Hebrews 7 (HNT)
1 ईव मलिकिसिदक शालेम इन राजा ईरोन, अदिक परमप्रधान परमेश्वर उन याजक ईरोन. याग अब्राहम नाक राजागोळी युद्ध दा पराजीत माळकु वापस आगोन आग मलिकिसिदक अब्राहम उक सिकदुन अदिक आऊक आशीष कोट्टुन. 2 अदिक अब्राहम आ सप्पा दा टु जो आव युद्ध दा जीकसीदुन अदुर्द दसवा हिस्सा कोट्टुन. मलिकिसिदक उन हेसुर इन पयला मतलब आद न्यायीपन इन राजा, अदिक अदुर्द ईद भी मतलब आद, “शालेम उन राजा” मतलब “शांती इन राजा.” 3 यार आप्प, मोय, अदिक पुर्वजगोळ्द यातोदु इतिहास सिकाल, आऊन जनम या मृत्यु उन भी यातोदु उल्लेख हैलेच; लेकीन परमेश्वर उन पार उन घाई इच हमेशा अन साटी याजक बन्सकु ईरतान. 4 थ्वाळासा विचार माळी कि आव याट महान ईरोन यारी कुलपती अब्राहम युद्ध दा हासिल माळ्द माल इन दसवा हिस्सा कोट्टुन. 5 अदिक लेवी इन वंशज दा टु जो याजक इन पद हासिल माळतार, आंदरी व्यवस्था अन अनुसार आग्या सिक्याद कि इस्राएल इन लॉकुर से मतलब तान खुद इन लॉकुर से, दसवा हिस्सा ताकोम बाक आंदुर अब्राहम उन वंशजगोळ्द भी वंशज येती आगबाळुल. 6 लेकीन मलिकिसिदक, जो लेवी वंशज दाकळव भी ईला ईरोन, अब्राहम से दसवा हिस्सा ताकोंडुन, अदिक आ अब्राहम उक आशीषगोळ कोट्टुन यार हात्ती परमेश्वर उन प्रतिग्यागोळ ईरव. 7 इदुर्दा येनु शक हैलेच कि जो आशिर्वाद कोळतान आव आर्शिवाद ताकोमावाळा से धोड्डेव ईरायदुन. 8 यल ताका लेवीगोळ सवाल आद आंदुर दा दसवा हिस्सा आ मंळसागोळ द्वारा संघरूसकु आगतद जो मंळसागोळ सायतार लेकीन मलिकिसिदक उन यल ताका सवाल आद दसवा हिस्सा आऊन द्वारा संघरूसकु आगाईत जो शास्त्र अन अनुसार ईग भी जित्ता आन. 9 रा नाव ईद भी अन सकतेव कि लेवी भी, जो दसवा हिस्सा ताकोमतान, अब्राहम उन द्वारा दसवा हिस्सा कोट्टुन. 10 यतिकी याता समय मलिकिसिदक अब्राहम से भेंट माळीदुन, आग रा लेवी इन जनम भी ईला आगित आव रा तान पुर्वजगोळ्द शरीर दा ईरोन. 11 अगर लेवी याजकता अन परंपरा अन द्वारा संपुर्णता हासिल माळकु आग सकोद रा यावारा दुसरा याजक उन बरोद अच येन जरवत ईरोद? यतिकी ईदुर दा आधार मा लॉकुरी व्यवस्था भी कोटकु आगित, ऊंद हिंग याजक उन येन जरवत ईरोद जो मलिकिसिदक उन परंपरा नव ईरूल ना कि हारून उन परंपरा नव. 12 यतिकी याग याजक उन पद बदलुसेगतद, रा व्यवस्था अन भी बदलुसोद जरूरी आद. 13 यतिकी नाम प्रभु उन बारा दा ईव मातगोळ अनकु आगताव कि आव दुसरा गोत्र इनव हुन, यार गोत्र दा