James 2 (BNTABOOT)

1 1. Браты мае! Не ўзіраючыся на аблічча, мейце веру ў Госпада нашага Ісуса Хрыста праслаўленага. 2 2. Бо калі ў збор ваш увойдзе чалавек з залатым пярсьцёнкам, у сьветлым адзеньні, і ўвойдзе ўбогі ў брудным адзеньні, 3 3. і вы глянеце на таго, які носіць сьветлае адзеньне, і скажаце яму: «Табе добра сесьці тут», а ўбогаму скажаце: «Ты стань там», ці: «Сядай тут, ля падножжа майго», 4 4. ці не ўчынілі вы розьніцы ў саміх сабе і ці ня сталіся судзьдзямі са злымі думкамі? 5 5. Паслухайце, браты мае ўлюбёныя, ці ж ня ўбогіх сьвету гэтага выбраў Бог быць багатымі ў веры і спадкаемцамі Валадарства, якое Ён абяцаў тым, што любяць Яго? 6 6. А вы зьняважылі ўбогага. Ці ж не багатыя прыгнятаюць вас, і ці ж не яны цягаюць вас у суды? 7 7. Ці ж не яны блюзьняць на добрае імя, якое вы прызываеце? 8 8. Калі, аднак, вы спаўняеце валадарскі закон паводле Пісаньня: «Любі бліжняга твайго як самога сябе», добра робіце; 9 9. а калі на аблічча ўзіраецеся, чыніце грэх і дакараныя законам як парушальнікі. 10 10. Бо хто захоўвае ўвесь Закон, але спатыкнецца ў [нечым] адным, той стаўся вінным у-ва ўсім. 11 11. Бо Той, Які сказаў: «Не чужалож», сказаў таксама: «Не забівай». Дык калі ты не чужаложыш, але заб’еш, ты стаўся парушальнікам Закону. 12 12. Гэтак гаварыце і гэтак рабіце, як тыя, што маюць быць суджаны паводле закону свабоды. 13 13. Бо суд бяз літасьці для таго, хто не ўчыніў літасьці; і ласка па-над суд вывышаецца. 14 14. Якая карысьць, браты мае, калі хто кажа, што мае веру, а ўчынкаў ня мае? Ня можа гэтая вера збавіць яго. 15 15. Калі брат ці сястра ня маюць адзеньня і не хапае ім ежы на дзень, 16 16. а нехта з вас скажа ім: «Ідзіце ў супакоі, грэйцеся і насычайцеся», але ня дасьць ім патрэбнага для цела, якая карысьць? 17 17. Гэтак і вера, калі ня мае ўчынкаў, сама па сабе мёртвая. 18 18. Але нехта скажа: «Ты маеш веру, а я маю ўчынкі». Пакажы мне веру тваю без учынкаў тваіх, і я з маіх учынкаў пакажу табе маю веру. 19 19. Ты верыш, што Бог адзін, — добра робіш. І дэманы вераць і дрыжаць. 20 20. Але ці хочаш ведаць, чалавек нікчэмны, што вера без учынкаў мёртвая? 21 21. Ці ж не праз учынкі апраўдаўся Абрагам, бацька наш, узьнёсшы на ахвярнік Ісаака, сына свайго? 22 22. Бачыш, што вера дапамагала ўчынкам ягоным, і праз учынкі вера завяршылася. 23 23. І споўнілася Пісаньне, якое кажа: «Паверыў Абрагам Богу, і залічана яму за праведнасьць», і: «Сябрам Богу быў ён названы». 24 24. Дык паглядзіце, што чалавек апраўдваецца праз учынкі, а не праз веру толькі. 25 25. Падобна і Рахаў распусьніца ці не праз учынкі была апраўданая, прыняўшы пасланцоў і выправіўшы [іх] другой дарогаю? 26 26. Бо, як цела бяз духа мёртвае, гэтак і вера мёртвая без учынкаў.

James 2 (BNTABOOT)

In Other Versions