Numbers 23 (MAAL)
1 ባኣላኣሜ ባኣላኣቄ ኮይላ፦ «ሃይካ ፆኦሲም ሚቺ ዒንጎ ላንካይ ቤሲ ኮሺ፥ ላንካይ ዚያ ጌማይና ላንካይ ዓዴ ማራይና ታኣም ዔኪ ሙኬ» ጌዔኔ። 2 ዒማና ባኣላኣቄ ጌይንቴ ጎይፆ ማዼኔ፤ ዒዛንታ ባኣላኣሜንታ ፆኦሲም ዒንጎ ባኮ ሺኢሾ ፔቴ ፔቴ ቤዞይዳ ፔቴ ዚያ ጌማይና ፔቴ ዓዴ ማራይና ሹኪ ዒንጌኔ። 3 ዬካፓ ባኣላኣሜ ባኣላኣቄ ኮይላ፦ «ናንጊና ናንጋ ጎዳ ታ ኮይላ ሙካንዳቴያ ሙኪንዱዋቴያ ዔራኒ ሃሴኬያ ዴንዲ ታ ዛጋንዳያ ሄላንዳኣና ሃይካ ፆኦሲም ኔ ሚቺ ዒንጌ ቤዞኮ ኮይላ ዔቄ፤ ናንጊና ናንጋ ጎዳ ታኣም ኬኤዜ ባኮ ቢያ ታ ኔኤም ኬኤዛንዳኔ» ጌይ፥ ዬኖ ቤዛፓ ፔቴ ጌሜሪ ኬስኬኔ። 4 ዒማና ፆኦሲ ዒዛና ካኣማዛ፥ ባኣላኣሜ ፆኦሲ ኮይላ፦ «ላንካዎ ሚቺ ዒንጎ ቤዞ ታ ጊኢጊሺ፥ ፔቴ ፔቴ ቤዞይዳ ፔቴ ዚያ ጌማይና ፔቴ ዓዴ ማራይ ሹኪ ታ ኔኤም ዒንጌኔ» ጌዔኔ። 5 ባኣላኣሜ ባኣላኣቄም ኬኤዛኒ ኮይሳ ኪኢቶ ናንጊና ናንጋ ጎዳ ኬኤዜስካፓ ዬኖ ዒ ሙኬ ቤዞ ባንሢ ማዒ ዓኣዻንዳጉዲ ዓይሤኔ። 6 ዒዚ ማዒ ሙካንቴ ባኣላኣቄ ሞዓኣቤ ዓጮፓ ሙኬ ቢታንታ ዓኣ ዓሶና ዎላ ዬኖ ሚቺ ዒንጎ ቤዜሎ ኮይላ ዔቂ ዓኣኔ። 7 ዒማና ባኣላኣሜ ፆኦሲ ማሊሢ፦ «ሞዓኣቤ ካኣቲ ባኣላኣቄ ዓባ ኬስካ ዛሎ ዹካ ዓኣ፥ሶኦሪያ ዓጫፓ ዔኤሊ ታና ዔኪ ሙኬኔ።ዒዚያ ታና ‹ሃኒ ሙኪ፥ ያይቆኦቤ ታኣም ጫሽኬ፤ዒስራዔኤሌ ዓሳ ባይቃንዳጉዲ ታኣም ጋዳንቄ› ጌዔኔ። 8 ዓካሪ ታኣኒ፦ ፆኦሲ ጋዳንቂባኣ ባኣዚ፥ዎዲ ጋዳንቃንዳይ?ፆኦሲ ጫሽኪባኣ ባኣዚ፥ዎዲ ታ ጫሽካንዳይ? 9 ታኣኒ ዔያቶ ሃያ ዼጌ ላሎይዳ ዔቂ ዛጋኔ፤ጌሜሮ ዑፆይዳ ዔቂያ ታ ዔያቶ ዛጋኔ፤ዔያታ ፔና ዳንዳዒ ፔኤሮ ናንጋ ዴሬኬ፤ሜሌ ዓሶይዳፓ ባሼ ዱማዼያ ማዔሢ፥ዔያታ ዔራያኬ። 