Acts 24 (TOMA)
1 Folo lɔɔlugɔ ʋoluma, zalaɠa ɠula ɠundiɠi wolai Ananiase, ta totuɠɔiti, naa ʋɛɛ laavaawo gila ba daaseigi ga Tɛɛlɛtule, ti yeini Sezalé. Ti zeelini zou zɛʋɛ ɠundiɠii Felikise ʋɔ bɛ, ti ɓaazaɠa ma ga Pɔle laalɔɠɔ. 2 Ti naa lolini, Tɛɛlɛtule ná-kpɔɛzuɠulai lɔɔzeini ɠani: «Ee, gá-nu ʋagɔi Felikise, è zaala ɠa gi ziilɛi daazeeliai zu la, ta falibo pagɔi niiti ti zooi zu, gi naati sɔlɔɔga ga ɗa-ɠima wotii maaʋele. 3 La da ga yeeɠɛɠalai pɛ su, ta adɛ pɛ gi ɗa-vaaɓɔɠɔi wuuɠwɛɛ. 4 Kɛlɛ gi la pɔ ga gi è lɛbi zeini ada ɠilagi, naa ɠa é ba, soma ɗa-nuʋagɔlai zu, è woilo gi-woo ma yeeɠɛɠala ɓuɠa ko laawu. 5 Gi kaaʋɛ ga zunui nii ɠa ga ɗeɓulusa nu wola nuɓusɛiti saama, toɠa kpɔɛi lɔɔzu Zuifuiti pɛ zɔɠɔzu eteai zu ná pɛ, tɔ ɠa é ga Nazalɛte ɠalabo nuiti ta-lotuɠɔi. 6 É ɠaaɓaani vɔlɔ ga é GALA sei ʋɛlɛi ɠɔzɔ, tama gi so. [Gi ɠɛni pɔ ga gi ná-tukpɔi ɠaaleʋe, eɠɛʋelei gá-lɔgi la. 7 Kɛlɛ kɔɔɠuluɓai Lisiyase ʋaani ga maaɓaai, é kula gi ya, 8 é devei ve ga gi ʋa, gi gá-ɓaazaɠai la è ʋɔ bɛ.] Ɗa ɓɔɠɔi è gaazaɠa, è naama vaiti kwɛɛ niiti gi ti-ma ɓaazaɠai wosu è ma ga daalɔɠɔ.» 9 Zuifuiti ti vaani bu, ti ɠɛ ma zekana niima vaiti ti la. 10 Zou zɛʋɛ ɠundiɠii yeeleteni Pɔle ma ga é ɓɔɛ, Pɔle kpɔɛi zeɠeni, é ɠɛ ma: «Gè kwɛni ga kaite ɗa ɠa è tukpɔi ɠaaleʋezu gá-yooi zu, naa maaʋele ma nà ʋaazu nà-goozuɠulagi wosu è ma ladalai pɛ su. 11 Ɗa ɓɔɠɔi ɗa zoo è poluɠula ga é la dɛ leʋeni folo puugɔ maazu felegɔ (12) ʋa, gè lɛɛni Zeluzalɛme GALA dɛbi vai ma. 12 Nu la kàani GALA sei ʋɛlɛi wu, ɓaa GALA dɛbi ʋɛlɛiti bu, ɓaa taazuʋɛ gi ʋa ɗa maaɠaali ɠɛ ga nu, gè ʋa nuɓusɛiti buzeɠe kpɔɛleʋe vaa ma. 13 Niima nuiti ti la zooga ti ʋa gaama ɠila kpalaa dɛɛ naama vaiti su, niiti ti màalɔɔzu ti zu. 14 Nii gè kwɛni naa ɠa ga, nà gi-mɛmɛwolani ta-ƓALAGI lɛbizu ga kidaaleʋe ʋele niinɛi, nii ti ɠɛɛzu ma, gaaɠwɛ ʋelei. Nɔ̀un, dàaʋɛ naa pɛ da, nii sɛʋɛai tɔgi zu ta GALA goo wo nuiti ta-zɛʋɛiti su. 15 Kitogi ɠa zèa, é lo GALA ba, naama ɠitogi ɠa ɓalaa ga tɔnɔ, ga gɔvɛiti ta wuzeɠe saai ya, telebo nuiti ta telebotala nuiti. 