Isaiah 30 (TOMA)
1 «Nimizai ɠa wo luɠɔ, kololala lointi,wa faazeikpasuiti kɛɛzu, niiti ti la zeɠeni nɔ̀un pɔ,wo minazeɠegiti kpɛtɛ yɔɠɔzu, gè la ti leveni.Wa kotoi ta laazu ta maazu ɠana!»Ɠɔoɠɔ GALAGI wooi ɠana. 2 «Wa ziɛzu, wo ɗa li Ezipete yooi zu,kɛlɛ wo la gàazaɠasu.Falaɠɔn ʋɔ bɛ ɠa wo lɔɔɠuzuʋɛ ɠaiziɛzu ná,wa dooɠo bosuʋɛ ɠaiziɛzu Ezipete yooi ná-niinigi wu! 3 Falaɠɔn ʋɔ bɛ lɔɔɠu wo fai ɠa ɠɛ ga unfe faa wo ʋɛ,dɔɔɠuzuʋɛ wo naa ɠaiziɛzu ga Ezipete yooi zu,naa ɠa ɠɛ ga wɔungi maayei vaa. 4 Wa-ɠundiɠiiti ta na Soan,wa-ɠeelaiti ti zeelia Anɛse. 5 Ti pɛ ta unfe niima nuɓusɛiti faa zu,ti la ɠɛa ti ʋɛ ga kpɔba nu,ɓaa zeeve bɛ nu, ti la ɓalaa ɠɛa ga zeezei bu nu,kɛlɛ kɛni ti unfe ganii ta ta-ɓaaɠulama anii.» 6 Keela wooi é wosu toganiiti faa zu ti lɛkpɛmaʋɛ nu yeezazu ʋele yooi zu:Kidaaʋiligi ta ziizoolɛ yooi zu,zalaiti ta-yooi zu, zalai é zikɔzu,pɛɛɠaalii ta dɔɓɔwulususu zooi zu,ti ɗa li ga ta-zɔɔlaiti soovalegiti kɔma,ta ta-naavoloiti ɲɔmɛiti kɔma,nuɓusɛiti pɔ, niiti ti la kpɔba nɔpɛ kɛa ti ʋɛ. 7 Ezipete ɓɔbai ɠa ga wafuun faa, gaamɔlɛ anii,naa ɠa é ba, nà ɗa toli ga:«Toɠa leʋeteʋesu gola, kɛlɛ é la faa nɔpɛ kɛɛzu». 8 Ʋaana, naati sɛʋɛ ti ɠaazu kokologi ma,yeeʋozɛ ti ʋa sɛʋɛi ta zu,naa ɠa a kɛ naa ɠɛ ga zeele wooi,é yɛ ná ʋelela ʋele vaa ma, eyɛsu ɠɔ. 9 Mazɔlɔɔ kololala nuɓusɛiti be,ta ga yaava loun zunuiti,doun zunuiti ti la pɔ ti woiloƓɔoɠɔ GALAGI ná-tɔ gooiti ma. 10 Ti ɗa ɠɛ GALA goo wo nuiti ma:«À ɓe GALA goo wo fai ʋa!»Ti ɠɛ zɔiti ma ti kulakɛlɛmaiti kaazu:«À ɓe kulakɛlɛma ɠiteiti bosu gi ma.À ɗa woo ʋagɔ nɔ wo gi ma,wa-ɠulakɛlɛmaiti ti zɛɛ ɠitogiti fe gi ya. 11 À zeɠe pele ʋagɔi ʋa, à pele zɔlegi yɛ ná.