Acts 18 (TOMA)
1 Naa ʋoluma, Pɔle zeɠeni Atɛne, é li Kolɛnte. 2 É Zuifu ɠila pɛtɛni ná, daaseigi ga Akilase, é ɠɛni ga Pɔn nu, ta anzai Pilisile ti ʋaani nɔ feya ti zeɠe Itali, tɔɔzei masagi Kelode devei veeni ga Zuifuiti pɛ ti maaɠooza Wɔlɔme ʋa. Pɔle ɠilini ti ʋa, 3 tɛi ɲɛɛliɠi ɠilagi nɔ ɠa é ɠɛni ti pɛ ti ya ga seɠe ɠota ɓɛtɛ vai, é yɛni ti ʋɔ bɛ, ti ɗa botii ɠɛ ʋɔɔma. 4 Dooɠo foloi ɠilagilagi pɛ Pɔle ɠɛni ɓɔɛzu Zuifuiti ta zii ɠiligiti pɔ, GALA dɛbi ʋɛlɛi wu, é ɠɛni ɠaaɓaazu ga é ti lati. 5 Siɛgi zu Silase ta Timɔte ti ʋaani la, ti zeɠe Masedoane, Pɔle ɓɔɠɔ veeni GALA daawooi laazeeli vai nɔ ya niina, é ɠɛni dɛɛzu ga Zuifuiti ga Yesu ɠa é ga Kilista. 6 Kɛlɛ tɛi Zuifuiti ti ɠɛni maaɠaalizu ga woo ɲɔiti, é ná-seɠeiti suɓukpunɛni, é ɠɛ ti ma: «Wo-ma ɲamai ɠa la niina wo unma, wa-vaa nɔpɛ ge la mɔ nɔ̀un unma, ɓɛ niina gè ɠaaʋote zii ɠiligiti ma.» 7 É zeɠeni miná, é li zunui ta ná-pɛlɛi wu, nii é ɠɛni ga GALA gaazuluaba nu, daaseigi ɠɛni ga Titiyuse Zusetuse, ná-pɛlɛi ɠɛni GALA dɛbi ʋɛlɛi ɠobaʋɛ. 8 Anɛɛ naa ʋe, GALA dɛbi ʋɛlɛi ma ɠundiɠii, nii daa ɠɛni ga Kilisepuse, naa ɠidaaleʋeni Maliɠii ma, ta ná-pɛlɛ wu nuiti pɛ. Kolɛnte nui ma mɔinmɔin ɓalaa, niiti ti ɠɛni Pɔle woomɛnisu, ti ɠidaaleʋeni, ti ɓatizei zɔlɔɔ. 9 Yeeta kpidii, Maliɠii ɠɛni Pɔle ma kulakɛlɛmai zu: «Mina lua pɛ, ɓɔɛ mina maaɠɛ kpɔ, 10 tɔɔzei nɔ̀un nà è ʋa, nu nɔpɛ ge la vɔɔɠua è ʋa, é ʋa faa ɲɔu ɠɛ ga ɗe, mazɔlɔɔ nà-nuɓusɛi wola mɔinʋɛ taai nii zu.» 11 Pɔle kɛɛni Kolɛnte ga kona gila ta tukpɛ (1,5), é ɗa nuiti kala ga GALA daawooi. 12 Siɛgi zu Galiyɔn ɠɛni la ga Akayi masagi, Zuifuiti pɛ ti zolooni faa ɠila ma, ti wuzeɠe Pɔle laalɔɠɔma, ti liini la tukpɔɠaaleʋezuʋɛ, 13 ti ɠɛ ma: «Zunui nii ɠa é nuiti tatisu, é GALA dɛbi ʋelei taɠili dɛɛzu ga nuiti, nii é la zolooni tɔgi ma.» 14 Pɔle ɠɛnina ɠɛɛzu é ɓɔɛ, eyɛsu Galiyɔn kpɔɛi zeɠe, é ɠɛ ma: «Ee, Zuifuiti! É ga é ɠɛni ga telebotala va ɓaa faa ɲɔu va, nà la woilo wo-woo ma, ʋelei maanɛai é ɠɛ la, 15 kɛlɛ tɛi é ga maaɠaali nɔ, é ʋilɛ wooiti ta daaseigiti ba, naa ʋɛɛ wo ɓɔɠɔ lɔgiti ba, wa-vaa ɠana. Gè la pɔ ga gè ɠɛ ga naama lukpɔɠaaleʋe nu.» 16 É ti ɓɛɛni, ti zeɠe tukpɔɠaaleʋezuʋɛ. 