16 Naa ɠa é ba, nà ɠaaɓaazu kele yeenɔpɛ ga peelalazu nɔpɛ ge mina ɠɛ bà nà-kisiɛi zu, GALA ta nuiti gaazu. 17 «Naa ʋolu kona mɔinmɔin teʋegai ma, pàaʋɛ ga gè faaɓɔɠɔi ɠɛ nà-zou zu nuiti bɛ, ta gè zalaɠa ɠula, gè fe GALA bɛ. 18 Názu ɠa ti kàani la GALA sei ʋɛlɛi ma ɠoizuʋɛ, kpegai ma ga nà-ɲade fai pɛ kɛ, bɛbɛ la ɠɛni kòba, zɔngɔ la ɠɛni ná. 19 Kɛlɛ Zuifui tanigaa ti zeɠeai Azi, naati ka ti ʋa ti pɛ̀tɛ, tiya mu ka vɔlɔ maa ɠɛa nɛɛni ga ti ʋa ti ɓaazaɠa è ma, ni faa ɠa ti ɠisu nɔ̀un daalɔɠɔma. 20 Ni naa laade, zɔiti ti ʋɛ, naati ti dɛɛna nii nɔpɛ ti kaai ga pèelalazuʋɛ, siɛgi zu gè ɠɛni la tukpɔɠaaleʋe nu wolaiti kakala. 21 Kɛni, ni ti yiiɠaawanaʋɛ mà, tɔɔzei naama wooi ʋa gè boni kpaun ti zaama ga: ‹Kitogi é zèa gɔvɛiti buzeɠe vai ʋa saai ya, naa maaʋele ɠa za tùkpɔɠaaleʋezu la wo ɠakala.› » 22 Tɛi Felikise ɓɔɠɔi faa ɠiteɠite kwɛɛ é ʋilɛ kidaaleʋe ʋele niinɛi ʋa, é ku loni ma dɛ, é ɠɛ ti ma: «Siɛgi zu kɔɔɠuluɓai Lisiyase ʋaazu la, nà ɗa-vai wuuʋɛtɛ niina.» 23 É devei veeni salaʋusu ɠundiɠii ya ga é makɛ Pɔle ma kasoi ɠa, kɛlɛ é mina ɗa ga naa wola ɓata, ta é mina pele leʋe naa ná-nui tanɔpɛ tuɠɔ ga ti ʋa faa ɠɛ bɛ. 24 Ku ɠɛɛni fele naa ʋoluma, Felikise ʋaani ta anzai Dulisile, nii é ɠɛni ga Zuifui ta. É nu leʋeni ga ti ʋa ga Pɔle, é woiloni naa woo ma, é ʋilɛ kidaaleʋei ʋa Yesu Kilista ma. 25 Kɛlɛ tɛi Pɔle ɠɛni ɓɔɛzu, é ʋilɛ telebodai ʋa, ta ɓɔɠɔzogi, naa ʋɛɛ tukpɔi ʋa é ʋaazu, Felikise luani gola, é ɠɛ Pɔle ma: «Ɠula ʋolu dɛ, voloi nà yeeɠɛɠala ʋagɔ zɔlɔɔ da, nà è loli niina.» 26 Ki ge ɠɛni ba ga Pɔle ɠa wali veezu zea, naa ɠa é kɛɛni é ɠɛni naa lolisu da valafala, é ɗa yɛpɛ pɔ. 27 Ti yɛni naa zu kona felegɔ leʋe, naa ʋoluma ti Felikise maavalibo ga Pɔlisiyuse Fɛsɛtuse. Tɛi Felikise ɠɛni pɔ é Zuifuiti ziima vai ɠɛ, é Pɔle yɛni kasoi ɠa.