Hebrews 12 (TOMA)
1 Adɔun, de maaɠooliʋɛ ga zeele ʋɛbɛ wolai. Naa ɠa é ba, ade kasɔiti pɛ pili ya, ta kotoi nii é de maavelevelesu vaa. Ade kpizɛi wo ga ziilɔɔi, suɠɔɠɔ bosuʋɛ naa de luɠɔ. 2 De ɠaazulo Yesu ʋa kpaan, nii é kidaaleʋei lɔɔzeiɗa de ʋɛ, é liizu la eyɛsu daazeeli. É vaani bu ga ti paa saa wului ma, é la naama zaa zii leveni ga unfe faa nɔpɛ, tɔɔzei é ɠɛni koozunɛɛi ɠwɛɛ, makɛga ɠɛni de tuɠɔ, toɠa zeini niina GALA ná-masa kpɔkpɔgi yeezazuʋɛ. 3 À ɠigaiziɛ lɛɛ tɔun su, ʋelei é yiilɔɔni la naama laazuɠɔli vaiti bu, kotoba nuiti ti ti zeini ma. Naa ɠa é ba, à mina ɓɔlɔ, wo iɲɔ ge mina leʋe. 4 Mazɔlɔɔ wo la dɛ ɲɛpii ɠɔɔni kotoi laalɔɠɔma eyɛsu wo ʋa zeeli saai ma. 5 Wo yeema iɲɔdɔɔ wooiti ma GALA ge bosu wo ma, eɠɛʋelei a ɗa wo da doun zunuiti ma ga:«Dòun zunu, mina Maliɠii ná-maaɠoloi ʋɛlɛʋɛlɛ,mina iɲɔteʋe siɛgi zu é zelii losu da è ma. 6 Mazɔlɔɔ nii Maliɠii nɛai ʋɛ, naa ɠa a ɗa maaɠolo,toɠa ɗa naati ta-vaa ɲɔiti daazale, zɔiti é ti ɠwɛɛ ga ná-doun zunuiti be.» 7 À yiilɔɔ maaɠoloi wu, GALA ka wo zosu eɠɛ ná-doun zunuiti. Mazɔlɔɔ naama loun zunui ɠa mini, nii kɛɛɠɛ la ɗa ga maaɠoloa? 8 Pelegi é ɛsɛ pɛ maaɠolozu la, ni wo la maaɠoloi zɔlɔɔni ɠana, wa ga wɛɛn lointi, wo la ga doun zunu ɠitea. 9 Tama, de zɔlɔɔ kɛɛɠɛiti ti ɠɛni de maaɠolozu eteai zu, de ɗa unfe ti ma. De la ɓudɛzu naa maazu ɓaa, de ʋa ɠolo de-Ɠɛɛ ʋɛ, é geezuʋɛ, de ʋa zɛnvui wo? 10 Ade-ɠɛɛni ti ɠɛni de maaɠolozu yeeɠɛɠala go vaa nɔ ma, eɠɛʋelei é zolooni da ti ɠaazu. Kɛlɛ GALA ka de maaɠolozu da-ɠulagaanɛɛzu ɠitei ma vaa ma, naa ɠa a kɛ, de dɔnɔ zɔlɔɔ ná-ɲadedai zu. 11 Gaama ʋe ga maaɠolo vaa nɔpɛ ge la ɗa ga ɠɛ ga koozunɛ vaa tɔɔzeizuʋɛ, kɛni ziiɓɔlɔi. Kɛlɛ su a ɠoozana, zɔiti ti naa ɠɛɠala maaɠoloi zɔlɔɔsu, ta ɗa ɠɛ ga telebo nuiti ti ziilɛigi zɔlɔɔ. 12 Naa ɠa é ba, à wo-yeeiti sulo ʋolu, niiti ti zuɓɔlɔai. À wo-ɲiibiiti sasulɔ, niiti ti zuɓalizu. 13 À ziɛ ga pele zɔlegiti, naa ɠa a kɛ dɛkpu ɠɔɠɔi mina ɠale siɛi wu, kɛlɛ tɔun é ɠɛdɛ. 14 À ɠaaɓa, ziilɛigi ɠɛ wo yɔɠɔzu wa nuɓusɛiti pɛ, ta wo ziɛ ɲadedai zu, é ɠula naa ʋolu, nu nɔpɛ ge la zooga é ʋa Maliɠii ɠa. 15 À dama ga nu nɔpɛ ge mina ʋala GALA ná-zaalai ma. Nu nɔpɛ ge mina ɠɛ ga ani zuwu ɲɔi, é ʋa ʋɔnɔ, é ʋa kpɔlɔi wuzeɠe, é ʋa ma mɔinmɔin kɔzɔ. 16 Nu nɔpɛ ge mina ɠɛ wo zaama ga koloɠolo nui, ɓaa faa ɲadegaiti pɛlɛʋɛlɛ nui ga Ezawu ɠɛʋele, niigi daamii laa ɠila kpegi vaa zu, é ná-doun mɔun tosuʋɛ ʋɔdini. 