Jeremiah 13 (TOMA)

1 Ɠɔoɠɔ GALAGI wooi ɠaa mà: «Li, è geze zaamaɠiligi ɠeya ɓɔɠɔ ʋɛ, è gili zaama, kɛlɛ ɓɔɠɔ zo, è mina gba.» 2 Gè saamaɠiligi ɠeyani, eɠɛʋelei Ɠɔoɠɔ GALAGI boni la, gè gili zaama. 3 Naa ʋolu Ɠɔoɠɔ GALAGI ɓɔɛni pɔ̀ ná zeizu velesiɛi, é ɠɛ mà: 4 «Saamaɠiligi tɛi seɠe, è li ziɛ wolai Efelate ʋɔ bɛ, è dɔɔɠu miná kɔtu yeɠei taɠila su.» 5 Gè liini, gè dɔɔɠu ziɛ wolai Efelate ɠobaʋɛ, eɠɛʋelei Ɠɔoɠɔ GALAGI ma levei veeni la zèa. 6 Gola zuɠoozaai ma, Ɠɔoɠɔ GALAGI ɠɛni mà: «Wuzeɠe, è li ziɛ wolai Efelate ʋɔ bɛ, saamaɠiligi zeɠe ná, nii gè devei veeni è ya, ga è dɔɔɠu ná.» 7 Gè liini ziɛ wolai Efelate ʋɔ bɛ, gè ná zuveelɛ, gè saamaɠiligi zeɠe ʋɛ gè dɔɔɠuni ná. Kɛlɛ é ɠoloɠoloni niina, tosu la mɔ ɠɛni ba. 8 Ɠɔoɠɔ GALAGI ɓɔɛni pɔ̀, é ɠɛ mà: 9 «Ɠɔoɠɔ GALAGI wooi ɠaa: Zekana gè Zuda nuiti ta-wasogi ɠoloɠolosu da, ta Zeluzalɛme ná-waso golai. 10 Nuɓusɛi ɲɔu ɠa ga niiti, ti ɠɛlɛzu ga ti mina woilo gòoi ma, ti vɔɔnɛai ta-vaaɠaaɠalalai zu, ti ɠiliai gala kiligiti ba, ti ɗa ti lɛbi, ti ɗa nɔkɔ ti wu. Ta ɠɛɛzu ga saamaɠiligi nii ɠɛʋele, nii é la mɔ ʋani, tosu la ba. 11 Tama, eɠɛʋelei nu a ɗa saamaɠiligi ɠili la zaamaʋɛ, ʋele ɠana gè Izilayɛle ʋɛlɛyeɠeiti kpein gilini la, ta Zuda ʋɛlɛyeɠei pɛ,» Ɠɔoɠɔ GALAGI wooi ɠana, «gè tɔ̀ɠɔ ʋagɔi ʋɛɛ ti ʋa, ti ɠɛ ga nà-nuɓusɛiti, nà-lɛbiyai ma ungi, ta nà-kɔbu ansa ʋagɔi. Kɛlɛ ti la woiloni.» 12 «Li, è ɠɛ ti ma: ‹Ɠɔoɠɔ GALAGI, Izilayɛle ná-GALAGI wooi ɠaa: Pɔlɔ liɠii ɓɛtɛʋɛ ga dɔɔi ɗa zei su.› Ta è wooɠaaʋotena ga: ‹Naa ɠaaɠalagɛ, gi suɠwɛɛ ga pagɔ,› 13 naazu ɗa ɠɛɛzu ti ma: ‹Ɠɔoɠɔ GALAGI wooi ɠaa: Wɛlɛ, nà dɔɔi losu niima yooi zu nuɓusɛiti kpein da, é ti zo, ta masagiti pɛ ti zeini Davide ná-masa kpɔkpɔgi ɠa, naa ʋɛɛ zalaɠa ɠula nuiti ta GALA goo wo nuiti ba, ta nuiti kpein ti zeini Zeluzalɛme taazuʋɛ. 14 Nà ti pɛ doɠaloɠa ɓɔɠɔ ʋa, ɠɛɛɠɛi ta doun zunuiti pɛ,› » Ɠɔoɠɔ GALAGI wooi ɠana. « ‹Gè la ɓudɛa nu nɔpɛ maazu, maawɔinɠaa la pele leʋega tùɠɔ, gè ʋa ɓe ti undaaʋilisu.› » 15 À woilo, wo ɠida bu!