन के बारे हे हइ कथै,“ऊ अपन सगलू दूतन के पवन हे,अउ अपन हरवाह के धंधकत आगी के लपक हे बदल देथै।” 8 पय टोरवा के बारे हे कथै“हे भगवान, तोर राज जुगजुग बने रहै,तै अपन राज सासन नियाव के संग करिहों, 9 तै नियाइपन लग माया रखथस अउ अधरम लग बैर रखथस,इहैनिता भगवान तोके चुने हबै,अउ ऊ इज्जत के खुसी दइस तोके तोर संगिन,लग बढके सुध्द तेल लग तोके अभिसेक करे हबै।” 10 अउ ऊ इहो कथै,हे परभु तै सुरू हे भुंइ के नीह डालिस,अउ स्वरग तोर हाथ के रचना हबै। 11 ऊ तो नास हुइ जही, पय तै बने रइहे,अउ ऊ सगलू खुरथा पइजामा के जसना जुनहा हुइ जही। 12 अउ तुम उनही चदरा के जसना लपेटिहा,अउ ऊ खुरथा पइजामा के जसना बदल जही, पय तै कबहुन नेहको बदलही। 13 भगवान कबहुन कउनो स्वरगदूत लग असना नेहको कहिस,“तै मोर दहिना पल्ला बइठ जा,जब तक मै तोर बैरी के,तोर गोड के चउकी नेहको बनाय दो।” 14 हइ सगलू आतमा भगवान के सेबा टहल नेहको करथै, का सगलू स्वरगदूत हरवाह नेहको, उन मनसेन के सेबा के निता पठोय जथै, जउन मुकति के हकदार हबै।

Hebrews 1 (BHUM)

In Other Versions