17 Wo kwɛni ga naa ʋoluma, é ɠɛni pɔ ga é kɛɛɠɛ ná-tuyai zɔlɔɔ, kɛlɛ naa ʋoluaveni ba, mazɔlɔɔ zobo nɔpɛ ge la mɔ ɠɛni ná, kɛɛɠɛ ʋa naa maavalibo, nii kɛai niina, anɛɛ ni é ɠɛni gaiziɛzu ga gɔlɔi. 18 Wo la maaɓuɠani naama ɠizei ʋa, ga Izilayɛle nuiti kɛʋele teʋebai zu, nii nu a zoo é vɔɔɠu ba, abui sosu ba, kpidii ʋɛɛni ma, ná zuɓidiai, fiilɛ wolai ná, 19 ta puʋu gooi, ta wooiti ti ɠɛni mɛnisu, nuiti ti ɠɛni mɛnisu, naati ti maanɛɛnɛi woni ga woo nɔpɛ ge mina mɔ wo ti ma ʋolu. 20 Mazɔlɔɔ ti la ɠɛni zoosu ti ʋa ziɛ devei naa wu ga: «Anɛɛ suai nɔpɛ a vɔɔɠuna gizei ʋa, toɠa zɔɔ ga kɔtui, é za.» 21 Naama vai maaluani gola, eyɛsu Moize ɠɛni ma: «Gè lua gola, gè ɗa ɓali!» 22 Kɛlɛ wɔun, wo maaɓuɠaa Siyɔn gizei ʋa, zɛnvu su ƓALAGI ná-taai, Zeluzalɛme nii é geeɠɔlɔgi zu, ta ná-geezuɠeela ɓulu golaiti ti koozunɛɛi zu. 23 Wo maaɓuɠaa doun mɔungiti ba, ti-laaseigi zɛʋɛai geeɠɔlɔgi zu, ti maaɓɔgai ta-ɠaalɛbai zu. Wo maaɓuɠaa GALA ba, nuɓusɛiti pɛ tukpɔɠaaleʋe nui, ta telebo nuiti ti-yɛnvuiti ba, ta-vai pɛ daazeeliai niina. 24 Wo maaɓuɠaa Yesu ʋa, é ga minazeɠe niinɛ ma yɔɠɔzuɓɛtɛ nui, ta tɔ ɓɔɠɔi ɲamai nii fazagai, é ɓɔɛzu ga pagɔ, é leʋe Aɓɛle nɔnɔi ʋa. 25 À dama deɠɛmu! Wo mina ɓe woilosu naa wooi ma, nii é ɓɔɛzu wo ʋɔ. Niiti ti la ɠɛni kɛɛni ti ʋa woilo naa wooi ma, nii é ɠɛni ti lɛnɛsu eteai zu, undaaʋiligi la ɠɛni ʋoolani ti ʋa. Ada ma, da ɠizo ɠale, ni da ʋoluavena naa ʋa, nii é ɓɔɛzu de ʋɔ, é zeɠe geeɠɔlɔgi zu, é ɗa de lɛnɛ? 26 Mɔungi, daawooi zooi ɓalini, é niima minazeɠegi wogɛ de ʋɛ niizu ga: «Nà ʋaazu zooi ɓalizu ʋolu mɔnɔ ná ɠɛ ɠila, kɛlɛ é la ɠwɛ su naa ʋa, nà geeɠɔlɔgi ɓalaa ɓali.» 27 Naama wooi é ɠɛɛzu ma: «Ʋolu mɔnɔ ná ɠɛ ɠila,» naa ɠa dɛɛzu ga aniiti ti ɓɛtɛai, naati ta ɲiikpisu, ti ɲɛɛlɛ, naa ɠa a kɛ, niiti ti la ɲiikpiga, naati ti yɛ ná ɠɔ. 28 Deɠɛmu ade ɠɛ ga faanɛɛ wuuɠwɛɛ nuiti, tɔɔzei ada masadai zɔlɔɔsu nii é la ɲiikpiga. Ade GALA dɛbi ga kɛʋelei nii soloogai de ɗa fe bɛ, ga unfema ʋele ta duabai. 29 Mazɔlɔɔ da-ƓALAGI ɠa ga abui nii é anii pɛ galazu.