Isaiah 38 (TBIAOTANT)
1 Dughiar kamɨn, Asiriaba bar arazir kurabar Judabagh amima, Hesekia arɨmariam inigha atam areme. Ezɨ Emosɨn otarim Aisaia ghuava an ganigha kamaghɨn a mɨgei, “Ikiavɨra Itir God kamaghɨn mɨgei, ‘Nɨn arɨmariam gɨvaghan kogham, a ikɨvɨra ikɨtɨ nɨ ovegham. Kamaghɨn amizɨ, nɨ gumazamizir nɨn dɨpenimɨn itibav kemeghtɨ, me nɨn ingangariba bar dar amu dar kɨrigh.’ ” 2 Ezɨ Hesekia akar kam baregha, uan guam isa a itir dɨpenimɨn averiamɨn bɨrimɨn gara, Ikiavɨra Itir God ko mɨgɨa ghaze, 3 “O Ikiavɨra Itir God, kɨ uan navir averiamɨn aven nɨ baghavɨra ikia nɨn ifongiamɨn gɨn ghua, bar guizbangɨra zurara nɨn ingangarim deravɨra a gamuavɨra iti. Kamaghɨn amizɨ, kɨ amizir ingangariba, nɨ dagh nɨghnɨgh na ateghtɨ, kɨ ovengan kogham.” Egha Hesekia Ikiavɨra Itir God ko mɨkemegha gɨvagha, bar puvɨram azi. 4 Ezɨ Ikiavɨra Itir God ua kamaghɨn Aisaia mɨgei, 5 “Nɨ mangɨ kamaghɨn Hesekia mɨkemegh, ‘Kɨ Ikiavɨra Itir God, nɨn inazir afeziam Devitɨn God, kɨ nɨn azangsɨzim baregha nɨn temeribar ganigha gɨfa. Kamaghɨn amizɨ, kɨ nɨ ateghtɨ, nɨ ua 15plan azenibar ikegh gɨn ovengam. 6 Egh kɨ nɨn akuragh, Asiriabar atrivimɨn amamangatɨghtɨ, a nɨ abɨragh Jerusalem inighan kogham. Bar puvatɨgham. 7 “ ‘Kɨ Ikiavɨra Itir God, kɨ ababanitam nɨ danightɨ, nɨ kamagh fogh suam, kɨ damuasa akam akɨrigha gɨvazir bizim, kɨ a damuam. 8 Nɨ gan! Ababanir kam kamakɨn, Atrivim Ahas fomɨra ingarigha asarazir adɨrɨziam, ia an dughuazibar gara aruemɨn auaba medi. Aruem datɨrɨghɨn ghuaghiri, eghtɨ kɨ a damightɨ, a tɨmɨra uamategh overiamɨn mangɨtɨ, an angazangarimɨn dughuazim adɨrɨziamɨn 10plan ighuvibar pɨn uamategh ghuavanabogham.’ ”Ezɨ aruem uaghira adɨrɨziamɨn dughuazim gamima, a zuamɨra tɨmɨra uamategha pɨn ghua adɨrɨziar ighuvir 10ɨn pɨn itimɨn tu, a datɨrɨghɨn 10plan auan a faragha ikezɨ moghɨn iti. 9 Ezɨ Hesekia ua ghuamaghegha akar kam osira ghaze: 10 Kɨ kamaghɨn uabɨ gɨnɨghnɨgha ghaze, kɨ ti uan igiamram aremegh nguazir kam ategham.Egh mangɨ Gumazamizir Oveaghuezibar Nguibamɨn ikiam. 11 Kɨ ghaze, kɨ gumazamizir angamɨra itibar tongɨn ikɨ ua Ikiavɨra Itir Godɨn ganighan kogham.Kɨ Gumazamizir Oveaghuezibar Nguibamɨn mangɨ,egh ua nguazir kamɨn itir gumazamizir angamɨra itibar ganighan kogham. 