Hosea 7 (TOMA)

1 «Siɛgi zu gè ɠɛɛzu la gè naa valibo,nii seiɗai nà-nuɓusɛi Izilayɛle luɠɔ, gè kɛdɛ,názu ɠa Efelayime ná-faaɠaazagiti ta Samali ɠɛɛwoti ɲɔiti ta ɠula la kɛlɛma.Ta tooma vaiti kɛɛzu,unma nuiti ti ɗa lɛ pɛlɛiti bu,toosu nuiti ti ʋilɛ koi yɔɠɔzuʋɛti. 2 Tanɔpɛ ge la bosu ɠisu ga faa ɲɔi kpein ti kɛɛzu,nɔ̀un gè faa ɠwɛɛ su.Niizu niina, ta-ɠɛɛwotiiti ti ti ɠilia kpekpe,gàazu ɠa naati pɛ ba. 3 Ta masagi ɠaamɔlɛzu ga ti-zɔ ɲɔiti,ti kundiɠiiti gaamɔlɛ ga ta-yaava vaiti. 4 Ti kpein ta ga wɛɛnzo nuiti.Ti ɠulaʋɛ ga sulugi, ɓulu loɠa nui suɓadiai ga abui,é la mɔ ɓɛdɛni suɓadi vaa ma,é zo ɓulu vukɔi ɠaayɔ siɛgi ma, eyɛsu é ɓokolo. 5 Ta-masagi ná-fɛti ɠula voloi,kundiɠiiti ta ɗa ɓɔɠɔ ɠɛ ga seeɓɛ nu, ti ɓadiai ga dɔɔi.Ɲɛɛɠulasu nui naati ka masagi a ɗa yeemaale ti ma. 6 Ta ɗa maaɓuɠa ba,ti-yii zuɓadiai eɠɛ ɓulu mɔ sulugi, woyai ɠili vai ma.Ti ʋɛɛni yiima ga ta-yiiɠaawanai kpidii ɲɛgɛlɛin daawu.Kɛlɛ geelaalaogai ma, é soni eɠɛ abu wola. 7 Ti pɛ ti ɓadini eɠɛ ɓulu mɔsuʋɛ,ta ta-ɠundiɠiiti galazu mulukulu.Ta-masagiti kpein ta ɗa loo bu ga gilagila,tama tanɔpɛ ge la ɗa ga wooɠulaa nɔ̀un ma. 8 «Efelayime ɓɔɠɔ zupua ga zɔɔma ziiti.Efelayime ɠulaʋɛ ga ɓului nii ti la tatini. 9 Wɛɛinti ta suvikɛi ɠulazu, é la loozu ga naa.Nɔundeɠaiti ta ga ɠole, é la gaaɠaazu. 10 Izilayɛle ná-wasogi ɠa zeele wooi wosu daalɔɠɔma.Niima maanɔɠɔi kpein seiʋɛ ti ma,kɛlɛ ti la gàazaɠani,ti la ɠaleni ma pɔ̀, nɛ̀i gè ga Ɠɔoɠɔ GALAGI, ta-ƓALAGI. 11 Efelayime ɠulaʋɛ ga dɔɓɔ ʋoopogi,kpɔlɔ ge la un su, é la ɠeleɠeleni.É Ezipete loligɛ, é ɓizɛ, é li Asiili ʋolu. 12 Kɛlɛ siɛgi zu é ɠɛɛzu liizu la ná,nà nà-wɔni zo tumɔi ʋilisu ma,gè too bu eɠɛ wɔnii.Nà ʋaazu maaɠolozu, siɛgi zu gè goomɛnisu da é ɗa ɠaalɛ ba. 13 Maanɔɠɔi ɠa ti luɠɔ, mazɔlɔɔ ta ʋelazu bà.Nimizai ɠa ti luɠɔ, tɔɔzei ti ɓakagɛ dàalɔɠɔma.Nɔ̀un nà la ti unmɔɔ,kɛlɛ tɔun, ta ɠɛna ɓɔɛa pɔ̀, zɛɛi ɠa ti bosu. 14 Siɛgi zu ti kpalagi wosu da ta-ʋeteiti su,ti la wooɠulazu mà ga ti-yii pɛ.Siɛgi zu ti ɓɔɠɔ maazaɠazaɠazu la,nii a kɛ ti moloi ta dɔɔi zɔlɔɔ,nà ɠa ti ʋoluavesu bà. 15 Nà ɠa gè ɠɛni ti ɠalasu, gè ti zɛbɛlɔ,faa ɠili nɔpɛ ge la ɠɛni ti ɠisu é lo bà, kɛni faa ɲɔi nɔ. 16 Ti la ɠalesu ma naa ʋɔ, nii é anii pɛ maazu,ti pɛ ti ɠulaa ga mɛɛin nii poolaai.Ta-ɠundiɠiiti pɛ ta zaazu kɔɔi zu,tɔɔzei poomu gooiti ba ti ti wosu,naa ɠa é ti ɠɛɛzu ga ɲɛɛɠulasu anii Ezipete yooi zu.»

Hosea 7 (TOMA)

In Other Versions