Isaiah 30 (YAPE)
1 I SOMOL e ke ga’ar: “Pi’in yad be gagiyegnag yu Judah e ka ni turguy e gechig nga dakenrad, ya yad be togopluw ngog. Yad be fol u bogi n’en ni gathigag e gu turguy, ma yad be sayinnag e babyor ko m’ag u thilrad nge boch e nam nib togopluw ko tin nib m’agan’ug ngay. Yad be yin’ daken e denen ni yad be rin’. 2 Kranod nga Egypt ko man ayuw ndar fithedgag ko mang e ngan rin’. Magan’rad ngay ni yu Egypt e nge yoror rorad, ere pilung nu Egypt e ir e ke pagan’rad ngak. 3 Ma re pilung nem e dabiyag rok ni nge ayuwegrad, ma yoror ni bayi tay yu Egypt ngorad e bayi ngal’ nib riya’; 4 ni yug aram rogon ni pi’in owcharad nga reb e nam e ka ra tawgad nga Egypt ko binaw nu Zoan ngu Hanes, 5 ma girdi’ nu Judah e bay ra kalgad ngan’rad ni bochan e pagan’rad ngak e re nam nem ndabiyag ni ngan toer ngorad, ni ba nam ndar ma yag ni ngar pi’ed e ayuw ko ngiyal’ nma t’uf e ayuw rorad.” 6 Ba’aray e thin nike yog Got ni murung’agen e pi gamanman nma par ko fa gi ted ni desert ni bay ko yimuch ni be ga’ar: “Pi’in owchen e nam nga reb nam e yad be milekag u daken e ted ni yad be yan u thathren e riya’, ya bay e gamanman ni layon riy, nge porchoyog ni bay e yub u l’ugun, nge dragon nma changeg. Ka ra sug niged daken keru’ e gamanman rorad ni dongki nge kamel ko tow’ath nib tolang puluwon ni tow’ath rorad ngak ba nam ndabiyag ni nge pi’ e ayuw ngorad. 7 Ayuw nra pi’ yu Egypt e mm’ay fan. Ere kug turguy fithingan yu Egypt ni fare ‘Dragon ndabiyag ni nge rin’ ban’en ngak be’.’” 8 Got e yog ngog ni nggu yoloy ngalan ba ke babyor e n’en nib mrin’ e girdi’, ya ngi i par ni be micheg ferad kireb. 9 Gubin ngiyal’ ni yad be togopluw ngak Got, gubin ngiyal’ ni yad be lifith l’ugunrad, ma gubin ngiyal’ ndaburad ni ngar motoyilgad ko fonow rok Got ngorad. 10 Krogned ngak e pi profet ni ngar th’abed gulungrad. Ke lungurad ngorad, “Dab ku mu weliyed ngomad murung’agen e tin nib mat’aw. Mu weliyed ngomad e n’en ni gamad ba’adag ni ngug rung’aged. Dab mu weliyed ngomad e tin riyul’. 11 Mu chuwgad u kanawo’ ma dab ku’um thabey niged gamad. Dabumad ni nggu rung’aged murung’agen e Got romed nu Israel nib thothup.” 12 Machane ba’aray e n’en ni be yog fare Got nu Israel nib thothup ni be ga’ar: “Ka mu feked yathin e n’en ni kugog ngomed ma kam toergad ko cham nge sabanban. 13 Gimed ba kireb. Gimed bod bangi rungrung ni simen ma ba tolang nike yan e tha’al riy ke mada’ nga but’; bay mu muchbu’gad nga but’ nib tomgin. 14 Bay mu weargad ni bod ba th’ib ni but’ ni pil nge wear ni nochiyang, nge par ni dariy bang riy ni ba ga’ boch nrayag ni ngan supunnag e kol ngay ni be gak’, ara nl’ing e ran u luwed ngay.” 15 I SOMOL ni Th’abi Tolang, ni Ir Facha’ nu Israel nib Thothup e be ga’ar ko girdi’, “Mu sulod ngam pagan’med ngog. Ma aram e gimed ra par ni gimed ba gel ma dabki buch ban’en romed.” Machane mu siyeged ni ngam rin’ed! 16 Ya kam leam niged ni ngam afgad nga daken e pi os romed nib machreg ngam milgad rok e pi to’ogor romed. Ma soromed, ya rib mudugil ni bay mmilgad! Gimed be leamnag nib machreg e pi os romed, machane pi’in bay ra lol’iged gimed e ka yad ba machreg boch ngomed! 