Jeremiah 17 (TOMA)
1 « ‹Zuda nuiti ta-ɠotoi zɛʋɛʋɛ ga kɔlu ɠaazoɓagi,ɓaa diamai ma ɠaazoɓagi,sɛʋɛʋɛ ti-yiimaʋɛ ma ɠokologi ma,ta ta-zalaɠa ɠulazuʋɛ woizuʋɛti. 2 Ʋelei ti ɠaaɓaazu la ti-lointi ma,ʋele nɔ ɠana ti ɠaaɓaazu la ta-zalaɠa ɠulazuʋɛti ma,ta ta-zale wuluiti ti gulu wolaiti kobaʋɛti,ta gizeiti ma, 3 ta gize wolaiti ma, ɓalaɠaiti su.Zuda nuɓusɛiti, nà wo-yeaɠɔligiti ta wa-naavoloiti kɛɛzu ga kɔɔzoganiiti,ta wa-zalaɠa ɠula adaʋɛti,wa-vaaɠaazagiti ma zalai ɠana. 4 Ɗa ʋaazu yeeɠulazu zooi wu ɓɔɠɔ ʋɛnii gè feeni è ya ga ɗɔnɔ.Nà wo lɔɔzu duɔlai zu wo zili nuiti zea,zooi naa zu nii wo la kwɛɛ,mazɔlɔɔ nà-ziiɠaawanai soga eɠɛ abui,toɠa sosu wo pɛ wo laalɔɠɔma.› » 5 «Ɠɔoɠɔ GALAGI wooi ɠaa:‹Nui naa voovooʋɛ, nii é ɓɔɠɔ ɠalivaazu nui nɔ ma,é nuɓusɛi ɠɛɛzu ga ʋoluzeigi,ta é la ɠitosu Ɠɔoɠɔ GALAGI ʋa. 6 Kɛɛʋɛ eɠɛ dɔɓɔɠɛlɛgi nii é teʋebai zu,é la undaanɛ zɔlɔɔga, gaazu ʋa la kulanuma ma.Toɠa ada vɔɔi teʋebai zu,zou ɠalaai zu, ʋɛ nu nɔpɛ ge la zeiɗa ná. 7 Tuya ɠa naama nui ma, nii é ɓɔɠɔ veezu Ɠɔoɠɔ GALAGI ʋɛ,ta Ɠɔoɠɔ GALAGI ga ná-kitogi! 8 Kɛɛʋɛ eɠɛ gului siingai ziɛi ɠobaʋɛ,ma zapeiti ti liizu ziɛi wu,anɛɛ diegi ɠa ʋaazu, é la lua faa nɔpɛ ba,gaalaagi ma wundui ɠa yɛ de nɔ ɠɔ,ziizoolɛ la ma fɔɔvɔgi ma ɠonagi ma ziɛgi zu,é la ɓega gwaa wo fai ʋa ɠɔ.› 9 «Nuɓusɛi yii yaavaʋɛ é leʋe anii pɛ ba,é la zooga ʋalozu,ɓɛ ɠa a zoo é kwɛɛ? 10 ‹Nà, Ɠɔoɠɔ GALAGI, nà nui yiimaʋɛ ʋɛtɛsueyɛsu é zeeli kpomaʋɛ,gè ná-faaɠaaɠaa ɠigi ɓota.Naa ɠa é ba, nà ɛsɛ so eɠɛʋelei siɛ ʋelei la,é zoloo ná-kɛɛwotiiti ma.› 11 «Kɛɛʋɛ eɠɛ kakalogi é ʋɛɛni taɠili ɠain manii tɔun ge la daani,pele ɠana naama nui la,nii é naavoloi ɠaalɛɛzu ba ɓɔɠɔ ʋɛ ga telebotalai.É la zii laaɠulaa, é ɠula ti zaama,toɠa ɠɛ ga ɠimalala nui ná-eteai ɠaaɓelazuʋɛ. 12 «Lɛbiya masa kpɔkpɔgi é geezuʋɛ kaite wɔlɔwɔlɔ,miná ɠa gá-ƓALA sei ʋɛlɛ ɲadegai ná. 13 Ee, Ɠɔoɠɔ GALAGI, Izilayɛle ná-kitogi,nii pɛgi é ɠɛlɛzu è ʋa, unfegi ɠa ti maaɓɔle.Ungo, niiti ti ʋoluavesu bà, naati ta ɓɔɠɔ undaaʋilisu,tɔɔzei ti ɠɛlɛa zɛnvu su ɗɛungi ʋa,nii é ga Ɠɔoɠɔ GALAGI.» 14 «Ɠɔoɠɔ GALAGI, gè la ʋaloa, ni è la bàloni,gè la ɠizoga, ni è la kìzoni,mazɔlɔɔ è è maamusɛ ungi veeni zèa yeenɔpɛ. 15 Wɛlɛ ɛsɛ pɛ ka ɗa ɠɛ mà: ‹Mini ɠa Ɠɔoɠɔ GALAGI laawooi ná?