टु याऊ याजक उन रूप दा वेदी इन स्यावा माळीदिल, 14 रा प्रगट आद कि नाम प्रभु यहूदा अन गोत्र दा टु पैदा आग्यान, अदिक ई गोत्र अन बारा दा मूसा याजक पद इन येनु चर्चा माळीदिल. 15 नाम दावा मात्त स्पष्टता देल प्रगट आगेगतद, याग मलिकिसिदक उन घाई दुसरा याजक पैदा आगतान, 16 जो शारीरिक आग्यागोळ अन नियमगोळ अनुसार ईला, लेकीन अविनाशी जीवन इन सामर्थ्य अन अनुसार याजक बनस्यान. 17 यतिकी शास्त्र अनतद, “नी मलिकिसिदक उन रीति मा युगानुयुग याजक आय.” 18 पयला नियम इदुरसाटी रद्द माळकु आत, यतिकी अद कमजोर अदिक व्यर्थ ईरोद. 19 इदुरसाटी कि मूसा अन्द व्यवस्था यारीकु पुरा सिद्ध माळ सकिदील. अदिक ईग आऊन जागा मा ऊंद हिंग वळ्लीद आशा ईटकु आग्याद यदुर द्वारा नाव परमेश्वर उन हात्ती होग सकतेव. 20 मसीह अन नियुक्ती परमेश्वर उन किर्या अन्द द्वारा आत लेकीन दुसरा अक बिना किर्या अन्द अच याजक माळकु आगीत. 21 लेकीन यीशु आग ऊंद किर्या देल याजक बन्सीदुन, याग परमेश्वर आऊन से अंदिदुन, “प्रभु किर्या तिंदान अदिक आव तान मन यागलु बदलुसतिदील, ‘नी हमेशा साटी याजक बन्सकु ईत्या.’” 22 ई किर्या अन कारण यीशु मात्त ऊंद वळ्लीद वाचा अन्द हमी बनसेदुन. 23 ईग नोळी, हिंग हापाळ सा याजक ईरतोगोर लेकीन आंदरी मृत्यु आंदुर पदगोळ मा कायम ईर गोटीदील, 24 लेकीन यीशु अमर आन, अदिक आऊन याजक इन क्याल्सा हमेशा हमेशा साटी बन्सकु ईरोदाद. 25 इदुरसाटी जो आऊन द्वारा परमेश्वर उन हात्ती बरतार, आव आंदुर पुरा रीति देल उद्धार माळदुर दा समर्थ आन यतिकी आव परमेश्वर से आंदुर साटी विनती माळली हमेशा जित्ता आन. 26 हिंगा महायाजक नाम जरवतगोळी पुरा माळ सकतान. आव पवित्र आन, आव निर्दोष आन अदिक आऊन दा यातोदु पाप हैलेच, आव पापीगोळ से भी ब्यार्र माळकु आग्यान, अदिक स्वर्ग से भी आऊक म्याकुच नेगुकु आग्याद. 27 आ दुसरा महायाजकगोळ घाई आऊक जरूरी हैलेच कि हर रोज पयले तान पापगोळी अदिक बाक लॉकुर पापगोळ साटी बलिदान येर्सुल; यतिकी आव तान तान इक बलिदान येर्सकु अदरी ऊंद अच घन दा पुरा माळ कोंडुन. 28 मूसा अन्द व्यवस्था मंळसागोळी जो पुरा हैलेच आंदरी महायाजक नियुक्त माळतद, लेकीन परमेश्वर उन प्रतिग्या आऊन किर्या अन सांगुळ बन्सकु आग्याद ईद प्रतिग्या व्यवस्था अन्द बाद्दा बंदाद अदिक ई प्रतिग्या प्रमुख याजक उन रूप दा पार उक नियुक्त माळ्याद जो हमेशा हमेशा साटी आद अदिक परिपुर्ण बन्सकु ईरतद.