17 Gimed ra guy ta’reb e to’ogor romed ma bbiyu’ i gimed e ra mil, ma ra yib lal e to’ogor ma ngam milgad ni gimed gubin. Dariy ta’reb e salthaw romed nra magey, ya kemus ni kolngin e flak e ra magey u daken e burey! 18 Machane SOMOL e be son nagmed ni ngam sulod ngak me ayuwegmed. Ba’adag ni nge runguymed, ya gubin ngiyal’ nma rin’ e tin nib mat’aw. Ba felfelan’ e pi’in nike pagan’rad ngak SOMOL. 19 Gimed e girdi’ ni gimed ma par u Jerusalem e bay mu pired ndab kum yorgad. Ya SOMOL e rib wurngan’, nap’an ni gimed ra yornag e ayuw ngak, ma ra fulweg taban e meybil romed. 20 Ra pagmed Somol ngu’um marod u fithik’ e mo’maw’, machane ir e bay u rom ni bay i fanow nagmed, ni dakriy rogon ni ngam gaweged i yan ngabang. 21 Fa’an gimed rayan nga wuru’ e wo’ ko ba’ ni mat’aw ara ba’ ni gilay’, ma gimed ra rung’ag lungun nga fiti keru’med ni be ga’ar, “Ba’aray e wo’. Mu leked.” 22 Bay mu feked e pi liyos nni ngongliy ko silber nge pi liyos romed ni ka ni liyef ko gol, ngam n’iged ni bod e dow ni gimed be tolul ni gimed be ga’ar, “Mu chuw riy!” 23 Demturug e ngiyal’ ni gimed ra yung e woldug romed, ma Somol e ra pi’ e n’uw ni nge tugulnag e pi woldug romed me yo’ornag wom’ngin, ma gamanman romed e bayi pire’ e yungi n’en ni ngu’ur abichgad riy. 24 Pi garbaw nge dongki nma ker e milay’ romed e yad ra kay e pin’en nth’abi fel’ ni makay e gamanman. 25 Rofen nem e nap’an yira kol e yungi tagil’ e damit ko pi to’ogor romed mi ni thang e fan rok e girdi’ rorad, ma yoch pa’ i lul’ e ra map e ran riy u daken gubin e burey nge gubin e yochi burey. 26 Pul e ra ga’ ra’en nge bod e yal’, ma ra’en e yal’ e ra ga’ ni medlip yay nga ra’en ni immoy, ni bod ga’ngin e tamilang u medlip e rran ni kan puthuy nga ta’reb e rran. Ran’ey e ra yodroy ko ngiyal’ nra taflay nge golnag SOMOL e maad’ad ni tay ko girdi’ rok. 27 Gelngin SOMOL nge muluplupen e yira guy nga palog. Nifiy nge ath e ma dag e damumuw rok. Ra non ma thin rok e ma yik’ ni bod e nifiy. 28 Ma pi’ nifngin nge m’on rok ni bod e sugbur nma fek gubin ban’en nge chuw. Me wolguy e pi nam nge thirifrad u but’ me museg e pi tanom rorad nib kireb. 29 Machane gimed e girdi’ ku Got, e bay um tanggad ni ka mu felfelan’gad ni bod ni gimed ma rin’ ko fare nep’ ni bay e madnom ni thothup. Ni felfelan’ ni bay mu ted e bod e felfelan’ ko girdi’ ni yad be un u lingan e musik ni ngal ni yibe thoy i yan nga Tempel rok SOMOL, ni ir e ma n’ufeg yu Israel. 30 I SOMOL e bayi gagiyegnag nge rung’ag gubin e girdi’ lungun ni yima rus ngay’, miyad thamiy gelngin e damumuw rok. Ra yib e nifiy, nge n’uw nib tomgin nib almarin, nge malang ni bay e nifiy riy ni be mulmul, nge n’uw ni sarbul. 31 Ra rus piyu Assyria u nap’an ni yad ra rung’ag laman SOMOL miyad thamiy gelngin e gechig rok. 32 Nap’an ni be gad SOMOL pa’ ngorad bayay nge bayay, ma girdi’ rok e yad be mosiknag ko drum nge harp. Got e racham nib togopluw ngak piyu Assyria. 33 Kakrom e ni fal’eg rogon bangi tagil e nifiy ni ngan urfiy e emperor nu Assyria riy. Gin’em e ba to’ar ma ba ga’ radan, ma ka ni ubung e l’ud riy ngalang. Ma SOMOL e bayi pogofannag ba yil’ i daramram nge aw e nifiy ngay.