James 2 (TOMA)
1 Kɛ̀ɛleaiti, wɔi wo eteai ziɛzu kidaaleʋei zu ade-Maliɠii Yesu Kilista ma, é ga lɛbiya nui, à mina naa zupu ga zeelɔzɔɠɔzui. 2 Ni zunui ta a ʋaana wa-ɠaalɛbai zu, zanu balaɠaegi zee ʋa, seɠe ʋagɔi ma, ni bala nui ta ɓalaa ka ʋaana ná, maaɠili ʋelei ɲɔuɗai, 3 ni wa unfemai veena zunui naa ʋɛ, maaɠiliai ga pagɔ, wo ɠɛ ma: «Ʋa, è zei ʋɛ, seizu ʋagɔi zu,» kɛlɛ wo ɠɛ bala nui ma: «Ɗa ʋe, yɛ loni,» ɓaa «Zei zooi ma, ʋɛ kɔ̀ɠɔiti bu,» 4 zeelɔzɔɠɔzui la ga naa wo kɛɛzu ɓɔɠɔ zaama ɓaa, wo ʋa ɗa tukpɔi ɠaaleʋe, nii kulaai kisiɛ ɲɔi zu? 5 À woilo, kɛ̀ɛleaiti, wɔi wo ga nɛ̀ɛɲɔɠɔiti, GALA ge la yeeloni naati ba ɓaa, niiti ti ga bala nuiti eteai zu, ga ti ɓɛtɛ kidaaleʋei zu, ti ɠɛ ga masadai ma ʋogani zeɠe nuiti, nii é ma minazeɠe bogai naati bɛ, niiti ti nɛai ʋɛ? 6 Kɛlɛ wɔun, wa bala nui ʋɛlɛʋilisu! Naavolo nuiti taade, ti ʋa ɠɛ ta-zobogi laazu wo ma, ti ʋa li ga woye tukpɔɠaaleʋezuʋɛti ɓaa? 7 Tiya laade ɓaa, ti ʋa ɠɛ woo ɲɔi wosu daasei pagɔi laalɔɠɔma, pɛai wo ʋa? 8 Gaamazu wa kɛɛzu ga pagɔ, ni wa masadai ma lɔgi ziɛzu, é zoloo GALA Sɛʋɛi ma ga: «È-zeiɲɔɠɔi nɛɛ ʋɛ, eɠɛ ɗa ɓɔɠɔi.» 9 Kɛlɛ ni wa zeelɔzɔɠɔzui ɠɛɛzu, wa koto ɠɛɛzu naazu, tɔgi ɠa wo ʋeelalazu, tɔɔzei wo tɔ koloɠologi ɠɛa la. 10 Mazɔlɔɔ nu nɔpɛ é tɔgi pɛ sosu, kɛlɛ a tɔgi ma levei gila kpe koloɠolona, é ɠɛa ga sɔba nu ti pɛ su. 11 Tɔɔzei zɔi é ɠɛni ma: «Mina wɛɛnziɛ bo,» naa ɠa é ɠɛni ma ɓalaa: «Mina nu ʋaa.» Kɛlɛ anɛɛ ni è la wɛɛnziɛ bosu, kɛlɛ ni ɗa nu ʋaana, è ɠɛa ga tɔ koloɠolo nui. 12 À kpɔɛi wo, wo ziɛ eɠɛ nui niiti ti maanɛai ti lukpɔɠaaleʋe, é zoloo wɔɔlɔya lɔgi ma. 13 Mazɔlɔɔ zɔi é la nua maawɔinɠaani, GALA ka naa lukpɔɠaaleʋe, é la maawɔinɠaa. Maawɔinɠai ɠa ɗa pilɛ sɔlɔɔ tukpɔi ma. 14 Kɛ̀ɛleaiti, naa ɠa lee ʋaa nu ma, ɗa ɠɛna ma: «Kidaaleʋei ɠa zèa,» ni è la dɛɛni ga ɗa-ɠɛɛwotiiti? Naama ɠidaaleʋei ɠa è ɠizo naazu ɓaa? 15 Ni ɠɛɛɠɛlointi saama, tanigaa ta ná, seɠe la ti ma, ti ʋalagai folo-o-folo ɠɔnɔgi ma, 16 nu ɠila ge yɛ wo zaama, é ɠɛ ti ma: «À li ziilɛigi zu, à ɠɔɔlɛ, wo yiɠo,» ni wo la naa veeni ti ya, nii ti-ɓusɛi maavai ba, naa ɠa lee ʋaa ti ma? 17 Pele ɠana é la ga kidaaleʋei, ni é la lɛɛni ga kɛɛwotiiti, é zaa. 18 Kɛlɛ ni nui ta a ɠɛna ma: «Kidaaleʋei ɠa è ya, nɔ̀un, kɛɛwotiiti,» naazu nà ɠɛ ma: «Ɗa-ɠidaaleʋei lɛ ga ze, kɛɛwotiiti pɔ ge mina ɠɛ ba, nɔ̀un nà nà-kidaaleʋei lɛ ga ɗe ga kɛɛwotiiti.» 19 È laaʋɛ da ga GALA gila kpe nɔ ɠa é ná? Ɗa faa ʋagɔ ɠɛɛzu ga naa. Kɛlɛ inɛgiti daaʋɛ naa la ɓalaa, ti zasu ɗa ɓali. 20 Ee, ɠimalala nui! Ɗa pɔ é lɛɛ ga ɗe ɓaa, ga kidaaleʋei kɛɛwotii la ba, ma ɲaka nɔ ʋe? 21 Ade-mɛmɛwola Abalaame la ɠɛni ɠɛɛni ga telebo nu GALA gaazu ga kɛɛwotiiti maaʋele ɓaa, siɛgi zu é ná-doun zunui Izaake laani la zalaɠa ɠulazuʋɛ? 22 È pɛtɛga ga ná-kidaaleʋei ta ná-kɛɛwotiiti ti ɠɛni botii ɠɛɛzu ʋɔɔma, ná-kidaaleʋei laazeelini ga ná-kɛɛwotiiti, ti ɠɛni ba. 23 Naa ʋilɛni su naazu, nii GALA Sɛʋɛi boni ga: «Abalaame laani GALA da, naa leveni bɛ ga telebodai.» É lolini ga GALA bɔɔlai. 24 Wa pɛtɛsu deɠɛmu, ga nui ɠa ɠɛ ga telebo nu GALA gaazu ga kɛɛwotiiti maaʋele, é ti ɠɛɛzu, kidaaleʋei letelegi nɔ laade, nii é zea. 25 Zenɔ ɠana é ɠɛɛni la ga koloɠolo anzanui Laɠaɓe, é ɠɛɛni ga telebo nu GALA gaazu ga ná-kɛɛwotiiti maaʋele, é yeezeini Izilayɛle ɠeelaiti bu, é ɓɔ ti ʋa, ti li ga pele ɠili. 26 Mazɔlɔɔ eɠɛʋelei kpusɛi zaai la, ni zɛnvui la su, zekana é la, ni kɛɛwotiiti ti la kidaaleʋei ʋa, saaʋɛ.