Isaiah 58 (TOMA)

1 «Wooɠula ga zɛbɛi pɛ, mina ɓɔɠɔ zuzo.Wooɠula eɠɛ puʋu gooi é li poun!Nà-nuɓusɛiti ta-lɔ koloɠologi lɛ ga tiye,ta Zakɔɓe mavofodaiti ta-ɠotoiti. 2 Folo-o-folo ta gàiziɛzu,ti wɔinni ti zìima faiti kwɛɛ,eɠɛ nuɓusɛiti ta ɠɛ telebodai ɠɛɛzu,ti la ɠɛlɛni sɔle faiti ba GALA ge ti leveni,ti ɗa telebodaiti maaɠaazaɠabo mà tukpɔiti su,ti wɔin ga gè ɠɛ ti ʋa. 3 Kɛlɛ ta ɠɛɛzu mà: ‹Zugi zo fai ɠa lee ɠɛɛzu gi ʋɛ, è la kaazu,gi ɓɔɠɔmaayei, è la wɛlɛzu naa ɠaazu!›Wa-zuso foloi, wa ʋilɛsu wo yiima vaiti nɔ ʋolu,wo ɗa wa-wotiɠɛ nuiti sopele ɲɔu. 4 Wa zugi zosu, wo ɗa zakpe, wo ɗa ɓɔɛ,wo ɗa nuiti doɠa ga yeeɓuin ga ɲɔuɗa.Wo la zugi zosu, é ʋa zoloo ma voloi ma,ga wa-ƓALA falii ʋa mɛni geeɠɔlɔgi zu. 5 Naa ɠa é ga zugi ɓaa niigi wɔ̀inɗai la,foloi nui maanɛai é unmaayei su?Toɠa nɔ ga è ungi ʋilɛ nɔ ɓaa eɠɛ seeligi,è la saa wɔlɔ wo seɠei ta zuʋui zu,naa ɠa ɗa ɠɛ ma zugi,foloi nɛai Ɠɔoɠɔ GALAGI ʋɛ? 6 «Zugi nii wɔ̀inɗai la, toɠa ga:Wɔɔlɔyai ve naama nuiti zea niiti ti ɠiliai telebotalai maazu,duɔlai ma ɠaluiti pɛ ti vie,wo nuiti wɔɔlɔya, zɔiti ti ti zopele ɲɔuzu,duɔla ɠalui ma zii pɛ suleʋeleʋe, 7 wo ɗa-laamianigi ɠaaɠwɛ ʋa, wa zɔi pului ma,bala nuiti daazu la ti ʋɛ, è yeezei ti wu ɗa-ʋɛlɛwuʋɛ,è seɠe ve naati zea, zɔiti ta la ti ya,è mina ʋoluave è-ɠɛɛloin ʋa.» 8 Naazu, eɠɛʋelei folo lie kulazu voloi la,ʋele ɠana ɗa-wozakalagi a ɠɛ la,ɗa-ɠɛdɛyai ɠa zɔlɔɔ gaamanɔ.Ɗa-lelebodai ɠa ɠɛ è luɠɔ,Ɠɔoɠɔ GALAGI ná-lɛbiyai ɠa ɠɛ è ʋa, é ɗa è makɛ. 9 Siɛgi zu è toligi wosu da,Ɠɔoɠɔ GALAGI ɠa è wooɠaaʋote, ɗa wooɠulana ma,toɠa ɠɛ è ma: «Nà ɠaa!»Ni ɗa zuɲɔi ma unbawului ɠulana wo zaama,ta nuɓusɛi zopele ɲɔi, naa ʋɛɛ suɲɔu ɓɔɛzuɠulaiti ba, 10 ni ɗa è-ɠɔnɔgi veena pulu nui ya,ni ɗa maanɔɠɔ nui ɠɔ ga daamianigi,ɗa-wozakalagi ɠa lɛ kpidii yeemaazu,kpidii è su, toɠa valibo è ʋɛ eɠɛ folo gaalɔgai. 11 Ɠɔoɠɔ GALAGI ɠa ɠɛ ga ɗa-lotuɠɔi yeenɔpɛ.Toɠa è ɠula è-maavaiti pɛ su,zeeleʋebaiti su ada vɔɔiti,toɠa zɛbɛi ve è ʋɛ,ɗa ɠɛ eɠɛ kpelei ziɛi ʋuuzu ma ga pagɔ,eɠɛ ziɛ zeizuʋɛ nii ma ɗɛiti ti la vɔa. 12 È zaɓui zu, ta ada wɔlɔmaiti to ʋolu ti woloni,seɓasema wɔlɔmaiti kɛlɛi woni ʋa kaite,ɗa naati to ʋolu.Ta è loli ga: «Ada ɠoloɠologaiti kpɛtɛ nui,è peleiti daazu ga niinɛ,nii a kɛ zooi ɠɛ ga nu zeizu». 13 «Ni ɗa ɓena botiɠɛ vai ʋa dooɠo foloi,ɓaa è-maavaiti gaaɠula ba vai ʋa nà-folo ɲadegai,ni ɗa Ɠɔoɠɔ GALAGI ná-dooɠo foloi leʋena ga koozunɛ voloimakɛgai nà-botiɠɛ vai ma,maanɛai è unfe ma,ɗa ɓaana maazu ɠana, è ɠɛlɛ botiɠɛ vai ʋa ma,è mina ɓɔɠɔ maavaa ɠɛɛ vai vizɔ ba,è ʋa ɓɔɠɔ lɔ kpɔɛzuɠula ɲakaiti su, 14 naazu nà ɠɛ ga ɗa-ɠoozunɛɛi ma ungi.Nà, Ɠɔoɠɔ GALAGI, nà li ga ɗe zooi ɠaaɠoozaʋɛ,gè è-laamiizu ɠɛ ga zooi nii è-mɛmɛwola Zakɔɓe sɔlɔɔni ga nɔnɔ.»Ɠɔoɠɔ GALAGI ɠa é boga.

Isaiah 58 (TOMA)

In Other Versions