Numbers 23 (TOMA)

1 Ɓalaame ɠɛni Ɓalake ma: «Zalaɠa ɠulazu lɔfela lo bɛ̀ ʋɛ, è nikɛ zinɛ lɔfela ta baala sinɛ lɔfela ɠɛʋele ɓɛtɛ bɛ̀ ʋɛ.» 2 Ɓalake naa ɠɛɛni, nii Ɓalaame boni. Ɓalake ta Ɓalaame ti nikɛ zinɛ ɠila ta baala sinɛ ɠila kulani ga zalaɠai, zalaɠa ɠulazuʋɛ ɠilagilagi. 3 Ɓalaame ɠɛni Ɓalake ma: «Ɠaalɔ, è lo ɗa-ɠala zalaɠai ɠoba. Nà maaɠoozazu, tanisu Ɠɔoɠɔ GALAGI ɠa ʋaazu é dàaɠomi. Nà naama wooi laazeeli è ma, nii a kula kɛlɛma bɛ̀.» É liini gizei ta ma, nii gulu la ma. 4 GALA ge ɠulani kɛlɛma Ɓalaame ʋɛ, naa ɠɛni ma: «Gè zalaɠa ɠulazu lɔfela logɛ, gè nikɛ zinɛi ta baala sinɛi ɠulaʋɛ ga zalaɠai, zalaɠa ɠulazuʋɛ ɠilagilagi.» 5 Ɠɔoɠɔ GALAGI wooi ʋuuni Ɓalaame la, é ɠɛ ma: «Ɠale ma Ɓalake ʋɔ bɛ, è ɓɔɛ pɔ ɠani.» 6 Ɓalaame ɠaleni ma Ɓalake ʋɔ bɛ, nii é ɠɛni ná-gala zalaɠai ɠoba, ta Moaɓe ɠundiɠiiti. 7 Ɓalaame faalaalii nii woni, é ɠɛ ma:«Moaɓe masagi Ɓalake zeɠeʋɛ ga zeSiili yooi zu gizeiti su.É ɠɛ mà: ‹Ʋa, è Zakɔɓe mavofodai voovo bɛ̀!Ʋa, è ɗa-yiiɠaawanai yei Izilayɛle laalɔɠɔma!› 8 Nà naa voovoozu ɠale, nii GALA ge la foovooni?Nà yiiɠula ɠale nuɓusɛiti ma, siɛgi zu Ɠɔoɠɔ GALAGI yii la ɠulani la? 9 Nà yɛsu fasa ɠizeiti unmaʋɛ, gè pɛtɛ,nà yɛna gizeiti unmaʋɛ, gè pɛtɛ,nuɓusɛ ʋe é zeizu yɛ,zɔɠɔzu ɠa ti ʋa ta zii zɔiti. 10 Ɓɛ ɠa a zoo é Zakɔɓe mavofodai ma ʋɛbɛi ɠaalu,ɓaa é Izilayɛle nu ɓulugi ɠaalu?Gè za, eɠɛʋelei sɔle nui zaa ʋelei la.Gàaɓela ʋelei ɠɛ ga nɔnɔi ɠɛʋelei.» 11 Ɓalake ɠɛni Ɓalaame ma: «Leeni ɠa è kɛa ga ze? Gè è zeɠeʋɛ ga è sìli nuiti foovo, wɛlɛ ɗa ba, è ɗa tuya loo ti ʋɛ!» 12 É ɠɛni ma: «Nà ɠɛna ɓɔɛa, gè la naa woga ɓaa, nii Ɠɔoɠɔ GALAGI pua dà?» 13 Ɓalake ɠɛ ma: «Ʋa pɔ̀ bɛ, de li ada taɠili, ʋɛ ɗa ti ɠa ná. Ɗa ti ɠilazuʋɛ nɔ ɠa, è la ti pɛ kaa, miná ɠa ɗa ti voovo ná nɔ̀un bɛ.» 14 É liini la Sɔfime kpalagaʋɛ, Pizega gizei unmaʋɛ, é zalaɠa ɠulazu lɔfela lo, é nikɛ zinɛ ɠila ta baala sinɛ ɠila kula ga zalaɠai, ti ɠilagilagi maazu. 