10 ያይቆኦቤኮ ዜርፃ ዓጪጉዴያኬ፤ዒስራሌ ዓሳ ኮሺ ዺባሢሮ ዛሎኮ ዛላታዖ ዖኦኒ ፓይዳኒ ዳንዳዓይ?ታ ሃይቦ ፂሎ ዓሳ ሃይቃሢጉዲ ማሄ፤ጋፒንፆዋ ታኣኮ ዔያቶሲጉዲ ማሄ»ሂዚ ጌይ ኬኤዚሢ ዓርቄኔ። 11 ባኣላኣቄ ባኣላኣሜ ኮይላ፦ «ሃይ ኔ ታኣም ማዼ ባካ ዓይጌንዴዳይ? ታ ኔና ሃይካ ዔኪ ዬዔሢ ታኣኮ ሞርኮ ኔ ጋዳንቃንዳጉዲቱዋዓዳ? ኔኤኒ ጋዓንቴ ዔያቶ ዓዓንጄያፓዓቴም ሜሌ ዎኦቴ ባኣዚ ባኣሴ» ጌዔኔ። 12 ባኣላኣሜ ማሃዖ፦ «ታኣኒ ጌስታኒ ዳንዳዓሢ ናንጊና ናንጋ ጎዳ ታኣም ኬኤዜማ ሌሊኬ» ጌዔኔ። 13 ባኣላኣቄ ባኣላኣሜ ኮይላ፦ «ዒስራዔኤሌ ዓሶ ጉቤቱዋንቴ ዻካ ሌሊ ኔ ዴንቃንዳ፥ ሜሌ ቤሲ ኑ ዎላ ዓኣዾም፤ ዒኢካ ዔቂ ዔያቶ ታኣም ጋዳንቄ» ጌዔኔ። 14 ዬካፓ ፒሲጋ ዹኮይዳ ዓኣ፥ ፆፒሜ ዔኪ ዓኣዼኔ፤ ዒኢካ ፆኦሲም ዒንጎ ባኣዚ ዒንጎ ላንካይ ቤሲ ኮሺ፤ ፔቴ ፔቴ ቤዞይዳ ፔቴ ዚያ ጌማይና ፔቴ ዓዴ ማራይያ ሹኪ ሺኢሼኔ። 15 ባኣላኣሜ ባኣላኣቄ ኮራ፦ «ኔኤኒ ሃይካ ፆኦሲም ሚቺ ዒንጌ ቤዞ ኮይላ ዔቄ፤ ታኣኒ ፆኦሲና ካኣማኒ ሃሴኬያ ዓኣዻንዳኔ» ጌዔኔ። 16 ዒማና ናንጊና ናንጋ ጎዳ ባኣላኣሜና ዎላ ካኣሚ፦ ዒዚ ኬኤዛንዳ ኪኢቶ ኬኤዚ ባኣላኣቄ ባንሢ ማሂ ዳኬኔ። 17 ዒዚ ሙካንቴ ባኣላኣቄ ሞዓኣቤ ዓጮኮ ዼኤፖ ዓሶና ዎላ ዔቂ ዓኣኔ፤ ዬካፓ ናንጊና ናንጋ ጎዳ ዒዛም ዓይጎ ባኣዚ ኬኤዜቴያ ባኣላኣቄ ዖኦጬኔ። 18 ባኣላኣሜ ሂዚ ጌይ ፆኦሲ ማሊሢ ኬኤዜኔ፦«ፂፖሬ ናዓሦ፥ ባኣላኣቄ!ሃኒ ሙኪ ታ ኔኤም ጋዓ ባኮ ቢያ ዋይዜ፤ 19 ፆኦሲ ዓሲጉዲ ሉኡቁዋሴ፥ዓሲጉዲ ማሊፆዋ ፔኤኮ ላኣሙዋሴ፤ዒ ጫኣቄ ባኮ ኩንሣኔ፤ጌዔ ባኮዋ ቢያ ማዻኔ። 