À ɓe ɓɔizu gi la ga Izilayɛle ná-GALA Ɲadegai ná-fai.» 12 Naa ɠa é ba, Izilayɛle ná-GALA Ɲadegai wooi ɠa é ga nii:«Tɔɔzei wa ɠɛlɛzu niima wooi ʋa,wo ɗa ɓɔɠɔ lɔ tooma vai zu ta yaavai,wo ʋa ʋoluzeizua zɔlɔɔ, 13 naama vaaɠaaza golai ɠa ɠɛ wo ʋɛeɠɛʋelei siɠi gaaɠoozagi naa ta a ʋalina,é dɛɛ ga toɠa na ɠoloɠolo,é wuulɛ, gaamago nɔ é wolo. 14 Siɠigi ɠa ɓezeɠeleeɠɛ pɔlɔ liɠi lo nui ná-diɠii é ɓezeɠelesu,nu la maaɓuɠaa go pa sɔlɔɔga,a nu ɠula abu zeɠe vaa zu,ɓaa ziɛ zaɠa vaa zu ziɛyeɠei zu.» 15 Naa ɠa é ba, Maliɠii Ɠɔoɠɔ GALAGI Izilayɛle ná-GALA Ɲadegai wooi ɠa é ga nii:«Ni wa ɠalena ma, wo ʋa pɔ̀,wo maaɓɔungi wo, naa ɠa wa ɠizo da,ziilɛi ta ladalai ɠa wo-zɛbɛi su.»Kɛlɛ wo la ɠɛni vaani naa wu! 16 Wo ɠɛni ma:«Ɓa-o! Gá ʋela sooi ɠɔma!»Naa ɠa é ba, wa ʋela!Wo ɠɛni ma mɔnɔ:«Gá li sooiti kɔma ti wola ɓizɛzu!»Ni naa ʋe, wo ɓɛɛ nuiti gola zuvilɛʋɛ, tiya ɓalaa! 17 Wo zili nu ɠila kpegi ɠa nu waagilagi (1.000) maalua,ti pɛ ti ɓizɛ,nu lɔɔlugɔi a wo maaluana,wo pɛ wa ɓizɛ.Gaaɓelasu, wo-mɔtaiti ta yɛ zeizuʋɛti ɠaaɠaalɛi eɠɛ bɔɔlɔgi é zɛlɛni gizei ma,eɠɛ poogi é ʋilɛni gizei ma. 18 Anɛɛ naa ʋe, Ɠɔoɠɔ GALAGI ɠa maaɓɔungi wosu ɠɔ,é ʋa zaalai la wo ma.Toɠa wuzeɠe, é ná-maawɔinɠai lɛ ga woye.Mazɔlɔɔ Ɠɔoɠɔ GALAGI ɠa ga telebo GALAGI.Undaanɛ nu ɠa ga naati pɛ, niiti ti ɠitosu tɔun ba. 19 Ee, Siyɔn nuɓusɛiti, wo zeini Zeluzalɛme,wo la mɔ wɔlɔa pɛ.Mazɔlɔɔ wa wooɠulana Ɠɔoɠɔ GALAGI ma,toɠa zaala la wo ma,kɛʋele ɓɛtɛʋɛ wo-wooi mɛnisu-o,é wo wooɠaaʋote. 20 Mazɔlɔɔ Maliɠii ɠa daamianigi ve wo ya kidaaʋili foloi,ta ziɛi, ziizoolɛ yeei.Zɔi maanɛai é è ɠala, naa la mɔ lɔɔɠua è ʋa,kalamɔin a ɠɛ è ɠalasu, ɗa ka ga ɠaazuʋɛ. 21 Siɛgi zu è ɠɛɛzu è li ga è-yeezazu ʋelei ɓaa è-ɠɔʋɛzu ʋelei,ɗa ʋaazu wooi niiti mɛnisu è ʋoluʋelei, é ɠɛ è ma:«Wɛlɛ, pelei ɠa, ziɛ la.» 22 Walii siaai wa-ɠɔɔɠɔ ganigiti mata zanugi é ziɛzu wa-vololibaiti ma,wa naati deve ga ti ɠɔzɔʋɛ,wa ti ma ɓuɠaiti pili ya, wo kwɛɛ ga ti luulaʋɛ,wo ɠɛ ti ma: «À maaɠooza gi ʋa!» 23 Maliɠii ɠa tonai ve wo ʋɛ,wa-ani zuwuiti faa zu,niiti wa ti vaza zooi ma,zooi ɠa daamianigi ve wo ya,é mɔin, é ʋa gola.Naama volo ná, wa-loganiiti ta ɠɛ laamiizuga tufa lɛnugi nɛmɛ wolai zu. 24 Nikɛiti ta soovalegiti ta ɠɛ zooi wolizu,ta laami ga tufa vɔɔi kpoloi ba,ti suviegai ga taɠasagi, gaavɛɛ ga sɛpɛgi. 