12 Nan angamɨra itir ikɨrɨmɨrir kam, mati averpenim,gumaziba anepɨrigha a inigha ghu.Kɨ ghaze, nan ikɨrɨmɨrim, mɨtarir ruarimɨn mɨn ruaragham,egha kɨ mɨtarimɨn mɨn a gɨrɨghavɨra iti. Ezɨ puvatɨ.Nan ikɨrɨmɨrir kɨ datɨrɨghɨn itir kam,mati amizim mɨtarim gɨrɨzi moghɨn, me zuamɨram anetughtɨ, an otevegham.God, nan ikɨrɨmɨrir angamɨra itim nɨ zuamɨra anegɨfagh. 13 Kɨ dɨmagaribar nɨghnɨgha ghua mɨzarazibar tu, egha ghaze,Nɨ laionɨn mɨn nan aghariba apɨri.Nɨ dughiaba bar na gamima,nan ikɨrɨmɨrir kam gɨvasava ami. 14 Kɨ mɨzazim isa ara deima, nan arareba gavgaviba puvatɨ,mati kuarazir nguzimɨn ararem.Nan arareba, da kuarazir bunbamɨn ararebar mɨn bar nɨmɨram arai.Kɨ dughiar bar ruarimɨn akurvazim iniasa, kogha overiamɨn garava araima,nan damazimning teriba ira na gamizɨ, kɨ bar amɨra.O Ekiam, kɨ osɨmtɨzir bar ekiam iti, ezɨ nɨ izɨva nan akuragh. 15 Egh kɨ manmaghɨra mɨkɨmam? Ikiavɨra Itir God, nan akurvaghasa akam akɨrigha gɨfa,egha a datɨrɨghɨn bizir kabagh amizɨ da otifi.Kamaghɨn amizɨ, kɨ uan navir averiamɨn aven osɨmtɨzir ekiar na batozir kam gɨnɨghnɨsi,egh pura uabɨ abɨragh nɨmɨra ikɨmangɨ ovengamin dughiam otogham. 16 O Ekiam, nɨ ikɨrɨmɨrim isɨ gumazamizibar anɨngtɨ,me angamɨra ikiam.Ezɨ bizir na bativizir kaba, da ikɨrɨmɨrir igiam nan duam ganɨngi.Nɨ nan arɨmariam agɨvagha na gamizɨ,kɨ ua dɨkavigha ghuamaghe. 17 Ezɨ osɨmtɨzir ekiar na bativiba, kɨ dar gara fo,da nan akurvaghasa otifi.Ezɨ datɨrɨghɨn, nɨ bar moghɨra nan arazir kuraba gɨn amadagha gɨfa.Nɨ bar moghɨra na gifuegha nan amamangatɨzir puvatɨzɨ,kɨ Gumazamizir Oveaghuezibar Nguibamɨn ghuzir puvatɨ. 18 Gumazamizir Oveaghuezibar Nguibamɨn itiba,me nɨn ziam fan kogham.Egh nɨ uan gumazamiziba bagha zurara amir bizir aghuiba,me dar ganan kogham. 19 Gumazamizir angamɨra ikiavɨra itiba,guizbangɨra merara, kɨ datɨrɨghɨn nɨn ziam fe moghɨn, me nɨn ziam fa nɨ mɨnabi.Amebaba ko afeziaba, nɨ zurara amir bizir aghuiba,me dar gun uan boribav gei. 20 Ikiavɨra Itir God nan akuragha na gamizɨ kɨ ua ghuamaghe.Eghtɨ dughiaba bar, e Ikiavɨra Itir Godɨn Dɨpenimɨn mangɨ,gitabav sogh, ighiaba bangɨ an ziam fam.E datɨrɨghɨn angamɨra itir dughiar kam,e kamaghɨra zurara a ziam fɨvɨra ikiam. 21 Aisaia faragha kamaghɨn mɨgɨa ghaze, “Atrivimɨn ingangarir gumaziba, fighɨn ovɨzir me apuzizɨ taba inigh, da mɨrmɨrigh dɨpatam darugh da munumigh da inigh izɨ, Hesekian okar gavgavim dukuaghtɨ, a ua deragham.” 22 Ezɨ Hesekia faragha uaghan kamaghɨn Aisaian azara, “Ikiavɨra Itir God, ababanir manam nan akaghtɨ, kɨ an ganigh fogh suam, kɨ uam an Dɨpenimɨn mangɨ, an ziam fam?”