É ʋilɛna su deɠɛmu!› 16 Anɛɛ naa ʋe, gè la ɠɛlɛni ga gè ʋilɛ è ʋolu,gè ɠɛ ga baala makɛ nui.Zìima la ga maanɔɠɔ voloi ʋaa vai.Ɗɔun è naa pɛ suɠwɛɛ nii dàaʋɛ bosu,gè ɓɔɛni è ɠaazu. 17 Mina ɠɛ bɛ̀ ga sasuɓali zaɓu!Ɗɛi è ga dɔ̀ɔɠuzu ɠila kpegi maanɔɠɔi ʋaa voloi! 18 Niiti ti wɔ̀inzeɠezu, ti unfe,kɛlɛ nɔ̀un gè mina lɔ unfegi zu.Ti zasuɓali, kɛlɛ nɔ̀un sàsu mina ɓali.Ʋa ga maanɔɠɔ voloi ti ʋɔ,nimizai ma ʋɛɛdai zei ti ma!» 19 Ɠɔoɠɔ GALAGI wooi ɠaa mà: «Li, è lo Nuɓusɛiti Ta-Ziɠidaʋɛ, ʋɛ ʋelei Zuda masagiti ta ɗa lɛ ná, ɓaa ti ɠula la taai ʋa. Ɗa kɛ ɠana nɔ ɓalaa ga Zeluzalɛme taa ziɠidaʋɛ zɔiti. 20 Ɗa bo ti ma náʋɛ ga: ‹À woilo Ɠɔoɠɔ GALAGI wooi ma, wa, Zuda masagiti, ta wa ya, Zuda nuɓusɛiti pɛ, ta wɔi wo zeini Zeluzalɛme, wɔi wa ɗa leʋe siɠidaʋɛ tɛiti!› 21 Ɠɔoɠɔ GALAGI wooi ɠaa: ‹À dama ga ɓɔɠɔ, à mina kasɔ zeɠe dooɠo foloi, à dama, wo mina lɛ ga kasɔ nɔpɛ niima ziɠidaʋɛ ta. 22 À mina kasɔ ɠula wa-ʋɛlɛi wu dooɠo foloi ta. À mina boti nɔpɛ kɛ. Kɛlɛ à dooɠo foloi maaɲɛ, eɠɛʋelei gè devei veeni la wo-mɛmɛwolani zea. 23 Ti la ɠɛni woiloni, ti la kidafaawu ɠɛni, ti ɠɔ toni ga, ti la woiloni gòo ma, ti la yeezeini nà-tɛnɛ gooiti bu.› 24 «Ɠɔoɠɔ GALAGI wooi ɠaa: ‹Kɛlɛ ni wɔun, wa woilona gòo ma ga pagɔ, ni wo la ɠɛ kasɔ zeɠeni dooɠo foloi, wo ʋa lɛɛ la taai nii ma ziɠidaʋɛti ta, wo dooɠo foloi maaɲɛ, wo ɓɔɠɔ zo, wo mina boti nɔpɛ kɛ ma, 25 naazu masagiti ta yɛ leʋesu siɠidaʋɛ tɛiti ɠɔ, masagi naati ta yɛ zeizu Davide ná-masa kpɔkpɔgi ɠa, ti ɗa ziɛ kɔlu wotoloiti su, ta sooiti kɔma, ta-ɠundiɠi wolaiti ti ti ʋolu. Zuda nuiti ta Zeluzalɛme laaʋeaiti ti pɛ ta ɠɛ leʋesu ma ziɠidaʋɛti ɠɔ, nuɓusɛi la ʋalaga taai tɛi su eyɛsu pɛ. 26 Naazu nuɓusɛi ɠa ɗa zeɠe Zuda laa wolaiti su, ta Zeluzalɛme maaɠooliiti su, ta Ɓɛnzamɛn ná-zooi zu, ta Zuludɛn nɛmɛi zu, ta gize yooi, ta lɛkpɛma ʋelei nu yeezazuʋɛ yooi zu, ti ʋa ti gala zalaɠai ɠula, ta zalaɠa ɠiligiti, ta vebɛ zalaɠaiti, ta ansansegi Ɠɔoɠɔ GALAGI zei ʋɛlɛi ma ɠoizuʋɛ, ga faanɛɛ wuuɠwɛɛgai. 27 Kɛlɛ ni wo la ɠɛ woiloni gòo ma, ni wo la dooɠo foloi maaɲɛɛni, ni wo la ɓɔɠɔ zoni wo ʋa ɓe kasɔ zeɠe vai ʋa, wo ʋa ɗa leʋe da Zeluzalɛme ziɠidaʋɛti dooɠo foloi, nà abu ʋili taa ziɠidaʋɛti ba, toɠa Zeluzalɛme masa pɛlɛiti gala, é la zaa pɛ.› »