À mina mɔ ɠɛ ga waso nua!Mazɔlɔɔ Ɠɔoɠɔ GALAGI ɠa ɓɔɛzu wo ʋɔ. 16 À unfemai ve Ɠɔoɠɔ GALAGI ʋɛ, wa-ƓALAGI,aisa é ʋa ʋa ga kpidii wo ʋɔ,wo-ɠɔɠɔiti ti ɗa ziɠa gizeiti ba, ʋɛ kpidii ʋɛɛzu ná.Wɔun, wa wozakalagi maaɓɔunsu,toɠa falibosu ga kpidi ɓɔii,ungo, toɠa falibosu ga tonaɓiingi suɓidia wolai. 17 Ni wo la ɠɛ woiloni,nà wɔlɔ dɔɔɠuzu wa-wasogi vaa zu,gàazuɗɛ ɓoigiti ta la,mazɔlɔɔ Ɠɔoɠɔ GALAGI ná-baala kpulugi ɠana ʋa liizu duɔlai zu. 18 Ɠɛ masagi ma ta masa mama wolai:«À zei zooi ma!Mazɔlɔɔ wa-masa bɔɔlɔ golai loa,é ɠula wo unma.» 19 Daaɠuluga taa wolaiti tuɠɔ ti lɛkpɛma ʋelei nu yeezazuʋɛ yooi zu,nu nɔpɛ ge la ná, nii a daalao.Mazɔlɔɔ Zuda yooi zu nuɓusɛiti pɛ ti lia duɔlai zu,ɛsɛ pɛ dii vai ɠana duɔlai zu. 20 Ɠaazu wuzeɠe, è wɛlɛ è zili nuiti ba ti ʋaazu,ti zeɠe lɛkpɛmaʋɛ nu ɠɔʋɛzuʋɛ.Nuɓusɛiti ge ti ɠalivaani è ma, ta ɠɛɛzu ɠale?Togani ɓulu koi é ɠɛni ga ɗa-lɛbiyai, ta mini? 21 Leeni ɠa ɗa bo naazu,siɛgi zu niiti è ti maalɛlɛai ga wo ɠɛ ga bɔɔlamaiti,naati ti wuzeɠezu la è laalɔɠɔma,ti zeizu è unda?Taɓai la è zoga,eɠɛ anzanui nii é doun zɔlɔɔ koozuwanai laawu ɓaa? 22 Naazu ɗa ɠɛ ɓɔɠɔ ɠaazaɠasu, è ɗa ɠɛ ma:«Lee vaa zu nii ɠɛɛzu ga ze?»Tɔɔzei ɗa-vaaɠaaza golaiti mɔin ʋelei ʋa,naa ɠa é kɛɛzu ti ɗa-zeɠei lakɔlɔgiti tɛɛzu la ba,ti ʋu è ma, ti faa ɲɔi ɠɛ ga ɗe. 23 Etiyopi nui ɠa zoo nɛi é kɔlɔgi ma zii valibo ɓaa?Kɔii ɓalaa ɠa zoo é ma ʋɔnɛi valibo nɛi ɓaa?Zekana é la, wa zoo nɛi wo faa ʋagɔ ɠɛ ɓaa,wɔiti faa ɲɔu ɠɛɛ vai ɠubogai wo zu? 24 «Nà ɓalaagi, Ɠɔoɠɔ GALAGI, nà wo vazasu fiilɛi zu,é li ga woye eɠɛ daazaɠa fɔɔi. 25 Zeluzalɛme, wɛlɛ è unma ɠasɔi ɠana,è-niigi ɠana gè seiɗai è luɠɔ,»Ɠɔoɠɔ GALAGI wooi ɠana,«mazɔlɔɔ è yeemaa mà,è ɠaliva zɛɛ ɠalagiti ma. 26 Nà ɓalaa nà ɗa-zeɠei ɠulazu è ma,naa ɠa a kɛ ti è maaɲakai ɠa. 27 Gè è ɓala gooiti mɛni,gè ɗa-wɛɛnziɛ faiti kaa,ta ɗa-unfetala ɠoloɠologiti, gizeiti ma dɔɓɔiti su,ta ɗa-ɠɔzɔba vaiti!Maanɔɠɔ ɠa è ʋɛ, Zeluzalɛme,ɗa yɛsu ɲadetalai zu eyɛsu yeelɛ?»

Jeremiah 13 (TOMA)

In Other Versions