17 Ti pɛ ti Sosɛtɛne zoni naazu, nii é ɠɛni ga GALA dɛbi ʋɛlɛi ma ɠundiɠii, ti ɗa doɠa tukpɔɠaaleʋezuʋɛ ɠakala. Kɛlɛ Galiyɔn maavaa la ɠɛni naa zu. 18 Pɔle ku ɠɛɛni fele Kolɛnte, naa ʋoluma é valini kidaaleʋe nuiti ma, é lɛ ɓatoi zu, dii vai zu Siili ʋele, ta Pilisile naa ʋɛɛ Akilase ʋa. Aisa é ʋa zeɠe ná, é nɔungi ɓuyeni ma ɓato losuʋɛ Sankelé, tɔɔzei é minazeɠe kɛɛni. 19 Siɛgi zu ti zeelini la Efɛze, Pɔle siɛɲɔɠɔiti zɛni miná. É lɛɛni GALA dɛbi ʋɛlɛi wu, é ɗa ɓɔɛ Zuifuiti pɔ, 20 naati ti maanɛɛnɛni ga é yeeɠɛɠala go ɠɛ ti ʋa, kɛlɛ é la ɠɛni vaani naa wu. 21 Anɛɛ naa ʋe, seɠezuʋɛ ná, é ɠɛni ti ma: «Ni GALA ka vaana bu, nà dɛ ɠalesu ma wo ʋɔ bɛ.» É lɛɛni ɓatoi zu Efɛze. 22 É ɠulani ɓatoi zu Sezalé, é zeɠe miná é lɛ Zeluzalɛme, é laali Egilisii zu nuiti ma, naa ʋoluma é yeini Antiyɔse. 23 É ku ɠɛai ma fele miná, é ɠaleni ma ʋolu, é ɗa leʋeteʋe Galate ta Filizi yooiti su, é ɗa kaladopoiti iɲɔdɔ. 24 Zuifui ta ʋaani Efɛze, é ɠɛni ga Alɛgezandili nu, daaseigi ɠɛni ga Apolɔse. Zunui naa ɠɛni ga kpɔɛzuɠula nu wola, kalagai gola GALA Sɛʋɛi zu. 25 É ɠalani ga Maliɠii ná-pelei ma vai, zɛbɛi ɠɛni ba, é ɗa nuiti kala ga Yesu ná-faiti ga gaamai, kɛlɛ Zan ná-ɓatizei nɔ ɠa é ɠɛni kwɛɛni. 26 É tɔɔzeini ga ɓɔɛa ga ladalai GALA dɛbi ʋɛlɛi wu, kɛlɛ siɛgi zu Pilisile ta Akilase ti goomɛnini da, ti seɠeni ti maaɓuɠa ɓɔɠɔ ʋa, ti GALA ná-pelei lɛɛ la ga pagɔ. 27 Tɛi é deveni ga é li ga Akayi ʋele, kidaaleʋe nuiti ti iɲɔdɔɔni. Ti sɛʋɛi ɠɛɛni kaladopoiti ma ga naati ti yeezei bu ga pagɔ. Seeliai ma miná, é ɠɛni ga kpɔba nu wola naati bɛ, niiti ti ɠidaaleʋeni GALA ná-zaalai zaɓui zu. 28 Tɔɔzei é ɠɛni Zuifuiti ta-ɓɔɛiti polulaazu nɔ kpaun kɛlɛi zu, é ɗa dɛɛ ga tiye GALA sɛʋɛiti su ga Yesu ɠa é ga Kilista.