25 Nu ʋaa vaa wolai ma voloi,yeei pɛlɛ ɠaaɠooza golaiti ti loozu la,ziɛ yei ʋelei ɠa mɔin gizeiti maazuʋɛti,ta gize ɓufɛgiti maazuʋɛti. 26 Alugi ɠa volo eɠɛ foloi,foloi ná-wozakalagi ɠeɠaa ɠa ɓaa ná zeizu ɠɛ lɔfela.Toɠa ɠɛ eɠɛ folo lɔfela wozakalagi ʋɔɔma,voloi Ɠɔoɠɔ GALAGI a ɠɛ ná-nuɓusɛiti ta-ʋalai ɠaaɠilizu la,ʋɛti maawanai náti, toɠa mináti kɛdɛ. 27 Wɛlɛ Ɠɔoɠɔ GALAGI ɓɔɠɔi ʋa,é ʋaazu, é zeɠe ɠoozama,é ɗa ɠala su ga ziiɠaawana wolai,dakɔlɔgiti ti ɓali ga ziiɠaawanai,daawooi ɠa ga abui é sosu. 28 Daa viilɛi ɠɛɛʋɛ eɠɛ kɔtuɗɛi fegai,é ɗa yei ga aniiti pɛ.Paaʋe ga é zii ɠiligiti pɛ ɲiikpi,é ti ɠaavɛ maanɔɠɔ zɛpɛgi zu,é kalafe ɠɔlu ʋili nuɓusɛiti pɛ kpalɔɠaeiti ba,é ɗa li ga tiye ʋɛ ná nɛai bɛ. 29 Wa guyei loo,eɠɛ kpidii naa nu fɛtii ɠulazu la,wo ɠoozu ɠa nɛ wo-yiimaʋɛ,eɠɛ nu a ɠɛ ziɛzu, é ɗa koole vɛɛ wooi mɛni,wo ɗa li Ɠɔoɠɔ GALAGI ná-gizei ma,GALA pɔ bɛ, Izilayɛle Ná-Fasai. 30 Ɠɔoɠɔ GALAGI ɠa wooi ɠula, goo maayikiai,toɠa dɛɛ ʋelei a ɗa zeei ʋɛɛ su la,é ʋa doɠai wo da.Toɠa ná-ziiɠaawana wolai ɠula kɛlɛma,ta ná-abuzogi é galai wosu,tona wolai wu, fiilɛ wolai ba, ta sakɔtuiti. 31 Mazɔlɔɔ Asiili nuiti sasu ɠa ɓalita Ɠɔoɠɔ GALAGI wooi mɛnina,siɛgi zu a ti loɠana la ga ná-tukpɔi. 32 Tamadegi ta kɔnigi ti-wooi ɠa ɠɛ mɛnisu,ti loɠa ɓakɔi lugi ɠilagilagi wunii Ɠɔoɠɔ GALAGI a zei ti ma ti maaɠolo vai zu.Ɠɔoɠɔ GALAGI ɓɔɠɔi ɠa yeewuzeɠe, é kɔɔi ɠɔ ti laalɔɠɔma. 33 Kaite suɠoozaa, tutui zuɓɛtɛʋɛ na,kɛʋele ɓɛtɛʋɛ ɓalaa masagi ná-faa ma, suɠooza, suwɔɔlɔ,koʋii maaɓɔgɛ, naa gola mɔin, abui ɠɛʋele ɓɛtɛʋɛ na,Ɠɔoɠɔ GALAGI laa viilɛi ɠa so ba,eɠɛ timinigi ma ɗɛ wolai.