15 Ɓalaame ɠɛni ma: «Lo ʋɛ ɗa-ɠala zalaɠai ɠoba, gè li munu, gè Ɠɔoɠɔ GALAGI laaɠomi.» 16 Ɠɔoɠɔ GALAGI ɠulani kɛlɛma Ɓalaame ʋɛ, é wooi ʋu da, é ɠɛ ma: «Ɠale ma Ɓalake ʋɔ bɛ, è ɓɔɛ pɔ ɠani.» 17 Ɓalaame ɠaleni ma Ɓalake ʋɔ bɛ, naa ɠɛni loni ná-gala zalaɠai ɠobaʋɛ, ta Moaɓe ɠundiɠiiti. Ɓalake ɠɛni ma: «Leeni ɠa Ɠɔoɠɔ GALAGI bogai?» 18 Ɓalaame faalaalii nii woni, é ɠɛ ma:«Ɓalake wuzeɠe, è woilo!Sipɔɔl ná-doun zunui, woilo gòoi ma! 19 GALA ge la ga nuɓusɛi, é ʋa zɛɛi wo,ɓaa nu vulu, é ʋa zeɠe kpɔɛ wooi ʋa.Nii é bogai, é la naa ɠɛa ɓaa?Toɠa woo wo, é la su vai ɠɛa? 20 Wɛlɛ, gè devei zɔlɔɔga ga gè tuya loo,GALA ge tuya loa, gè la seɠezu ma. 21 É la telebotala vaa ɠaani Zakɔɓe ʋa,é la sɔletala vaa ɠaani Izilayɛle nuɓusɛiti ba.Ɠɔoɠɔ GALAGI, é ga ná-GALAGI, naa ɠa tɔun polu,toɠa masadai ma ɠoozunɛɛi zɔlɔɔ ti ʋɔ bɛ. 22 GALA ge ti ɠulani Ezipete yooi ʋa,suvikɛi ɠulaʋɛ ga teɠui zuvikɛi ti ʋɛ. 23 Zoɠolai la ga faa nɔpɛ Zakɔɓe mavofodai ɠaazu,ɓaa ungaiziɛ vai Izilayɛle laalɔɠɔma.Yeeɠɛɠala ʋagɔi ma, toɠa ɗa wo Zakɔɓe ta Izilayɛle ma,nii kpein GALA ge kɛɛzu. 24 Niima nuɓusɛiti ta wuzeɠezu eɠɛ zalai,toɠa ɠaalɔsu eɠɛ zalai,é ɗa ná-sua zogai mi,é ɗa ná-sua zogai ma ɲamai ɓɔle,naa ʋoluma ɠa niina a ɗa laa la.» 25 Ɓalake ɠɛni Ɓalaame ma: «Ni è la ti voovooni, mina tuya loo ti ʋɛ, ga tago ɓalaa.» 26 Ɓalaame gooɠaaʋoteni, é ɠɛ ma: «Gè la boni è ma ɓaa ga nà naati kpein nɔ ɠɛ, nii Ɠɔoɠɔ GALAGI bosu?» 27 Ɓalake ɠɛni Ɓalaame ma: «Ʋa deɠɛmu, nà liizu ga ɗe adaʋɛ taɠili, tanisu GALA ka pɛtɛ názu ga ɗa nuɓusɛi niiti foovo nɔ̀un bɛ.» 28 Ɓalake liini ga Ɓalaame Peyɔɔl gizei unmaʋɛ, nii é zɛlɛni teʋebai maazu. 29 Ɓalaame ɠɛni Ɓalake ma: «Zalaɠa ɠulazu lɔfela lo bɛ̀, è nikɛ zinɛ lɔfela ta baala sinɛ lɔfela ɠɛʋele ɓɛtɛ bɛ̀ ʋɛ.» 30 Ɓalake naa ɠɛɛni, nii Ɓalaame boni. É nikɛ zinɛ ɠila ta baala sinɛ ɠila kulani ga zalaɠai, zalaɠa ɠulazuʋɛ ɠilagilagi.

Numbers 23 (TOMA)

In Other Versions