20 ታኣም ኬኤዚንቴሢ ታ ዓንጃንዳጉዲኬ፤ፆኦሲ ዓንጃዛ ታ ዒዛ ቃኣሎ ላኣማኒ ዳንዳዑዋሴ። 21 ያይቆኦቤይዳ ዔርቲባኣ ፑርታ ባኣዚታቴያሜታ ሄሊንዱዋኣሢ ጴዻኔ፤ናንጊና ናንጋ ጎዳ ማዔ ዔያቶኮ ፆኦዛሢ ዒስራዔኤሌ ዓሶና ዎላኬ፤ፆኦሲ ዔያቶኮ ካኣቲ ማዔሢያ ዎዛና ዔያታ ኬኤዛኔ። 22 ጊብፄ ዓጫፓ ዔያቶ ኬሴ ፆኦዛሢ፥ዔያቶኮ ሜኤኒ ካኣሪጉዲ ማዒ ሙካ ባኮ ዔያቶም ዹዓኔ፤ 23 ያይቆኦቤም ማርሾናቴያዒስራዔኤሌ ዓሶ ጫኣቆናቴያፔቴታዖ ማዻ ባኣዚ ባኣሴ፤ዓካሪ፥ ሃይሾ ያይቆኦቤ ዓሶናዒስራዔኤሌ ዓሶናም‹ፆኦሲ ማዼ ባኮ ዛጉዋቴ!› ጌይንታንዳኔ። 24 ዒስራዔኤሌ ዴራ ዒንዴ ዞቢጉዲ ማዓንዳኔ፤ኬሚ ዎዼሢ ሙዓንዳያ ሄላንዳኣናሱጉፆዋ ዑሽካንዳያ ሄላንዳኣናዚቲ ጌይ ላሁዋ ዞቢጉዲ ማዓንዳኔ።» 25 ዬካፓ ባኣላኣቄ ባኣላኣሜ ኮራ፦ «ዒስራዔኤሌ ዴሮ ጋዳንቂፆ ማሊ ኔ ዒፄቴ ጋዳንቂያ ጋዳንቂፖ፤ ዓንጂያ ዓንጂፖ!» ጌዔኔ። 26 ባኣላኣሜ ማሃዖ፦ «ታኣኒ፥ ናንጊና ናንጋ ጎዳ ታኣም ኬኤዜማ ሌሊ ጌስታንዳኔ ጌዒ ቤርታ ኔኤም ኬኤዚባይ?» ጌዔኔ። 27 ባኣላኣቄ ዒማና፦ «ሃኒ ሙኬ፥ ሜሌ ቤሲ ኑ ዓኣዾም፤ ጎዖንቴ ዒኢካ ኔ ማዔም ሃያ ዴሮ ጋዳንቃንዳጉዲ ፆኦሲ ኔና ዓይሣንዳያ ናንዳኔ» ጌዔኔ። 28 ዬያሮ ባኣላኣቄ ባኣላኣሜ ዔኪ ዳውሎ ቦኦሎኮ ሆታ ዓኣ፥ ፔዖሬ ዹኮ ዑፆ ዔኪ ኬስኬኔ፤ 29 ባኣላኣሜ ዬካፓ፦ «ሃኖ ቤዞይዳ ሃሣ ፆኦሲም ዒንጎ ባኮ ዒንጎ ላንካይ ቤሲ ኮሺ፥ ላንካይ ዚያ ጌማይና ላንካይ ዓዴ ማራይ ታኣም ዔኪ ሙኬ» ጌዔኔ። 30 ባኣላኣቄ ዒማና ባኣላኣሜ ጌዔ ጎይፆ ማዼኔ፤ ፔቴ ፔቴ ሚቺ ዒንጎ ቤዞይዳ ፔቴ ፔቴ ዚያ ጌማይና ዓዴ ማራይ ሹኪ ሺኢሼኔ።